Ồng Đinh Quốc Tuấn, Kwang atbồ Mpồl jơi bơtiàn càr Kon Tum yal, bal mờ broă bơtàu tơnguh lơh sa mpồl bơtiàn tàm tiah làng bol jơi bơtiàn ờ gal cau, broă prăp gàr mờ ngui bơta kwơ niam chài ờs mờng tàm càr, tàm hơ̆ geh bơta niam chài cing mồng sùm geh càr sền gròi, lơh uă broă lơh mùl màl. Tus tŭ do, neh geh 2 rơbô 500 bòr cing mồng geh ală jơi bơtiàn ờ gal cau tàm càr prăp gàr mờ ngui bơta kwơ; tàm hơ̆ uă ngan là broă geh bơh ală cing mồng tàm uă broă lơh niam chài – cíñ trị càr dê. Do là dơ̆ nàng ală cau chài lơh, ai tơngŏ wơl bơta niam chài cing mồng, dong kờl rơnàng tŭ do in git bơta kwơ krơi is bơh cing mồng, tamya xoang mờ geh kơnòl rơlao tàm broă prăp gàr, bơto bơtê ală bơta niam chài hơ̆.

Tus bal “Mang chờ cing mồng, tamya xoang ală jơi bơtiàn ờ gal cau càr Kon Tum” geh 170 nă cau chài bơh 08 mpồl. Tàm hơ̆ geh 07 mpồl ala măt 07 jơi bơtiàn ờ gal cau kis bơh yau tàm càr, tàm hơ̆ geh: Sơdàng, Bơnhàr, Jeh – Triêng, Jrai, Brâu, Rơmăm mờ Hrê. Tàm mang chờ, ală cau chài ai uă ngan tơngai tìp bal, tàm pơgơl bal ală bơta niam chài krơ is, niam bơnĕ bơh jơi bơtiàn dê mờ 245 nă cau ala măt mùl màl tus Pơrjum dờng cau ala măt ală jơi bơtiàn ờ gal cau càr Kon Tum dơ̆ IV. Cau chài Ri Ang, kòn cau Sơdàng, kis tàm ƀòn Kon Vơng Kia, ƀòn drà dềt Măng Đen, kơnhoàl Kon Plông, pà git: “Mpồl dròng cing jañ mồng añ dê là 17 nă tus tàm do dròng Mang chờ cing mồng nàng chờ gờm Pơrjum dờng cau ala măt ală jơi bơtiàn ờ gal cau. Broă dròng cing bol añ dê cèng tus nàng ală cau in sền là cing mồng, tamya xoang ƀòn lơgar tam gơl pa. Añ chờ hờp ngan geh tìp, dròng cing bal mờ ală jơi bơtiàn ndai tàm càr Kon Tum. Añ pơnyờ să ngan”.

Ală dơ̆ dròng cing tàm mang chờ, bè: Cing mồng, tamya xoang “Chờ gờm ngai chờ” bơh ală cau chài kòn cau Bơnhàr, kơnhoàl Đăk Hà; Teh phan đơs crih “Kah ưn ngài Đảng, Wa Hồ”, kòn cau Jeh Triêng, kơnhoàl Đak Glei; Tàp ding Đinh Pú “Gàr mìr”, kòn cau Brâu, kơnhoàl Ngọc Hồi; “Chờ gờm ƀòn”, kòn cau Bơnhàr, ƀòn dờng Kon Tum… neh lơh geh uă bơta niam tơngu me “Mang chờ Cing mồng Mpong săp jơi bơtiàn-Tam klăc bal ală jơi bơtiàn càr Kon Tum dê”. Cau chài ưu tú Phạm Văn Hân, Kwang atbồ Anih Niam chài-Cau chài càr Kon Tum, pà git, do ndrờm là ală dơ̆ dròng cing mồng niam bơnĕ ngan, là bơta kwơ mờ cau chài 07 jơi bơtiàn kis bơh yau tàm càr dê gam prăp sùm. Cau chài Phạm Văn Hân pà git: “Ală dơ̆ dròng cing mồng do là ală dơ̆ niam bơnĕ ngan, ala măt bơta niam chài bơh tơl jơi bơtiàn dê. Jơnau đơs pơn đik pơn điang, hơ̆ sồng dròng cing mồng, tamya xoang wă rò năc ha là ală jơnau dròng cing geh nùs nhơm lơh chờ bơh tơl jơi bơtiàn dê. Mang chờ ai tơngŏ nùs nhơm tam klăc bal ală jơi bơtiàn càr Kon Tum dê”.

Cau chài ưu tú A Thút kis tàm xã Mường Hoong, kơnhoàl Sa Thầy ai tơngŏ nùs nhơm chờ hờp ngan tŭ geh sền ală dơ̆ dròng cing niam bơnĕ tàm mang chờ. Ồng gơlơh chờ hờp ngan tŭ tàm ală mpồl cau chài, geh uă ngan ală ơruh pơnu, kơnòm pa tào chài dròng ală bơta cing mồng. bơta do ai tơngŏ broă tơrbŏ bal, bơsram bal bơh ală rơnàng kơnòm să gơwèt mờ ală bơta niam chài ờs mờng bơh ală jơi bơtiàn kis bơh yau dê; pơgồp bal tàm broă prăp gàr, ngui ală bơta kwơ niam chài bơh ală jơi bơtiàn ờ gal cau càr Kon Tum dê.

Mang chờ kung là dơ̆ nàng ală rơnàng cau chài geh tìp bal, tơnguh nùs nhơm tam klăc bal mpồl bơtiàn, mờ pơgồp bal tàm broă tơnguh uă nùs nhơm pơnyờ să jơi bơtiàn mờ jơnau git wă tàm broă prăp gàr, ngui bơta kwơ niam chài ờs mờng.