Tàm Hìu duh kah Lạc Giao, sơnah ƀòn Buôn Ma Thuột, Sờh Niam chài, Tàp pràn să jan mờ Lòt nhơl càr Dăk Lăk bơyai lơh broă lơh đơs crih tam ya “Jơnau đơs crih Nhai 4”, mờ 2 bơnah “Jơnau đơs crih tơrgùm dùl” mờ “Dăk Lăk- Mpong dờng ngai pa”. Broă lơh lơh tơngŏ wơl gùng lòt tam lơh bòl glar kal ke, lơh tơngŏ wơl gơtha kah yau bơh Tam lơh pha lin dờng nam pa 1975, is ồn là tam lơh pha lin Buôn Ma Thuột, tam lơh pha lin pờ sơn rờp tàm tiah tam lơh Tây Nguyên dê, pơgồp bơnah lơh geh pha lin bơh Tam lơh Hồ Chí Minh kah yau.

 Mơkung cih yal muh mat tam gơl pa bơh càr Dăk Lăk dê tơnơ̆ rlau 50 nam tơnklàs. Bơh ngai 30/4 tus ngai 3/5, tàm sơnah ƀòn Tuy Hoà geh bơyai lơh ală broă lơh mờ tơngume “Ka Ngừ Dăk Lăk- bơta niam bơnĕ nđàr mừh”, pơgồp bal mờ “Dơ̆ lơh chờ Khiñ khí kầu - Par sền mat tơngai pa lik drim gờñ”, nàng kờñ gờm chờ ală ngai chờ dờng mờ yal tơngĭt uă lòt nhơl tiah do dê. Tàm ƀlàng dờng Đại Đoàn Kết, sơnah ƀòn Pleiku, Anih duh broă Làng bol càr Gia Lai pa bơyai lơh Broă lơh đơs crih tam ya is ồn “Brê bơnơm dờn ơning ơnàng driau dờng” jờng rơ bơta pràn tam klăc dờng ală jơi bơtiàn dê. Broă lơh là broă lơh geh kwơ Tơngkah kir sơnrai 80 nam Ngai Wa Hồ pơyoa sră tus Pơrjum dờng ală jơi bơtiàn dồ ết nă cau tiah đah Jum dà lơgar tàm Pleiku, Tơnkah 51 nam Ngai Tơngklàs tiah đah Jum, tơrgùm dùl Dà lơgar. Bơta tờm bơh broă lơh dê là bơnah lơh tơngŏ wơl sră pơyoa Củ tịc Hồ Chí Minh dê pơyoa làng bol ală jơi bơtiàn dồ ết nă cau in nam 1946.