Ngai chờ sơnđờm bơh sơnrờp bal mờ jơnau lơh niam bơnĕ krơi is ngan dròng cing jañ mồng bơh 20 mpồl dê bal mờ rlau 300 nă cau chài jơnau bơh yau tus bơh ală kơnhoàl, ƀòn dờng bơh càr Lâm Đồng dê tus bal lơh. Do là broă lơh niam chài niam bơnĕ krơi is ngan, tơngkah kir sơnrai 30 nam ngai tơnggơs kơnhoàl Bảo Lâm, nàng kờñ prăp gàr mờ ngui niam ală bơta kwơ niam chài bơhiàn ờs mờng bơh yau ală jơi bơtiàn dồ êt nă cau tàm ù tiah càr Lâm Đồng dê.

Ală nam do, càr Lâm Đồng neh pờ rlau 100 ơdŭ bơto wơl đơng goòng bơhiàn yau ai mờr 3 rbô nă ơruh pơnu kơnòm pa tàu là làng bol jơi bơtiàn dồ êt nă cau tàm càr in. Mơkung dong kờl cing mồng ai 113 mpồl in, phan ngui soh ờs mờng bơh yau ai 186 mpồl in, dong kờl 72 nơm măy mok phan ngui ai tơl hìu niam chài tàm ală thôn tiah làng bol jơi bơtiàn dồ êt nă cau in.