Rơlao 15 nam trŭ sa tàm uă hìu sa pơnrơ ngan tàm Quy Nhơn, bi Huỳnh Tấn Dũng, trŭ sa tàm hìu tăc phan sa hìu nhă “Brê buh” tàm sơnah ƀòn Quy Nhơn sùm gơboh kờñ mờ phan sa Tây Nguyên dê. Bi Dũng pà git: Cau năc tus mờ Quy Nhơn, Gia Lai kờñ ngan sa ală phan sa tiah bơnơm dê, bè poăc be, kơnrồ buh tàm ding đơr ha là poăc iar jù, poăc sur buh tềng ồs rơnga.

Bi Huỳnh Tấn Dũng pà git: “Să tờm añ kung kờñ bơtàu tơnguh phan sa ƀòn lơgar dê mờ ală bơta phan lơi neh geh lài. Añ lơh phan sa kờñ yal tus mờ ală oh mi in là kờñ bơtàu tơnguh phan sa añ dê, kờñ pơgồp bal geh ală bơta phan, phan tĕ neh geh lài tàm ƀòn lơgar añ bè tàm Việt Nam he dê nàng ală cau năc lòt nhơl tŭ tus tàm lơgar Việt Nam kung bè Gia Lai dê, tus tàm ƀòn dờng dà lềng añ rơ̆p geh sa ală phan sa lơgar Việt Nam he dê sùm bơkah niam”.

Ñờp dà lềng hồl mờ tiết kañ ñờp dà lềng, ka Cìñ buh tềng ồs rơnga, lẩu Ka ti dờng, Kràng dà lềng buh phô mai, ka dìa dà lềng gơm mẳn… là ală phan sa bơh dà lềng dê, geh cau chài trŭ sa tàm ală hìu tăc phan sa tàm Quy Nhơn ai tàm khà phan drơng cau năc in tàm broă lơh bơh Nam Lòt nhơl dà lơgar – Gia Lai 2026. Tus mờ Quy Nhơn lòt nhơl mờ nhơl sền tàm nam lòt nhơl Dà lơgar 2026, bi Trần Nhật Đông tus bơh ƀòn dờng Hồ Chí Minh đơs: “Phan sa Quy Nhơn geh uă bơta ngan, bơdìh mờ phan sa geh bơh phan tàm dà ris kis den să tờm añ kung sa ờ uă bơta phan geh bơh brê bơnơm Tây Nguyên dê bè ală phan buh. Bơta bơkah den kung gơdờp mờ tiah đah Tô kung bè tiah đah Jum sơl. Añ gŏ bè ờs bè tàm hìu sơl”.

Mò Nguyễn Thị Kim Chung, Phó Kwang lam bồ Sờh Niam chài Tàp pràn să jan mờ Lòt nhơl càr Gia Lai yal, tàm bơta càr Gai Lai gơs anih tus kwơ màng tàm mpồl broă lơh Nam Lòt nhơl Dà lơgar 2026, gah broă lơh drơng ala phan sa càr dê gam geh ală broă tam gơl loh làng ngan. Ală hìu tăc phan sa tơnguh uă jơnau git wă mờ geh kơnòl tàm broă kă bro, wèt tus bơ̆t bơtàu rùp rài lòt nhơl đềt mềr, gơguh jăk. “Tàm poh lơh nam lòt nhơl dà lơgar, ală mpồl kă bro lòt nhơl tàm càr neh geh rơcang lài tơnguh uă bơta niam broă lơh drơng ala kung bè phan bơna, bơta chài, mpồl lơh broă rơcang lài nàng drơng cau năc in. Ală mpồl lơh broă kung sền kwơ tus mờ bơta uă phan geh lơh ngan là phan sa, ală phan sa krơi is càr dê. Tơnguh broă mblàng yal ai nam lòt nhơl dà lơgar in nàng yal tus cau năc lòt nhơl in git bè ală broă lơh tàm nam lòt nhơl dà lơgar”.