Bơh ngai 11 tus ngai 13 nhai 4 nam 2026 tus do tàm càr Quảng Ninh rơ̆p bơyai lơh Pơrlòng Pờ tơlik jơnau đơs gùt lơgar dơ̆ 17 -–Quảng Ninh 2026 mờ tơngu me “Pờ tơlik jơnau đơs tài Việt Nam pràn kơl dang, pas gơs”. Do là jơnau yal geh ai tơlik tàm dơ̆ pơrjum ƀăo yal bè Pơrlòng pờ tơlik jơnau đơs gùt lơgar dơ̆ 17 geh Anih jơnau đơs Việt Nam (VOV) pơgồp bal mờ Anih duh broă Làng bol càr Quảng Ninh bơyai lơh mho òr (30/03) tàm Hìu pờ tơlik jơnau đơs Dà lơgar sồ 58 gùng Quán Sứ, ƀòn dờng Hà Nội.

Jăt Phó Kwang lam bồ dờng Anih jơnau đơs Việt Nam ồng Phạm Mạnh Hùng yal, bơta tờm bơh Pơrlòng nam do là dơ̆ sơnrờp bơyai lơh pơrjum cri bơyai ală lơgar bè podcast, tơrgùm 35 nă cau jăk mờ uă mpồl cau jăk tus bơh ală lơgar. Kwơ màng, Pơrlòng kung là dơ̆ sơnrờp jà cau jăk sền khà bơh ală lơgar tus bal ai khà tàm gah podcast. Bơta do ai tơngŏ ngai sơlơ loh làng ngan bơh ală jơnau đơs mờ podcast dê, ai tơngŏ gùng dà bơtàu tơnguh pa bơh sră ƀăo pờ tơlik jơnau đơs tàm rài yal tơngit uă tơngu me. Tàm dơ̆ Pơrlòng Pờ tơlik jơnau đơs gùt lơgar dơ̆ XVII geh bơyai lơh uă broă lơh: Pơrjum cri bơyai ală lơgar: “Podcast - Gùng dờng bơceh lơh ai pờ tơlik jơnau đơs dê tàm rài sồ"” Pơrjum cri bơyai jăt broă lơh: “Pờ tơlik jơnau đơs tơn tàm rài pa – Git wă nàng hòi jà cau iăt”; Dơ̆ tơn jơh mờ jào khà Pơrlòng Pờ tơlik jơnau đơs gùt lơgar dơ̆ XVII.