Dơ̆ bơsram lồi poh, ƀlàng hìu bơsram kấp 1 Tô Hiệu, sơnah ƀòn Ea Kao, càr Dăk Lăk hô hơng ală broă lơh sền gĭt bè niam chài ờs mờng bơh yau. Ală kơnòm bơsram tus bal tơn wăc sềr rùp, koh, lĭp, crăp ală rùp. Ală pơ àr kò rơ hời geh rùp bơka ồi kòn cau, ù tiah hàng niam ƀòn lơgar, rài kis pah ngai dê. Broă lơh pơn yơu  hìu jòng, đờng gòng jơi bơtiàn geh lơh tơngŏ wơl mờ phan lơh gơlik wơl, geh bal bơnah yal tơngĭt tềng đăp gùt hìu bơsram dê. Oh H’Trâm Niê, kơnòm bơsram ơdŭ  5E, sền gĭt:“Oh kờñ ngan rlau jơh là broă lơh STEM bơh ală ơdŭ dê neh ràng tơlik tài bơh tơngŏ wơl bơhiàn niam chài is jơi bơtiàn kòn cau Rơđê dê. Oh pơn yờ să ngan bè bơhiàn niam chài is jơi bơtiàn bơh he dê, oh kơ̆p kờñ tơnơ̆ do hìu bơsram rơ̆p bơyai lơh tai uă broă lơh rlau tai nàng oh in ngui niam geh bơhiàn niam chài is jơi bơtiàn he dê”.

Duh hồl ngan rlau jơh là bơnah pơrlòng Rơngô Tiang Liang mờ ală jơnau lùp gùt dar bơta gĭt wă niam chài ală jơi bơtiàn tàm ƀòn lơgar dê bè kòn cau Rơđê, kòn cau M’Nông. Oh Đinh Diệp Anh, kơnòm bơsram ơdŭ 3A pà gĭt: Ală jơnau hơ pà gŏ bơta rcang lài jòi gĭt bơh kơnòm bơsram dê gơwèt mờ ală jơnau gĭt wă bè hìu jòng, dơ̆ lơh chờ, cing mồng...: “Oh gơ lơh gŏ chờ hờp mờ gơ dan ngan. Oh geh gĭt tai uă bơta bè niam chài kòn cau Rơđê dê bè hìu jòng, cing mồng, phan soh kòn cau mờ ală dơ̆ lơh chờ bơhiàn ờs mờng cèng gơtha jrô ơnàng uă ngan bơh kòn cau Rơđê dê”.

Bơta chờ hờp bơh kơnòm dềt dê kung lơh gơrề uă tus mờ ală mè bèp kơnòm bơsram dê sơl. Ồng Lê Đình Nam, geh kòn gam jat bơsram tàm Hìu bơsram kấp 1 Tô Hiệu đơs là, mờ broă bơsram mờ sền gĭt do ală kòn neh geh ală bơta tam gơl niam ngan: “Ală kòn hờn chờ mờ rcang ai ngai chờ STEM in, ngai lơi rê kung yal ngai do kòn geh wăc sềr rùp, ngai do kòn geh tam ya mờ ală ùr pơgru, kơ̆p ngan, kòn bĭc ờ gơtùi tơn den tàng mè bèp kung gơ lơh chờ hờp bal mờ ală kòn sơl.

Jat mò Đoàn Thị Tuyết Yến, Lam bồ Hìu bơsram kấp 1 Tô Hiệu, hìu bơsram geh mờr 1 rơbô 200 nă kơnòm bơsram, tàm hơ̆ geh uă oh kòn là kơnòm bơsram jơi bơtiàn dồ ết nă cau, ală broă lơh do lơh geh tiah nàng kơnòm bơsram in tìp mat lơh kwèng, lùp bơsram, bơtơl bơta gĭt wă sền dờng màng, prap gàr mờ lơh gơrề uă ală bơta kwơ niam chài niam bơnĕ dê:“Do ờ mìng là broă lơh đah bơdìh bè ờs lơm mờ gam là dùl ù tiah nàng ală kơnòm in geh sền gĭt, geh bơceh lơh mờ ngui ală bơta gĭt wă STEM neh geh bơsram nàng lơh tơngŏ wơl ală phan ngui, broă pơn yơu niam chài kòn cau Rơđê dê, nàng prap gàr mờ lơh gơrề uă ală bơta niam bơnĕ bơh niam chài tiah do dê”.

Tàm Dăk Lăk, uă hìu bơsram kấp 3 neh bơyai lơh broă lơh sền gĭt niam chài mờ uă broă lơh krơi is. Tŭ geh bơceh lơh tơn, jòi gĭt mờ tam pà bal, ală oh iăt kơno bơta jơnau yal tơngĭt mờ lơh geh bơta pơn yờ să, nùs nhơm sền gàr ală bơta kwơ niam chài bơh ƀòn lơgar dê. Ală gar sơrìh hơ̆ là bơnàng jă nàng niam chài ờs mờng bơh yau pơn jat tai geh sền gàr, lơh gơrề uă tàm mpồl bơtiàn.