
Tàm nùs nhơm hô hơng bơh gùng đơs crih tam ya mờ ràng tơlik dròng cing jañ mpồng cèng bềng bơhiàn niam chài Lào dê, làng bol mờ năc lòt nhơl geh sền ală dơ̆ bơyai lơh dròng cing jañ mồng, ràng tơlik pĕ đờng T’rưng, kơ wào tàp mờ gùng tam ya Lăm vông lơbơn niam, ràng tơlik ală phan soh kòn cau geh tơngume Bơta niam bơnĕ tiah kơh bơnơm dê. Ală jơnau tam ya bè Bơkào niam Chăm pa, Sao Ken Fai, Sa La Vắn, I Kơng Đươn Đao… hòi jà năc lòt nhơl bơnĕ bơnài bal mờ ală klau pơnu, ùr ơruh Lào dê.

Bal mờ hơ̆ là dơ̆ sàc dà cèng gơtha tơngăc kàl prang, hòi dan mìu gơdùh tuh mrềt jơh rơbô phan tam in hòn dờng gơs niam. Do kung là dùl bơhiàn tơngŏ bơta gờm chờ bơh làng bol Lào dê, kơ̆p kờñ tơl nă cau rào goh jơh ală bơta ờ bơtoah bơtoài mờ wă rò ală bơta niam bơnĕ, chờ hờp tàm nam pa.
Tus mờ Dăk Lăk lòt nhơl tàm dơ̆ ơm rlô do, bi Đỗ Hoàng Việt, ơm tàm càr Phú Yên pà gĭt:“Ngai do añ ngoh rơngăc ngan tŭ sền gĭt dùl broă lơh lơh chờ sàc dà bơh làng bol Lào kis tàm ù tiah Buôn Đôn, càr Dăk Lăk dê. Añ gơ lơh gŏ ù tiah Dăk Lăk niam ngan, do là dùl tàm ală tiah tus gơ hòi gơ jà năc lòt nhơl uă ngan, is ồn là năc lòt nhơl tus bơh tiah jat kềng gah dà lềng bè Phú Yên, Bình Định”.

Chờ sàc dà mờ sền gĭt niam chài lơgar Lào là dùl tàm ală broă lơh niam chài geh bơyai lơh tàm càr Dăk Lăk di dơ̆ tơngkah kir sơnrai 50 nam tơrgùm dùl Dà lơgar. Mò Nguyễn Lê Thanh Thảo, cau tàm mpồl bơyai lơh dê, pà gĭt:“Bol añ rơwah ală broă lơh lơh rài bồ tơngoh chờ hờp chờ hờñ, niam ngan rlau jơh nàng yal tơngĭt tus mờ làng bol càr Dăk Lăk mờ năc lòt nhơl. Do kung là dùl tàm ală broă lơh mờ làng bol mờ năc lòt nhơl in gơtùi tus bal mờ nhơl chờ bal, ờ mìng sền lơm gời mờ gam geh tus bal tàm jơh ală broă lơh bè hơ̆ sơl, bơh hơ̆ lơh geh bơta gơ kờñ mờ bơta tờm pa ai rùp rài lòt nhơl càr Dăk Lăk dê”.
Uă broă lơh sền gĭt niam chài geh bơyai lơh tàm anih tờm ƀòn dờng Buôn Ma Thuột mờ ală kơnhoàl tàm càr Dăk Lăk dê. Niam chài jơi bơtiàn kòn cau Thái, jơi bơtiàn kòn cau Lào geh làng bol yal tơngĭt tơn tus mờ năc lòt nhơl bơh ală phan sa, gùng tam ya, gùng đơs crih mờ broă nhơl chờ. Broă lơh ràng tơlik ală phan bơna OCOP, dơ̆ lòt nhơl Rafting was plung sơr lèt nrùh dà, dơ̆ Rơndeh guh bơnơm lòt gan bơnơm gan nrùh dà; Ngai chờ Khiñ khí kấu kung geh ală tiah, anih lòt nhơl bơyai lơh dờng ngan.

Tàm càr Dăk Lăk nam do gam geh tam gơl pa uă ngan mờ broă lơh tìp mat lơh kwèng niam chài, đơs crih tam ya mờ càr Mondulkiri (lơgar Campuchia) mờ broă lơh tìp mat lơh kwèng đơs crih tam ya Dăk Lăk mờ Phú Yên pơgồp bal ràng tơlik ka ngừ dà lềng dờng, gơ hòi gơ jà bơta tus bal bơh làng bol mờ năc lòt nhơl. Ồng Đỗ Hoàng Việt, ơm tàm càr Phú Yên pà gĭt:“Mờr tus 2 tiah geh bơta tơmŭt bal den tàng añ kung kờñ geh bơta sền gĭt pa ngan. Añ kung neh guh tàm Buôn Ma Thuột uă dơ̆ ngan mơya dơ̆ do añ guh tàm do mờ dùl nùs nhơm ndai mờ añ gơ lơh geh dùl bơta lơi hơ̆ pa ngan mơya kung rềp mềr ngan sơl".
Viết bình luận