VOV4.M'nông: Tât nar 22/11, n'gor Lâm Đồng hŏ n'hao rnoh âk nuĭh chuh 2 n'glai vaccine an nuĭh 18 năm deh geh rlău 80%. Aƀaơ Lâm Đồng hŏ ƀư chuh rlău 1.713.851 n'glai vaccine njrăng n'gang Covid-19 an nuĭh ƀon lan. Tâm nê, geh rlău 946.000 dĭng lah n'glai 1 n'hanh rlău 767.700 dĭng lah n'glai 2, geh rnoh nkrum vaccine njrăng n'gang nuh srê Covid-19 n'glai 1 lah 99,03% n'hanh chuh tŏng 2 n'glai lah 80,35 % an nuĭh 18 năm deh let lơ. Aƀaơ n'gor Lâm Đồng dôl nsrôih ntrôl ngăch chuh n'gang, nsrôih ndơ̆ rnoh nkrum lam chuh vaccine n'glai 1 geh tât 100% rnoh nuĭh 18 năm deh let lơ tâm kêng dŭt khay 11 dja. Rlău ma nê, Lâm Đồng hŏ geh trong nchrăp chuh n'gang vaccine Covid-19 tâm pơh dja an rmôt nuĭh ntơm bah 16 tât 18 năm deh. Ta năp măt, mbra ƀư chuh 21.300 dĭng vaccine an kon se nti ta 38 nhih nti trung học phổ thông n'hanh ntĭm nti nău kan ta 5 nkuâl, nkual ƀon têh tâm n'gor./.

Nuĭh rblang: Điểu Thân