“Ƀư tĭng tâm ban bu ur bu klô n’hanh mkra ăp nău khlay đah bu ur n’hanh kon se” tâm nău nchrăp ƀư mrô 8, Hội liên hiệp bu ur n’gor Tuyên Quang lĕ rgum mbơh ƀư ta 570 thôn bah 121 xă nkual rnoi mpôl đêt ta lam n’gor. Gay ƀư tĭng geh săk rnglăy nău nchrăp ƀư, ăp gưl hội bu ur n’gor Tuyên Quang lĕ ndâk njêng bơi 340 ntrong kan ƀư nkoch mbơh ntŭk gŭ rêh geh tât râng bah lĕ bu klô n’hanh bu ur. Bah rnôk geh rmôt nkoch mbơh ntŭk gŭ rêh pah kan nkoch trêng tâm ban bu ur bu klô, ndâk ƀư ntŭk ntô gŭ rêh đăp mpăn an bu ur n’hanh kon se dơi ntrôl dăng. Wa Hoàng Thị Lan Anh, Groi kruanh Hội liên hiệp bu ur xă Hùng Đức, nkuăl Hàm Yên an lah, nău ndâk njêng Rmôt nkoch mbơh ntŭk gŭ rêh lah nkoch trêng, rgŏ jă nuĭh ƀon lan rgâl nău mĭn, trong ƀư, rgop jŭt jăng ăp nău dun n’gang, trong uănh du ding bu ur tâm rnăk wâl n’hanh ntŭk gŭ rêh.

Nău ndâk njêng rmôt nkoch trêng ntŭk gŭ rêh aơ mbra kơl an nău nkoch trêng an rmôt nuĭh n’hanh nuĭh ƀon lan wât lơn mpeh tâm ban bu ur bu klô n’hanh tâm pă kơl ndrel jêng nău tâm ban tâm nău rêng rnăk wâl ndâk njêng jêng rnăk wâl hơm răm, uĕh lăng.

Ta xă Hùng Đức, nkuăl Hàm Yên, Hội Liên hiệp bu ur n’gor săch thôn Khuôn Then ƀư ntrong kan Rmôt nkoch trêng ntŭk gŭ rêh. Yuh Vi Thị Xuân-du hê nuĭh tâm Rmôt nkoch trêng ntŭk gŭ rêh bah thôn an gĭt:

Tă bah nar nkoch trêng kơl an săk gâp dơi wât tâm ban bu ur bu klô n’hanh njrăng n’gang tâm lơh rnăk wâl, mât njrăng bu ur n’hanh kon se ri êng săk gâp mbra nkoch trêng an lĕ rngôch kônh wa nuĭh ƀon lan tâm thôn dơi wât mpeh tâm ban bu ur bu klô n’hanh mât njrăng nău dơi kon se n’hanh bu ur gay njrăng n’gâng tâm lơh rnăk wâl tâm thôn.

Rlău ma ntrong ƀư Rmôt nkoch trêng ntŭk gŭ rêh, ăp gưl hội bu ur n’gor Tuyên Quang hôm ndâk njêng mhe bơi 30 ntrong ƀư ntŭk nsing nơm gay mbơh ntĭm mkra nău tâm rkeh, ntop kơl nuĭh geh tâm lơh ta rnăk wâl. Ndrel đah nĕ, Hội liên hiệp bu ur n’gor Tuyênm Quang lĕ tâm rgop đah năp ngih sam ƀŭt ndâk njêng ăp câu lạc bộ “Nuĭh kruanh bah nău rgâl”. Aơ mbra lah du pâl uĕh an ăp oh tâm nău ƀư tĭng tâm ban bu ur bu klô, rgop mkra ăp nău khlay đah kon se, nkual rnoi mpôl đêt.

Oh Hoàng Thị Khánh Huyền, kon hŏk Ngih sam ƀŭt phổ thông dân tộc nội trú ATK nkuăl Sơn Dương an lah: râng nău ƀư câu lạc bộ, oh n’hanh ăp băl dơi tâm nđŭr pâl rlưn, dơi nkoch nău wât blău rơh năm deh bu ur bu klô. Rlău ma nĕ săk nơm geh wât, gĭt blău mât njrăng nơm gay nâp nâl hăn tâm rgŏ năp:

Râng tâm câu lạc bộ kơl oh wât mpeh ur sai mpeh tâm lơh ta ngih sam ƀŭty tâm lơh rnăk wâl; kơl oh dơi nkoch an ăp băl tâm ngih sam ƀŭt rnăk wâl dơi dêr nău tâm lơh tâm rnăk wâl.

Câu lạc bộ “Nuĭh kruanh bah nău rgâl” lah ngoăy tâm 4 ntrong ƀư bôk năp bah Nău nchrăp ƀư mrô 8 “Ƀư tĭng tâm ban bu ur bu klô n’hanh mkra ăp nău khlay đah bu ur n’hanh kon se”. Nai Lý Hải Vân, Ngih sam ƀŭt phổ thông dân tộc nội trú ATK nkuăl Sơn Dương an gĭt:

Mbra tiăr nti tay an ăp băl tâm câu lạc bộ nuĭh câu lạc bộ gay ăp băl dơi nkoch trêng đah ăp băl kon hŏk tâm ngih sam ƀŭt kơt mbơh rblang lam hvi nău wât đah nuĭh bên rnăk wâl băl bên kơt lah rnôk sĭt ƀon lan ri mbra geh ăp nău ƀư uĕh gay rgop an ntŭk gŭ rêh.

Nău ndâk ƀư câu lạc bộ lĕ năp an kon hŏk rnoi mpôl đêt âk nău wât, nău blău uĕh ntrôl ăp oh lah nău ngơi bah nơm, rgâl trong mĭn, trong nti, trong ƀư n’hanh rgop jŭt jăng nău bên, rlŭk mâl ta nkual prêh. Aƀaơ, ăp câu lạc bộ aơ lĕ rgop ƀư uĕh ăp bôk nău kan, nău kơl, mkra ăp nău gêh tât kon se; ntop kơl ăp nai n’hanh me bơ̆ ƀư tĭng uĕh nău ntĭm nti oh kon n’hanh nking n’gang ăp nău tâm lơh, n’grŭn mpet, tăch, nhŭp ntŭng, gŭ ur sŏk sai ơm ta kon se.../.