An ƀư trong nchrăp 8 “Tĭng ƀư nău tâm ban bu ur bu klô n’hanh nkra ăp nkô̆ nău jăch ndăn đah bu ur n’hanh kon se” mpeh bôk  nău kan gưl neh dak hun hao wăng sa- rêh jêng kon nuĭh nkual rnoi mpôl đê̆ n’hanh mpeh yôk yang, Hội Liên hiệp Bu ur n’gor Quảng Ninh hŏ n’hanh dôl du rơh an ƀư âk nău kan ngăn ngăn đah nău ŭch tât dơi dŭt têh ntrŭt ntrôl mât chăm bu ur n’hanh kon se rnoi mpôl đê̆ n’hanh mpeh yôk yang.

Tĭng wa Phạm Thị Thùy Trang, Kruanh Hội Liên hiệp bu ur nkuâl Ba Chẽ, lah ntŭk dŭt jêr jŏt bah ngor Quảng Ninh, ntŭk rgum dŭt âk ƀon lan rnoi mpôl đê̆ gŭ rêh, nău “rgâl nău mĭn, nău kan” rgop jut bah sâm brôi bu ur, rluk mâl ơm tâm rnăk wâl n’hanh ƀon lan  ta Ba Chẽ mâp mô đêt jêr jŏt tă bah lơn âk ƀon lan rnoi mpôl đê̆ ta aơ nsĭt geh wăng sa rnăk wâl hôm đêt, nău gĭt blău, nău dơi kan, nău gĭt êng hôm đêt, nău mĭn sâm brôi bu ur ndrel du đêt nău way bah ƀon lan mô uănh khlay bu ur hôm âk. Wa Phạm Thị Thùy Trang, Kruanh Hội Liên hiệp bu ur nkuâl Ba Chẽ an gĭt:

Aƀaơ âk bu ur n’hanh kon se bu ur nuĭh rnoi  mpôl đê̆  ta nkuâl  Ba Chẽ mâp âk jêr jŏt tâm nău rêh tâm ban kơt năl di ntŭk gŭ khlay, hun hao săk jăn yor âk nău mĭn rluk mâl, nău way ơm nchâp đă. Nô nău gŭ sai  ơm, tâm  lah tâm janh rnăk wâl, sâm brôi bu ur uănh khlay bu klô, ndrel ăp nău way ơm bên tâm nău rêh khuch tât ntŭk gŭ rêh n’hanh mât chăm n’hâm suan bah nuĭh ƀon  lan…nău an ƀư “rgâl nău mĭn, nău kan” gay rgop jut bah sâm brôi bu ur n’hanh nchâp đă tĭng tâm rnăk wâl n’hanh ƀon lan ta Ba Chẽ mâp ăp nău jêr jŏt đŏng.

Bah năp ăp nău jêr jŏt mha êng, Hội Liên hiệp bu ur nkuâl Ba Chẽ dôl rgum droh rklaih gay tĭng kơn rgâl nău mĭn bah nuĭh ƀon  lan. Ngoăy tâm ăp nău kan na nê̆, nê lah an ƀư ăp trong nkra rgum tơm tĭng ƀư rgâl mhe tĭng trong rƀŏng. Nkoch trêng jru hvi tât tĭng thôn ƀon, rgŏ jă jru tât tĭng rnăk wâl. Nkre đah n’hao săk tam sinh hoạt rmôt way ơm đah mpôl kan rgâl mhe ăp rơh sinh hoạt way nkô̆ mpeh tĭng ƀư tâm ban bu ur bu klô. Nău sinh hoạt dja tĭng trong ƀư: Tâm rlong tĭng bôk nkô̆; ƀư ăp nău kan  tâm nđŭr văn hóa, njroh mprơ, thể dục thể thao đah ăp chi hội; N’hao dăng pah kan mpôl ta ăp rơh sinh hoạt. Njêng ăp câu lạc bộ tĭng nău ŭch, nău mpŏng geh bah hội viên. Ăp rơh nkoch bri way ơm, sinh hoạt ntil mhe lĕ ma ur sai ndrel râng. Wa Phạm Thị Thùy Trang an gĭt tay:

Nkre, mpôl hên ndrel hăn, ntop kơl oh yuh tâm hun hao wăng sa nsan hao klaih rlău ach o jŏ jong. Bah meng nău ntik n’hao nuih n’hâm tâm yô̆ tâm kơl, rgŏ jă ăp trong leo kơl bu ur ach o, jêr jŏt, n’hao nău geh wăng sa an bu ur. Lơn lah, mpôl hên rgum n’hao nău gĭt blău, nău dơi,  tĭng kơn đăp mpăn geh nău tât râng tâm ban đah bu ur n’hanh bu klô tâm trong hăn nti ren. Đăp mpăn geh tâm ban bu ur bu klô tât dơi n’hanh geh dŏng ăp ntŭk rhŏ dŏng mât chăm n’hâm suan deh nse, đă deh đêt kon.

Bah meng pah kan ntrôl dăng nău kan ntĭm nti, nkoch trêng, Hội liên hiệp bu ur nkuâl Ba Chẽ hŏ rdâk njêng 13 CLB bu ur đah pháp luật, 13 Chi hội n’gâng tơm tĭng ƀư n’hanh dŏng jăp pháp luật; mât n’hanh pơk hvi uĕh 8 câu lạc bộ mât nti kon jăp uĕh, 07 CLB nău khlay bah me đah mât chăm n’hâm suan deh nse n’hanh ƀư me đăp mpăn, 08 trong ntĭt leo “Ntŭk tât joi nsing nơm” ta ƀon lan, tĭng ƀư trong njrăng n’gang tâm  lah tâm janh rnăk wâl ta ntŭk ƀon  lan gŭ, 07 trong ntĭt leo “rdâk njêng rnăk 5 mô 3 kloh”, 20 trong ntĭt leo “ntŭk chrat ang 3 kloh”.

Lơn lah ntop kơl bu ur n’hao săk geh nău rêh drăp ndơ n’hanh nuih n’hâm, Hội hŏ rgŏ jă, ntoh măt 01 câu lạc bộ “Njroh mprơ n’hanh mât ndray rup uĕh ndơ nsoh rnoi Dao Thanh Phán”, 08 Câu lạc bộ pah play, 60/66 câu lạc bộ dân vũ thể thao n’hanh aơ lah ngoăy tâm ăp câu lạc bộ wăch rgum âk mpưm bu ur, âk nuĭh,  rnoh năm deh râng nsĭt tay rnoh khlay mpeh nuih n’hâm, suan têh dăng an ăp hội viên. Mô dơn nê, oh yuh râng câu lạc bộ dân vũ hôm dơi geh nău n’grŏ tĭng, nta geh mpeh mông nar. Nău kan rnăk wâl bah sai sai đŏng. Đah nău mĭn, trong uănh năl di, mô hôm geh trong uănh saơ ta năp măt dơm, geh nău mĭn sâm brôi đah bu ur rnôk râng ăp ntil thể thao têh mhe, khuh n’gôr.

He mbra saơ, nkuâl Ba Chẽ hŏ dŭt geh nău dơi tâm nău an ƀư ăp nău kan ntop kơl bu ur, rgop n’hao săk geh nău  rêh n’hanh ntrŭt ntrôl tâm  ban  bu ur bu klô ta nkuâl. Aơ lah trong ntĭt leo dŭt di ma kơt nti n’hanh pơk hvi./.