VOV4.M’nông: Rnôk bah năp, ndrel đah n’gâng kan ƀon lan n’hanh nău kan dơi kan, ăp rmôt kan chroh rƀŭn ta n’gor Dak Lak lĕ geh âk nău ƀư ngăn ngên, tâm pă jêr jŏt đah kônh wa nkual geh khuch yor chôt srê Covid-19. Tâm rơh srê tal 4 aơ, Mpôl ntoh măt Tin Lành n’gor Dak Lak lĕ an bơi 5.500 nklâm ndơ tât đah kônh wa nkual srê, đah dĭng lĕ rlău 1 rmen 500 rkeh prăk. Ndrel đah nĕ, Ủy ban y tế-xã hội bah Hội Thánh Tin Lành Việt Nam Miền Nam ntop kơl ăp rnăk geh F0 n’hanh F1 ta n’gor Dak lak ăp nklâm ndơ, đah dĭng lĕ 700 rkeh prăk.

          Rnôk bah năp, âk ndeh rdêng ndơ djôt ăp ndơ ŭch rŏng bah rmôt pah kan nău rêh jêng-Mpôl ntoh măt Tin Lành n’gor Dak Lak lĕ tât đah kônh wa nkual nkhah êng, nkual nchoeng n’gang yor Covid-19, an tât ty nuĭh ƀon lan ta 26 thôn-ƀon ta lam n’gor Dak Lak. Nĕ lah ăp nkual ƀon lan ngăn ngên jêr jŏt yor ƀư tĭng tâm ƀah gay njrăng n’gang n’gang chôt srê Covid-19.

Xă Cư Né, nkuăl Krông Buk, lah ngoăy tâm âk ntŭk srê têh ta Dak Lak tâm khay bah năp, Tâm nĕ, ăp rnăk ta ăp ƀon kơt Đrao, Buôn Dhiă, Buôn Mui, Buôn Kdrô geh nchăng n’gang gay njrăng srê. Ta aơ, bah meng nău ntop kơl bah ăp rmôt nsum mpôl ta ntŭk, kônh wa hôm dơi rmôt pah kan nău rêh jêng Mpôl ntoh măt Tin Lành n’gor Dak Lak lĕ jao an bơi 1465 nklâm ndơ. Kơp dơn nău ƀư geh nkô̆ nău aơ, wa Y Hiệp Êban-Bí thư Đảng ủy xă Cư Né an gĭt: Nău rêh bah kônh wa lĕ jêr jŏt, aƀaơ srê lơ jêr jŏt lơn, nău ntop kơl, tâm pă bah ăp nuĭh lŏng bôk tôr dŭt khlay ngăn:

          “Xă Cư Né mpôl hên dŭt rhơn yor dơi nău kơl bah ăp kon chroh. Lơn lah rmôt Tin Lành n’gor Dak Lak lĕ kơl ƀon lan mpôl hên ăp ndơ geh nkô̆ nău, gay kơl kônh wa, ndơ đêt nuih n’hâm têh, yô̆ nuĭh kơt săk nơm. Gâp ndơn măt an Đảng bộ lah uĕh ăp rmôt kan âk ngăn, lơn lah rmôt Tin Lành n’gor Dak Lak”.

Rmôt pah kan rêh jêng kon nuĭh bah Mpôl ntoh măt Tin Lành Dak Lak an ndơ ta UBND xă Cư Né, nkuăl Krông Buk

          Khay 8 mhe rlău, jêh rnôk tes ngăch ta xă lĕ geh âk nuĭh ntưp đah Sars-CoV-2, lam xă Cư Bao, nkual têh Buôn Hồ, n’gor Dak Lak an nchoeng n’gang, ƀư tĭng rjăp ntĭm đă 16 bah Thủ tướng Chính phủ. Mô knŭng jêr jŏt đah phe ba-ndơ sa an nuĭh, ma ndơ sa an ndrôk rpu-kik djar jêng khar mpêt đŏng. Ta năp nu nău nĕ, n’gâng kan ƀon lan, ăp rmôt kan nsum mpôl n’hanh ăp nuĭh lŏng bôk tôr lĕ ndăn ntop kơl ngăch. wa Y Ban Ayun, Kruanh thôn Buôn Krum A, xă Cư Bao, nkual têh Buôn Hồ an gĭt:

          “Gâp dŭt răm yor ăp nuŏh lŏng bôk tôr lĕ an ăp ndơ an kônh wa. Tâm nar srê mhe rlău geh tay ndơ sông sa dŏng tâm nău rêh kơt mì tôm, phe, sĭk... Lah uĕh mpôl ntoh măt lĕ njuăl ăp ndơ; săk gâp nơm dŭt răm n’hanh kônh wa tâm ƀon răm ngăn đŏng”.

          Wât kloh nău ntrŭnh “Njrăng n’gang srê kơt njrăng n’gang rlăng” bah Chính phủ, đah nuih n’hâm tâm yô̆ tâm kơl, kon chroh Tin Lành ta Dak Lak ƀư lĕ nău kan bah nơm đah nsum mpôl, kon nuĭh. Bôl ndơ n’hanh nuih n’hâm, nuĭh rgop phe, biăp, bum, play, nuĭh rgop prăk gay ntop kơl kônh wa geh khuch yor srê Covid-19 rlet rlău jêr jŏt. Yuh H’Oanh Aun (rnoi Êđê) ta ƀon Jung, xă Ea Yông, nkuăl Krông Pách geh nău mĭn lah, ndrel ty ndrel ngih dak tâm nău njrăng n’gang srê Covid-19 lah nău “an rlău ma dơn tay”.

Nuĭh ƀon lan ta Buôn Jung, xă Ea Yông, nkuăl Krông Pách nklâm ăp ndơ

          “Ndrel soan đah ngih dak, tâm nău kơl kônh wa mâp jêr jŏt khuch yor srê Covid-19, Buôn Jung mpôl hên kuăl jă kônh wa kon chroh tâm rgop soan, phe, mì tôm, prăk gay kơl kônh wa dôl mâp jêr jŏt yor Covid-19. Mpôl hên ƀư tĭng nău kuăl jă bah n’gâng kan ndrel njrăng n’gang Covid-19. Rnôk hăn an ăp nklâm ndơ mpôl hên ƀư tĭng tŏng ăp trong njrăng n’gang săk nơm, rnăk wâl n’hanh nuĭh êng”.

          Mục sư Lemous Philemol-Kruanh Mpôl ntoh măt Tin Lành n’gor Dak Lak an gĭt: Bah rnôk srê Covid-19 ntoh tal 4 ta Dak Lak, rmôt pah kan nău rêh jêng kon nuĭh bah Mpôl ntoh măt Tin Lành n’gor Dak Lak lĕ an bơi 5.500 nklâm ndơ, du nklâm geh: phe, du thùng mì tôm, dak mắm, dak ngi, sĭk prăk 200-300 rbăn prăk. Dĭng lĕ khlay rlău 1,5 rmen prăk. Rlău ma ăp ndơ an lĕ rngôch nuĭh ƀon lan nkual srê, Mpôl ntoh măt Tin Lành n’gor Dak Lak lĕ an ndơ bah Ủy ban y tế-xã hội bah Hội Thánh Tin Lành Việt Nam miền Nam an ăp rnăk chroh lah F0, F1 ta n’gor Dak Lak.

Mpôl ntoh măt Tin lành n’gor Dak Lak an ndơ ta xă Cư Êbur, Buôn Ma Thuột

Dĭng lĕ ăp nklâm ndơ an ăp F0 n’hanh F1 ta Dak Lak tâm nar bah năp lah 700 rkeh prăk, geh phe n’hanh prăk măt. Rlău ma nĕ, Mpôl ntoh măt Tin Lành n’gor Dak Lak ƀư rmôt nai dak si mbơh ntĭm săk soan online an ăp nuĭh geh nău ŭch gĭt tay mpeh Covid-19, trong mât săm săk nơm rnôk mô lap jêng F0 mô lah F1, F2.... Mục Sư Lemous Philemol an gĭt:

          “Tâm rnôk chôt srê Covid-19, ngăn lah tâm srê têh rơh tal 4 aơ lĕ rêng ngăch ăp ntŭk ta lam dak. Khuch âk ntil nău rêh jêng. Ăp kon chroh ăp ntŭk joi trong chop khâl ntrŭt đă, ntop kơl ndoh ndơ. Geh âk bôk nău kan kơl an geh nkô̆ ndrel ty gay njrăng n’gang srê. Gâp uănh saơ ăp nuĭh kơl lah ăp nai dak si, cán bộ, tahen mô lah ăp oh bu ur rgum ndơ kơl kônh wa nkual srê. Nău rŏng lĕ ƀư âk nuĭh răm tâm yan srê aơ. Mpôl hên rgop du gâl jêt gay tâm pă nău ŭch rŏng ndrel”.

Mpôl ntoh măt Tin lành n’gor Dak Lak an ndơ ta xă Cư Êbur, Buôn Ma Thuột

          Ndrel đah nău ƀư kơl kan, kơl kônh wa nkual srê rlet rlău jêr jŏt, nar bah năp, Mpôl ntoh măt Tin Lành n’gor Dak Lak nkah mro ăp Chi hội Tin Lành ta ntŭk ƀư tĭng rjăp nău đă 5K bah N’gâng kan dak si n’hanh ăp trong njrăng n’gang srê Covid-19. Ăp nău ƀư chroh rƀŭn dơi ƀư trực tuyến. Ăp mục sư, kruanh ntŭk rƀŭn nkah kônh wa kon chroh mô rgum âk nuĭh, lơn lah mô ƀư ăp nău ngêt sa, nsong nsao. Ăp nău ƀư geh nkô̆ ngăn bah Mpôl ntoh măt Tin Lành n’gor Dak Lak lĕ rgop soan rêng hvi nuih n’hâm yô̆ rŏng, ndrel ty njrăng n’gang srê Covid-19.

          Nuĭh rblang: Y Sưng Phê Ja