VOV4.M’nông: Tâm rơh rŭn soan njrăng n’gang srê Covid-19 ta n’gor Dak Lak, geh mô đêt y, nai dak si, nuĭh pah kan dak si jêng F0, geh nău mô lap, klach kơt âk nuĭh ji Covid-19 êng. Yơn đah nuih n’hâm bah nuĭh nai dak si, khân pơng nsơr soan ta ntŭk bôk năp njrăng n’gang srê. Mô hôm nchâp đă tâm kho ao nkhah êng, mô hôm rvê geh ntưp, khân pơng dah ŭch tât đah nuĭh ji ăp mông, tâm ăp mnĭt bah nău rêh tâm jrô nuĭh ji.

Dơn sam ƀŭt jêh uănh năl ntưp đah SARS-CoV-2, hộ lý H’Lịch Kbuôr, deh năm 1989, ta ƀon Drao, xă Cư Né, nkuăl Krông Búk, mô bah rvê. Pah kan tâm nkual săm ji Covid-19 ta Ngih dak si nkuăl, na nao mâp nuĭh ji, yuh H’Lịch mô dơi nkah gĭt nơm geh ntưp ji bah moh nuĭh n’hanh moh nar. Mô geh âk mông nar gay rvê, H’Lịch ndăn ăp rnôk săk soan hôm e ngăch, lăp tay tâm nău kan ăp nar bah nơm lah mât uănh an ăp nuĭh ji:

“Lah nsum rnôk lăp pah kan ta nkual săm ji aơ ri săk gâp mâp âk đah nuĭh ji ntưp Covid-19, jêng gâp ntưp dâl. Yor nău kan bah gâp lah ăp nar mât uănh an nuĭh ji, gâp uănh nuĭh ji kơt lah nuĭh jay bah gâp dơm, nsrôih mât uănh uĕh ngăn an khân pơng, yor aơ lah nău kan bah gâp nơm”.

Ăp nai dak si mât chăm an nuĭh ji Covid-19 mbăn

Kơt nuĭh kan ndrel bah gâp, hộ lý H’Biên Niê, deh năm 1990, ta phường Đặt Hiếu, nkual têh Buôn Hồ jêng F0 jêh âk khay mât chăm nuĭh ji Covid-19. Ăp nar bôk năp ntưp ji, ăp nău ji geh, ŏk r’ah, jêr nsôr lơh ƀư yuh lơ wât nău rvê bah ăp nuĭh ji. Yor rĭ, ăp rnôk săk soan tâm nău ât rdâng, hộ lý H’Biên lŏ râng ntop kơl mât chăm an ăp nuĭh F0 ndrel jrô săm. Yuh nkoch đah khân pơng nău nơm geh ji gay nkoch tay nău nsrôih, nău tâm ban kơl khân pơng răm m’ak gay rdâng n’hanh lơh dăng kop ji. Hộ lý H’Biên nkoch:

“Rnôk lăp nkual săm ji Covid mpôl hên rvê đŏng, mpôl hên ƀư tĭng uĕh 5k, rnôk uănh saơ ăp nuĭh ji mbăn nsôr đah măy, rnôk nĕ mpôl hên mô rvê tay mô uănh tât săk nơm tay ma mpôl hên nsrôih mât chăm an nuĭh ji, nsrôih kơl khâl pơng rlet rlău kop ji. Đah kon se oh jêt, nkah gĭt me bơ̆ ri mpôl hên ntĭm đă, nkoch bri n’hanh an bănh kĕo, dak toh an ăp mon, gay ăp mon mô klach rvê, đăp mpăn an ăp nai dak si săm ji”.

Mâp êp đah ăp nuĭh ji, klach ntưp lah jêr dêr tâm rnôk pah kan

Uănh saơ oh, nô, băl kan ndrel bah nơm ntưp ji, nai dak si Trần Thuận, Kruanh Ngih dak si nkuăl Krông Búk lĕ dŭt rngot. Pơng an gĭt: kơp bah rnôk ngih dak si nkuăl dơi jao an nău săm ji Covid-19 âk gưl an 4 nkuăl mpeh bah lơ n’gor Dak Lak, Ngih dak ji lĕ wơt dơn săm rlău 1.700 nuĭh ji. Rnôk âk nuĭh, geh nar ngih dak si an săm rlău 300 nuĭh, nău aơ ƀư âk ir an ngih dak si rnôk nuĭh pah kan dak si đêt. Rnoh nău kan âk jêng nău geh ntưp an nuĭh pah kan dak si lah jêr dơi dêr. Yơn lah, nuih n’hâm bah ăp nai dak si ta aơ dŭt nâp nâl, rlet rlău nău kop ji, rdâng lơh tay yor nuĭh ji bah he:

“Nuĭh ji bôk năp ri oh nô geh klach ri kruanh ndrel đah ăp rmôt nsum mpôl nơm ngăch ntrŭt đă ri tâm du nar khân pơng đăp mpăn dâl, geh nuĭh kan ji đêt, tâm ăp nar dơi oi khân pơng dăn hăn kan n’hanh khân pơng ton mbra ƀư tay jêng nău aơ he saơ nău răm đah khân pơng. Dŭt lah rhơn lah oh nô khân pơng mĭn kloh nău hôm ăp nău kơl ri oh nô khân pơng mĭn tât, lĕ rngôch ntŭk kan nsrôih rlet rlău chôt srê têh aơ”.

Đah nuĭh ji Covid-19 lah kon se, rlău ma nău săm, ăp y nai dak si lah nuĭh băl gay njŭng ăp oh

Lôch năm 2021, n’gor Dak Lak lĕ kơp dơn rlău 11 rbăn nuĭh ji Covid-19, tâm nĕ geh rlău 50 y, nai dak si n’hanh nuĭh kan dak si geh ntưp ji tâm rnôk pah kan. Hôm rnoh ntưp rnôk kan ntŭk bôk năp lah mô jêt, lah di rnoh jêr jŏt bah chôt srê ta n’gor, an saơ nău nsơr săk mô klach rvê bah rmôt nai dak si tâm trong kan njrăng n’gang srê Covid-19. Wa Nay Phi La, Kruanh N’gâng kan dak si n’gor Dak Lak an gĭt, rơh njrăng n’gang srê Covid-19 ta n’gor hôm e jŏ jong. Ăp nai dak si, cán bộ dak si ta Dak Lak mbra hôm e rlet rlău âk jêr jŏt. Ăp gưl n’gâng kan nău kan, kruanh nău kan dak si n’hanh ăp nuĭh ƀon lan wât n’hanh dŭt n’hâm khlay. Wa Nay Phi La nsing nơm, ăp rmôt kan rêh jêng mbra geh nău nkoch ngăn ngên, ndrel ăp nai dak si ntrôl rŭch chôt srê.

Nuĭh pah kan dak si pă dak si an ăp nuĭh ji Covid-19 săm ta jay dăp tal 1 n’hanh tal 2

“Ta aơ an kơp dơn nău  nsơr soan chuêl săk nơm lĕ rngôch yor nuĭh ji. Ndơn măt an nău kan dak si kơp dơn nău rgop săk soan bah lĕ rngôch nuĭh kan dak si tâm trong kan njrăng n’gang chôt srê bah n’gor. Bah meng nĕ nău kan dak si kuăl jă, rgŏ jă ăp rmôt kan nsum mpôl kơt ăp ngih pah kan kơl an nuĭh kan dak si đah âk trong dơi chop khâl, mô lah ntop kơl êng năp rwăt ndoh ndơ n’hanh ŭch ngăn nău tâm yô̆, hăn ndrel bah nuĭh ƀon lan đah nău kan dak si”.

Ăp F0 ntŭk bôk năp njrăng n’gang srê lah ăp nuĭh nkao uĕh, nău nkoch trêng đah nuih n’hâm nsơr soan, mpeh nău kan đah nuĭh ji, nkoch trêng nău nsing nơm gay rlet rlău nău njê, ntop kơl soan gay ndrel hăn rlău ăp nar jêr jŏt bah chôt srê./.

                    Nuĭh rblang: Y Sưng Phê Ja