VOV4.M’nông: Tâm rơh srê Covid-19 tal 4, hŏ geh ma rhiăng cán ƀộ nai dak si hăn kơl an ân ăp n’gor geh srê mpeh ba dâng. “Bah srê mơ sĭt” lah nau lah rjăp bah cán bôk nai dak si tâm rơh lơh rdâng ma srê rnôk hăn tâm ntŭk tâm lơh mô nteh phao. Phóng viên Radio Việt Nam hŏ nchih nkoch nau mĭn bah ăp cán bộ, nai dak si bah năp mông hăn kơl an mpeh ba dâng kơl an ngih dak si tâm nkuăl ƀon têh Hồ Chí Minh.

100 nai dak si, nŭih pah kan, nŭih tă bah Học viện Quân y, nŭih tă bah Ngih dak si Quân y 103 ndrel Viện Y học cổ truyền Quân đội, ntơm bah ôi ơm hŏ tât tâm ntŭk rgum tâm Lữ đoàn vận tải 971 Sóc Sơn gay ma nchrăp hăn. Ăp nŭih ndrel du ntil ndơ kơl an tâm nau kan, du mlâm ƀa lô tâm săk, nê lah ndơ ma khân păng leo hăn kơl njrăng rdâng srê.

Lor ma hăn tât ăp n’gor mpeh ba dâng ƀư nau kan, ăp nŭih khân păng knŭng năl kuăl điện thoại ân ma rnăk vâl ngăch, gleh dơm. Yor nau kan ndal rnôk n’gul măng êp ang ôi nar ba kơi lah hăn tât nkuăl ƀon têh Hồ Chí Minh, ăp cán bộ nai dak si knŭng năn nchrăp ndơ ơm dôl geh, mô năn veh ngih nơm. Ngăn kơt lah thiếu tá Nguyễn Thị Kiên-Ngih dak si Quân y ê năn mbơh ma rnăk vâl păng ơm:

‘Sai gâp ê gĭt ơm ê, yor lah gâp ndơn nau bu đă hăn kan tâm bri măng, gâp ê năn mbơh, sai gâp hăn pah kan hôm, sai gâp pah kŏ hăn pah kan tâm rmôt tahen công an”.

Rơh hăn kan ndal aơ nklăp lah 15 nar mô lah rlau ma nê đŏng, mô geh nŭih ôp ntă jŏ dĭng hăn sĭt ôh, yor rnoh nŭih ji hôm âk ơm, ndrel nŭih nsum ma nơm bah năp nê hôm kơl săm nŭih tâm ăp ngih dak si âk pơh ma hôm mâp âk nau jêr, ndrel mih, nar mô ueh, yơn bu hôm nsôih gay ma jut jăng lơi srê. Ndrel khân păng gĭt, hŏ nsoh tâm săk nơm 2 màu ao nê tahen, nai dak si ri ăp rnôk tât geh bah srê ji, rlau ma rnôk êng lah rnôk ma ƀon lan ŭch, neh dak ŭch khân păng. Tâm nau mĭn ŭch ngăch tât tâm nkuăl geh srê. Đại uý, nai dak si Đặng Văn Ba, khoa hồi sức nội, Ngih dak si Quân y 103 nkoch:

‘Saơ tâm ăp ntŭk bu nkoch mbơh nau, ndrel ăp nŭih pah kan nsum ma nơm tâm nê mbơh lah nroh nŭih ji F0, ngăn lah rnoh nŭih F0 ji jâk jru ri âk ngăn, săk gâp kŏ duh nuih đŏng, ŭch geh lăp tâm nê gay ma kơl an ân oh nô nai dak si, dŭm âk nơm geh nau kơl ri ueh dŭm nê”.

Gĭt kloh aơ lah nau kan tâm lơh tâm rnôk nau rêh đăp mpăn, kơp n’ăp ma học viên mom kơt Trung sỹ, Phạm Công Kim, nti tâm Học viện Quân y kŏ mra kơl leo n’hâm nơm ndrel uănh aơ lah nau kan rnôk geh leo kơl an ngih dak si tâm nkaưl ƀon têh Hồ Chí Minh:

“Phung hên geh ntĭm nti tâm 3 tŏ hôm, ntĭm nti mpeh nau blau nau sŏk mham kơt lah nchuăt uănh mẫu xét nghiệm, phung hên kơl an mpeh trong xét nghiệm ân nau njrăng rdâng srê, ndrel ma nau kan kơl an êng êng lah nau ma hên ƀư”.

Lơ ba kơi nơm lah ur, lah sai, lah kon, lah me mbŏ ranh, yơn lah ăp nŭih nê mro ryơk, mro gĭt kloh nau kan bah tahen, gay ma ƀư kơl an nau kan ân mpeh ba lơ ngăn dôl ma gŭ kâp tât nŭih bah rnăk nơm. Rnơm ăp tahen kơt nê, geh nau nsôih ngăn kơt nê hăn kơl an bol ma hôm ơm âk nau rngot nsôih. Ngăn lah đah ăp rnăk vâl lĕ bar hê ur sai kŏ pah kan tâm rmôt ân geh hăn kơl an ntŭk bôk năp. Điều dưỡng quân y Nguyễn Thị Kiên, nkoch:

“Du hê kon nti jrâu 10, du hê nti jrâu 4 yơn lah me mbŏ ri hăn kan măng đŏng, sai gâp rnôk aơ dôl tâm ntŭk bu nkhah rsang nŭih, nau kan lah mât njrăng tâm ntŭk bu nkhah srang ri bar hê kon gâp geh mbơh ntĭm tă bah jŏ, ri ma mơng đah nau ma mô geh me mbŏ tâm ngih ri ma kon gâp bar hê tâm ntĭm, tâm jă ntĭm nti, ngêt sa”.

Tâm kơt ma nê, Thiếu tá-nai dak si Đỗ Mai Phương kŏ nchlơi bar hê kon jê̆ tâm ngih, tâm mât tâm chăm êng, hôm Me ri hăn tâm mpeh Nam gay ma njrăng rdâng srê ri ma mô geh nau rvê âk ôh:

‘Bar hê oh nô tâm ngih ri tâm răk rong êng, gâp uănh năl nau kan bah nơm lah nau hăn kan nsum nti, rgop n’hâm rdâng srê ma kônh wa mpeh ba dâng, năl aơ lah nau kan ngăn, mô geh nau ma hôm rvê đŏng ôh”.

Kơt tĭng nau vay ueh ơm, nau nsôih bah tahen janh dăng, đah nuih n’hâm dĭng lĕ kơl an kônh wa mpeh ba dâng dak mham bah nơm, đah nau kan “rdâng srê kơt rdâng phung rlăng”, lơh ân rjăp, ân nâp, ŭch nơm ân geh nau nsôih âk lơn, mra ndơn nau kan ndrel ƀư jêh nau kan. bah năp nê, Tahen Biên phòng hŏ rđau ntŭk kan, rmôt kan ntrŭnh nau ndâk 7 ngih dak si mhe ntrơn tâm ăp n’gor, nkuăl ƀon têh mpeh ba dâng, tŏng dơi nau ndơn săm 3.500 nŭih ji ndrel mra pơk hvi, tŏng dơi ndơn tât 10 rbăn nŭih ji.

Nau tâm ntĭng bah ăp tahen, nai dak si kŏ geh êng đŏng, mô geh băl mpôl, knŭng geh nŭih nsum nau kan bah nơm tâm nhŭp ty bah năp nau rvê mpeh nŭih ji dôl ma kâp nơm. Khân păng hăn trong gay ma ntop kơl ma rhiăng cán bộ, nau dak si tahen dôl tâm 7 ngih dak si mhe ndâk ntrơn săm tâm nkuăl geh srê bah nkuăl mpeh ba dâng, ntŭk ma dôl săm ân ma rbăn nŭih ji ntưp srê Covid-19 đah nau nsôih mât nau rêh, n’hâm soan ƀon lan, yor du nar ôi taơ mô hôm geh srê./.

Nŭih rblang: H’Thi