VOV4.M’nông: Ta rơh rƀŭn Ƀan ntĭm rđău ngih dak njrăng n’gang srê Covid-19 mhe ƀư dŭt pơh bah năp, Groi Thủ tướng Vũ Đức Đam đă ăp ntŭk an mbơh ƀư trong mbơh nău ndal, ăp rmôt dak si ntŭk gŭ rêh tât ăp nkual ƀon lan gŭ gay wơt dơn, groi nđôi, ntop kơl dak si an ăp nuĭh ƀon lan geh nău ntôn ntưp Covid-19 n’hanh ăp nău săk soan êng.

          Tât aƀaơ, kaman rgâl mhe Gamma lĕ kơl dơn ta 81 dak n’hanh kaman rgâl mhe Delta ta 142 dak n’hanh nkual neh. N’gâng kan dak si uănh lah, đah kaman Delta, srê dôl geh jêr jŏt, ntoh ngăch, ntưp ngăch n’hanh khĭt âk ta âk dak ta lam ntŭr neh, ngăn lah ta nkual Đông Nam Á. Ta Việt Nam, rơh ntoh srê tal 4 aơ, lam dak kơp dơn rlău 243 rbăn, tâm nĕ, ta nkual ƀon lan têh HCM kơp dơn rlău 137 rbăn nuĭh ntưp. N’gâng kan dak si năl lah: srê geh jŏ jong, ngăn lah ta nkual ƀon têh HCM n’hanh ăp n’gor mpeh bah dâng. Du đêt n’gor geh ntoh srê plơ̆ tay, ntêt nkri tât săk soan, nău rêh nuĭh ƀon lan, ƀư khuch têt tât hun hao wăng sa-rêh jêng.

          Nău blău ơm bah nkual ƀon têh HCM n’hanh ăp n’gor mpeh bah dâng an saơ, nkô| nău bah ntưp ngăch bâh srê lah ƀư tĭng mô rjăp tâm ƀah kon nuĭh tĭng ntĭm đă 16; du đêt ntŭk kan, doanh nghiệp n’hanh du gâl nuĭh ƀon lan hôm e thơ tha, mô njrăng, hôm e tâm nđŭr tâm mâp nsum, mô ƀư tâm nkhah đah jay n’hanh jay tâm nkual nchoeng n’gang. Nău mbơh tay mpeh trong kan uănh năl mham, Kruanh n’gâng kan dak si Nguyễn Thanh Long an gĭt:

          “Nău way saơ lơ ơm mbra dơi n’hŭch, nkhah êng dơi hŭch ntŭk ntưp, kơt uănh năl mham ta ăp ntŭk, trung ương ntĭm nău way, ta ƀon lan lĕ geh nuĭh gay đah ƀon lan ndâk njêng uănh năl tâm di lĕ rngôch ăp nău đă. Nău way an saơ F0 luh ntŭk gŭ rêh, kơt nĕ mư n’hŭch ntưp tâm ntŭk gŭ rêh”.

Rmôt kan dak si geh ăp y, nai dak si, nai ntĭm nti, sinh viên y khoa… nuĭh kơl kan bah mpeh Bắc mhe mpăr tât ntop kơl nkual ƀon têh HCM njrăng n’gang srê Covid-19.

          Ta rơh rƀŭn, ăp nuĭh Ƀan ntĭm rđău, lah rjăp nău blău ơm têh ngăn ta ăp ntŭk an saơ lor lah an mât njrăng nâp nâl “nkual pơk trong”, nkual đăp mpăn, nkre nchoeng n’gang, rgum jêt nău geh âk, dŭt âk; ƀư tĭng nkhah êng kon nuĭh tĭng ntĭm đă 16, ăp ntŭk an mât uĕh nău ƀư tơm bah ăp rmôt kan, nsum mpôl, Rmôt Covid-19 ntŭk gŭ rêh, lĕ rngôch nuĭh ƀon lan, n’gâng tơm lah rmôt công an, gay “hăn tĭng trong, tĭng jay, tĭng nuĭh”, gĭt lĕ rngôch ăp nuĭh bah ntŭk êng tât, rmal rjăp ăp nuĭh mô mbơh săk soan mô lah mô mbơh ngăn. Tĭng Groi Thủ tướng Vũ Đức Đam rnôk lĕ ƀư nkhah êng kon nuĭh an đăp mpăn di nuih n’hâm “Nuĭh ntŭk gŭ ri gŭ ta nĕ”. Đah trong kan uănh năl mhe, geh nu nău du đêt ntŭk dŏng âk ir uănh năl ngăch, klach uănh năl RT-PCR, yor nê, Groi Thủ tướng đă trong kan uănh năl an ƀư rjăp, dŭt khlay, đăp mpăn khoa học, săk rnglăy. Ăp ntŭk an rgum nuĭh âk lơn an ăp gưl săm ta bah dâng gay săm ngăch, mkra ngăch ăp nuĭh geh nu nău mbăn dŭt ngăch, geh tŏng ăp nuĭh kan, dak si, oxy, ndoh ndơ tĭng nău ntrŭnh gay đăp mpăn rnoh nsưng săm ji. Groi Thủ tướng Vũ Đức Đam lah rjăp:

          “Ăp ntŭk an ndâk njêng dâl trong mbơh nău ndal, ăp rmôt dak si nsum mpôl tât ăp nkual ƀon lan gŭ gay wơt dơn, groi nđôi, ntop kơl dak si ta ntŭk an ăp nuĭh ƀon lan geh ntôn nău ntưp Covid-19 kơt ăp nău săk soan êng ăp n’gor geh rmôt hăn kan an ƀư âk lơn, ăp ntŭk mĭn uănh n’ăp tâm nkhah ri mĭn rmôt jao ndơ, ma rmôt shiper  aƀaơ dŭt khlay ngăn, ăp n’gor aƀaơ an mĭn tât rmôt jao ndơ rlău ma uănh năl, chuh vaccine ri ndeh an năl săk dơi công an an uănh saơ nĕ lah di Shiper. Nău nĕ an nchrăp yor nĕ lah rhoăt nău blău ơm”.

          Tâm trong kan săm, Groi Thủ tướng Vũ Đức Đam an lah, nău blău ơm bah nkual ƀon têh HCM n’hanh du đêt n’gor mpeh bah dâng an saơ: an nkhah êng nkual wơt dơn bôk năp đah nuĭh ntưp Covid-19 mô geh nău ji, mô dơi uănh lah nuĭh ji, gay mât uănh tâm di đah ndơ sa kah, săk soan, nuih n’hâm, gay n’hŭch F0 geh nău ji.

          Ta năp nu nău srê dôl jêr jŏt, rnoh nuĭh ji Covid-19 mbăn geh trong hao âk, Kruanh n’gâng kan dak si Nguyễn Thanh Long lĕ ký sam ƀŭt njuăl ngăch ăp ntŭk kan mpeh tâm nău kan dak si mpeh nău n’hao ntĭm nti, tiăr nti gĭt blău săm ngăch, săm mbăn săk soan. Tĭng nĕ lĕ rngôch ăp ngih dak si nchih săk, ngăch ntĭm nti, tiăr nti n’hao dơi săm ngăch, săm nuĭh ji mbăn an ăp nai dak si. Bah năp nĕ, Kruanh n’gâng kan Nguyễn Thanh Long ký an bôk nău rgop an tâm nchră “N’hao dơi săm ji, săm ji mbăn an ăp ngih dak si săm nuĭh ji Covid-19 mbăn” ntĭm n’hanh ndâk njêng 12 ntŭk săm ji mbăn COVID-19 lam dak  têh bah 200-3000 nsưng ji săm nuĭh ji mbăn an ta ăp ngih dak si.

          Gay ntrŭt nsôr rmôt y-nai dak si-nuĭh kan ntop kơl an nkual ƀon têh HCM n’hanh ăp n’gor mpeh bah dâng njrăng n’gang srê Covid-19, Tổng Liên đoàn Lao động Việt Nam lĕ an nău ntrŭnh mpeh nău ntop kơl ndơ sa kah an rmôt nai dak si ntŭk bôk năp njrăng n’gang srê Covid-19. Tĭng nĕ, nuĭh dơn lah rmôt nai dak si, điều dưỡng, cán bộ dak si bah ăp ngih dak si Trung ương n’hanh sinh viên, nuĭh nti ăp ngih sam ƀŭt Y mpeh tâm n’gâng kan dak si (n’hanh ăp n’gor) dơi ntop hao ta 19 n’gor, nkual ƀon têh mpeh bah dâng dôl ƀư tĭng tâm gŭ srang kon nuĭh tĭng ntĭm đă 16. Rnoh ntop kơl đah ndơ khlay 1 rkeh prăk/du hê.

          Nuĭh rblang: Y Sưng Phê Ja