VOV4.M’nông: Gay pă đah ăp ƀon lan mâp nau jêr yor geh nau khuch bah srê Covid-19, Rmôt kan mom n’gor Dak Nông ƀư “ATM phe mô rpoh prăk” pă phe âk jêt tấn ân dơm ma kônh wa. Ăp ATM aơ dôl geh pơk hvi tâm ăp nkuăl geh nau khuch yor srê Covid-19 ta n’gor.

Mhe sŏk geh 3kg phe tă bah “ATM phe 0 đồng”, wa Trần Thị An, gŭ tâm Phường Nghĩa Tân, nkuăl ƀon têh Gia Nghĩa, n’gor Dak Nông mbơh, păng ƀon ta Cần Thơ. Nau rêh bah păng dôl ma mâp nau jêr ngăn, ma ƀon tơm Cần Thơ kŏ dôl ma geh srê, mô geh dơi kơl an. Nar aơ, tăng lah geh pă phe mô roh prăk ri păng tât ndơn:

“Tâm ƀon tơm gâp ri gâp hăn ta aơ hăn pah kan ân bu, jêh ri manh ngih gŭ, jêh ri hăn dônh nhôm nhựa, ma ăp nar aơ geh srê ri gâp mô dơi geh hăn tay ôh. Gâp rnơm ăp nŭih bu pă phe sa ri kŏ geh prăm prao nar, gâp dăn lah ueh âk ngăn”.

Tâm kơt ma nê, yuh H’Nhung, ta Ƀon Dak Nur, Phường Nghĩa Đức, nkuăl ƀon têh Gia Nghĩa mbơh, rnăk păng geh 8 nŭih. Yor geh khuch bah srê ri ma ăp nŭih mô dơi hăn kan. Êp nê, ăp ntil play kơt lah bơ, sầu riêng mô geh dơi tăch, ri ma nau rêh păng mâp nau jêr ngăn. Ndri ma, bol ma 3 kg phe tă bah “ATM 0 đồng” kŏ ƀư păng rhơn đŏng:

‘Rnăk hên ri ngăn lah ƀư lŏ, ƀư mir ndrel ăp ntil ndơ tơm tăm ri mô saơ geh khlay ôh, ƀư nau rêh ăp nar lơn ma mâp nau jêr ngăn. Rnơm ma nau kơl an bah Đảng, Ngih dak, ăp rmôt kan kơl an ngăn ri ntrŭnh ƀư nau kan “ATM phe 0 đồng” ri kơl an tâm nau rêh geh dnơ sa ăp nar, n’huch nau jêr ăp nar tâm nau mĭn joi prăk gay ma rvăt phe, nŭih ƀon lan hên rhơn ngăn”.

Đah nau kan “Ntŭk dôl gŭ ri gŭ nkre ta nê”, ntă dê mâp jêr ri tât sŏk “ATM phe 0 đồng” yor rmôt kan pah kan tăch rgâl mom n’gor Dak Nông ƀư jêh 4 nar rgŏ jă rgop geh rlau 6 tấn phe ân rlau 2000 tŏ nŭih geh nau rêh jêr jŏt tâm nkuăl ƀon têh Gia Nghĩa. Tĭng nô Nguyễn Ngọc Chín, Kruanh rmôt kan ƀư nau kan tăch rgâl mom bah n’gor Dak Nông, êng nau kan pă phe mô geh roh prăk tâm nkuăl ƀon têh Gia Nghĩa, ATM phe 0 đồng mra ƀư pă phe mô roh prăk ân kônh wa dôl mâp nau jêr tâm ăp nkuăl Dak Rlâp, Tuy Đức ndrel Dak Glong:

‘Uỷ ban hội hŏ bonh đă rgop geh 30 tấn phe geh rnoh 450 rkeh prăk gay ma pă tâm 4 ntŭk gay ma kơl an kônh wa dôl mâp nau jêr đăp mpăn nau rêh tâm yan dôl geh srê nuh. Êng 30 tấn phe aơ, nchrăp rlet rlau ma nau nchrăp bôk năp bah phung hên mra rgum tay 30 tấn tay gay ma rgop dĭng lĕ lah 60 tấn gay ma pă ân ăp rmôt geh kơl an”./.

Nŭih rblang: H’Thi