VOV4.M’nông: Gay đăp mpăn ân nŭih pah kan bah năp nau tât jêr bah srê Covid-19, Binh đoàn 15 hŏ bonh đă ntrong kan njrăng, rdâng srê đah nkô̆ nau “Njrăng rdâng srê kơt rdâng phung rlăng”. Êp nê, êng nau đăp mpăn nau kan ê nkra tăch rgâl mô geh nkol, rmôt kan hŏ kơl an, ƀư âk nau kơl nau rêh ƀon lan, nŭih pah kan.

Tât 11 mông dĭng nar ăp nar, ntŭk rgum rtăk cao su bah Đội 2, Công ty 72 (nkuăl Đức Cơ, n’gor Gia Lai) Binh đoàn 15 lŏ khuh nau gơm, ngơi bah ăp nŭih kor rtăk cao su sĭt. Khân păng rhơn yor du măng pah kan, rtăk cao su leo nsĭt âk ndrel ueh. Tâm rnôk ƀư, ăp nŭih kŏ mro mĭn nau kan put bok put mbung, mêt uănh nau duh n’ik săk jăn ndrel mât nau tâm nkhah srang ân tâm di rnôk jao rtăk, ăp nau mơng hŏ geh nchâp khân păng rnôk geh srê Covid-19 ntoh. Yuh Siu H’Yien, nŭih pah kan kor rtăk cao su đội 2, Công ty 72, nkuăl Đức Cơ, n’gor Gia Lai, Binh đoàn 15 nkoch:

‘Ta aơ ăp oh nô pah kan công nhân ƀư ueh ngăn nau kan njrăng rdâng srê, mô dơi geh hăn ro lă lêng ndrel pah kan mro mât nau tâm nkhah 2 mét, êng rnăk hên geh 6 nŭih ƀư pah kan ta aơ, yơn phung hên mro ƀư nau kan njrăng rdâng srê rnôk tâm ngih ndrel rnôk hăn pah kan”.

Tâm ăp ntŭk kan, ntŭk ê nkra rtăk cao su, Binh đoàn 15 mro mât nau kan ê nkra ân nâp tam đah nkô̆ nau đăp mpăn tâm nau ê nkra. Đah du ntŭk kan ê nkra, nau vay geh 25-30 nŭih pah kan, yơn rnôk aơ ri geh ntơm 10-15 nŭih pah kan tâm pleh gay ma njrăng rdâng srê. Công nhân, nŭih pah kan gŭ sa, rlu rlau nkre tâm ntŭk, đah nau geh đăp mpăn ueh. Thượng tá Phan Văn Phú, Groi Giám đốc Công ty 72, Binh đoàn 15 mbơh:

“Tâm rnôk rlau aơ ri ndrel ma rmôt kan tâm nkuăl, mât nâp đăp mpăn chính trị, đăp mpăn nau rêh jêng kon nŭih, rnă njrăng ƀon lan tâm nkuăl. Phung hên uănh aơ lah nau kan njrăng rdâng srê ân đăp mpăn tâm rmôt, nkre nchrăp rmôt nŭih kan, ndơ dŏng, nau kơl an ăp ntil tâm nau kan gay ma mât đăp mpăn nau leo kơl an ân ăp mrôt, ăp nkuăl, ăp ntŭk geh srê. Phung hên uănh năl tâm rơh tât lŏ mât ân nâp, đăp mpăn rmôt kan, nkuăl. Đăp mpăn nau ê nkra tăch rgâl ân geh nâp tam ndrel nâp nâl”.

Jêh rnôk n’gâng kan neh dak pă vắc xin njrăng rdâng srê Covid-19, Binh đoàn 15 hŏ ntrŭnh chuh du dĭng ân 100% cán bộ, tahen, nŭih pah kan. Gay nau kan chuh n’gang geh nau ueh, Binh đoàn 15 ndrel ăp rmôt kan ndâk njêng nau nchrăp, ƀư nau ntĭm nti ân cán bộ, nŭih pah kan dak si tât pah kan leo chuh vắc xin, kơp uănh, rklaih nau tât rnôk jêh chuh. Rnơm nê nau kan chuh n’gang bah rmôt kan geh ƀư ueh, khoa học, đăp mpăn. Yuh Lê Thị Liên, Đội 4, công ty 72 (nkuăl Đức Cơ, n’gor Gia Lai), Binh đoàn 15 mbơh:

‘Tâm rnôk nau tât bah srê nuh dôl ma tât jêr kơt rnôk aơ, oh nô pah kan công nhân bah phung hên rvê đŏng. Kơt gâp aơ lah công nhân thợ kor rtăk bah công ty 72 lah rmôt ƀư nau kan tâm nkuăl n’har bri, nkuăl jru, ngai, geh Ngâng kan neh dak, Binh đoàn, công ty pơk trong ân nô, yuh, oh phung hên chuh vắc xin ri rhơn ngăn, rnơm đŏng. Geh chuh vắc xin covid ri phung hên saơ đăp mpăn, nsôih ƀư jêh nau kan geh jao”.

Tâm 2 năm rlau aơ, Binh đoàn 15 hŏ ndâk nau kan tĭng “4 ta ntŭk” gay ma ƀư jêh nkô̆ nau bar ntil kan nkre ƀư ueh nau kan ê nkra tăch rgâl nkre tâm rgop nsum ma nau kan mât neh dak, rnă njrăng srê ân nâp tam. Tâm nê, Binh đoàn hôm uănh nau nkoch trêng lah nau njrăng rdâng nâp, rgop nau đăp mpăn ân rmôt kan ndrel nkuăl bah năp nau tât bah srê Covid-19. Ntơm bah nê ntrong ƀư nau kan dơi geh mât, ăp công nhân, nŭih pah kan geh kan pah ndrel geh prăk khay. Đại tá Lê Xuân Phương, Groi Tư lệnh Binh đoàn 15 mbơh:

‘Đăp mpăn nau rêh, ngăn lah prăk khay ân nŭih pah kan năn ngăn, đah nau geh nklăp 6-7 rkeh prăk. Nŭih pah kan ri đăp mpăn nau kan. Ngăn lah, rnôk nŭih cônh nhân đăp mpăn, rnơm tâm Binh đoàn ri pah kan njrăng srê ueh ngăn. Phung hên sŏk rmôt ƀư nau kan tuch tăm lah n’gâng tơm, rmôt kan ê nkra mât rgum kơt du ntŭk rgum jê̆, ƀư ueh ăp nau kan. Tât rnôk aơ, nau kan njrăng rdâng srê bah Binh đoàn đăp mpăn ueh ngăn ndrel nâp đŏng. Nau kan ê nkra tăch rgâl năm aơ phung hên năl lah mra geh ndrel rlet rlau nau nchrăp bah n’gâng kan neh dak jao ân Binh đoàn 15”./.

                        Nŭih rblang: H’Thi