VOV4.M’nông: Tâm rnôk nkuăl ƀon têh Buôn Ma Thuột ƀư rjăp nau kan hăn ro tâm 5 nar gay ma nsôih bay xét nghiệm ân ngăch ân năl nŭih ntưp srê SARS-Cov2, n’gâng kan bah nkuăl, ăp ntŭk kan, ntŭk ƀư nau kan tăch rgâl hŏ nchrăp ƀư nau kan ê nkra, ăp ndơ ngêt sa ndrel dak ngêt tât ty nŭih ƀon lan.

            Rhơn rnôk ndơn nklâm ndơ sa geh byăp, puăch, tăp yor rmôt kan kơl an Covid-19 ƀon lan bah Tổ dân phố 7, Phường Tân An, nkuăl ƀon têh Buôn Ma Thuột hăn chợ an, yuh Trần Thị Hằng ta trong Nguyễn Xuân Nguyên mbơh, rnăk yuh geh pă phiếu hăn chợ kơl an tâm măng 26/8. Tâm ôi lơ 27/8, yih njoăl phiếu hăn chợ tâm rmôt Zalo bah Phường ndrel ndơn geh ndơ tâm kêng măng:

            ‘Gâp saơ nau kan phường ntrŭnh hăn chợ ân ƀon lan tâm rnôk lam nkuăl ƀon têh Buôn Ma Thuột dôl ma kơt tĭng nau ntrŭnh mrô 16 gay ma nkân uănh srê ji lah nau ueh ngăn. Phung hên moh ŭch ndơ rvăt, ri knŭng alo lah geh đah phường mra tât hăn rvăt, leo tât ta ngih ân ma rnăk gêh gŭ tâm ngih njrăng rdâng rsê. Gâp saơ rmôt kan druh ndăm jêh ri ăp yuh bu ur gơih ngăn mpeh nau kơl an ƀon lan”.

            Nkuăl ƀon têh Buôn Ma Thuột hŏ ƀư nau tâm nkhah srang nŭih tĭng nau ntrŭnh 16 ntơm rnôk 6h kêng măng lơ 26/8. Tĭng nê tâm 5 nar bôk năp nkuăl ƀon têh đă nŭih ƀon lan mô dơi luh bah dih gay ma tets năl ngăch dĭng lĕ bơi tât 375 rbăn nŭih, gay ơm ngluh lơi nŭih ji F0 luh bah ƀon lan. Tâm rnôk aơ, UBND nkuăl ƀon têh Buôn Ma Thuột jao ân ăp xã, phường ndâk “siêu thị 0 đồng” gay ma kơl an ăp rnăk ƀon lan dôl mâp nau jêr, nkre ƀư nau kan “Hăn chợ kơl an ƀon lan”. Ƀư nau kan aơ tâm Phường Thành Nhất, wa Nguyễn Khắc Sơn, BÍ thư chi bộ nkre Kruanh Tổ dân phố, mbơh:

            ‘Ăp rnăk ƀon lan mra geh pă phiếu hăn chợ ndrưl ăp nau kan ba kơi nê lah nchih moh săk nau đă n’hêl gay ƀon lan mra geh mbơh ăp ntil ndơ nơm ŭch rvăt tâm săm ƀŭt ba kơi. Nŭih ƀon lan nklih ndrel ma njoăl yâm Zalo bah rmôt tổ dân phố phung hên. Tổ dân phố phung hên rgum tay ndrel njoăl ân UBND Phườnh nê gay UBND Phường ƀư nau kan hăn rvăt ndơ ân ƀon lan”.

            Nau êng tâm nau pă ndoh ndơ ân ƀon lan tâm rnôk aơ lah rơh bôk năp, ăp siêu thị, ntŭk kan tăch rgâl tâm nkuăl ƀon têh Buôn Ma Thuột tăch tŭng ăp ntil ndơ ŭch geh dŏng sa ngăn geh đah ăp rnoh ntơm 100 tât 500 rbăn, gay ma tŏng dơi nau ŭch dŏng bah ƀon lan. Ăp combo rvăt ăp ntil ndơ kơt: Puăch, ka, byăp, play, dak si, boh mrăch, dak măm, tăp djăr, dak toh, phe, ăp ntil ndơ mât chăm tâm rnăk val, săk nŭih…Rnôk aơ geh 5 rmôt kan pă ndơ tâm nkuăl ƀon têh geh siêu thị Go Buôn Ma Thuột, siêu thị Co.op mart Buôn Ma Thuột, siêu thị MM Mega Buôn Ma Thuột, ăp ntŭk tăch ndơ Vinmart, ntrong tăch Bách hoá xanh mra kơl an dŏng nau kan tăch ndơ online, tăch tĭng combo ndrle ƀư tăch rnoh thuk đah âk ntil ndơ dŏng.

            Wa Trần Thị Thành Nhân, Groi giám đốc siêu thị Co.op Mart Buôn Ma Thuột mbơh, siêu thị hŏ nchrăp pă ndơ sa, dak ngêt, dnưo dŏng, pă rmôt nŭih jao ndơ gay ma năl pă ndơ tĭng nau ŭch bah năch:

            ‘Rmôt kan kŏ ndâk combo ăp ntil ndơ mpeh byăp, play, bum, ka gay ma kơl an ƀon lan rvăt ndơ ân nơih ngăch. Hôm mpeh ndơ tăch online ri ăp ntŭk yăch bah Facebook, Zalo, mrô điện thoại geh mrôt kan pă dăp ân nŭih gay ƀư nau kan ndơn ndơ ndrel săch ndoh ndơ kŏ kơt lah jao ân ngăch geh ngăch ndrel năn”.

            Wa Lưu Văn Khôi, Giám đốc Sở công thương n’gor Dak Lak mbơh, tĭng nau kơp bah Sở Công thương, nau pă êng bah n’gor ri sur geh 830 rbăn mhâm, rpu, ndrôk geh 305 rbăn mhâl, djăr, kik geh bơi tât 13 rkeh mlâm, byăp, bum, play rio geh 10.5090 ha…nchrăp geh dơi nau pă ndơ ngêt sa rêh tâm ntŭk. Ndrel ma nê, phe ndrel ăp ntil ndơ êng kŏ geh têm rlau 3 tŏ rđil nau geh. Nau pă ndoh ndơ êng êng geh mât đăp mpăn gay ƀon lan đăp mpăn ndrel ngih dak njrăng srê:

            ‘Ndoh ndơ ri âk ngăn ndrel ăp siêu thị, ăp ntŭk tăch ndơ ngêt sa hĭ geh nau kan rgum leo ndoh ndơ tŏng ân nau kan tăch, đăp mpăn ngăn. Nar naơ ri bah năp ma geh nau ntrŭnh mrô 16 ri rơh aơ kŏ mô hôm geh nau ma nŭih ƀon lan hăn rvăt ndơ rgum tâm du tŏ ôh, mpeh nau dơi ri bu kŏ đăp mpăn ngăn”.

            Mhe nơh, UBND nkuăl ƀon têh Buôn Ma Thuột, n’gor Dak lak geh nau ntrŭnh mpeh nau pă ndơ ngêt sa tâm rnôk nkhah srang tâm lam nau rêh jêng tĭng nau rđau mrô 16/CT-TTg bah Thủ tướng Chính phủ. Tĭmng nê, đah nau pă ndoh ndơ sa bah nau rvăt ndơ online mra geh ƀư tâm 2 nau kan. Tal bôk năp, ƀon lan mbơh đă rvăt bah nau pă, nŭih jao ndơn bah rmôt mra leo tât ngih ân ƀon lan prăk ndơ geh trok sŏng mo lah trok rnôk jao ndơn. Tal bar, nŭih ƀon lan rvăt ndơ ndrel njoăl prăk rvăt ndơ bah rmôt kan kơl an ƀon lan, ƀon, tổ dân phố tâm ăp xã, phường. Đah nau kan aơ, ndeh jao ndơ bah rmôt kan pă ndơ geh jao tât ăp rmôt kan kơl an bah xã, phường, mô lah UBND xã, Phường pă nŭih, ndơ dŏng ndoh ndơ tâm ăp mrôt pă (lah geh nŭih rmôt kan pă ân năn ndrel ma pă ndeh gay ma jao ndơ) jêh nê jao ndơ ân ƀon lan nkre.

            Nau kan jao ndoh ndơ lah ndeh jao ndơ bah rmôt pă ndơ ngêt sa mô lah ndeh bah rmôt kan kơl an bah n’gâng kan kơp dơn. Nŭih jao ndoh ndơ bah rmôt pă ndoh ndơ ân geh kho ao bah rmôt kan ndrel geh nau xét nghiệm uănh năl mô geh ntưp srê./.

            Nŭih rblang: H’Thi