VOV4.M'nông: Kêng măng 19/9 tĭng mông ta ntŭk nê (jêng lah nar 20/9 tĭng mông Việt Nam) ta Cung Cách mạng Thủ đô La Habana, Bí thư bôk năp Ban Chấp hành Trung ương Đảng Cộng sản Cuba, Kruanh dak Cộng hòa Cuba Miguel Díaz-Canel hŏ ƀư tơm rơh lễ wơt rgum kruanh dak Nguyễn Xuân Phúc. Lôch ƀư wơt ngăn, Kruanh dak Nguyễn Xuân Phúc n'hanh Bí thư bôk năp Ban Chấp hành Trung ương Đảng Cộng sản Cuba, Kruanh dak Cộng hoà Cuba Miguel Díaz-Canel leo mpôl ntơh măt gưl têh bar dak ƀư rgum nchră.

Ta rơh ƀư rgum nchră, bar kruanh tâm ban ŭch let năp tay bar ding ân n'hao dăng tâm boh chính trị ma trong tâm khâl nsum mpôl kan gưl têh, way mât  mbro, ngăch ngăr, n'hao nău dơi tam ăp nău way tâm boh, lĕ ma tâm nchră Lý luận đah bar Đảng, Ủy ban bar Chính phủ, Tâm ôp chính trị đah bar Bộ Ngoại giao, Tâm nchră trong kan đah bar Bộ Quốc phòng. Kruanh dak Nguyễn Xuân Phúc lah uĕh ăp kruanh rđău kan gưl têh, Bộ Y tế n'hanh n'gâng kan sinh dược Cuba bol mô hŏ chuh ăp tŏng an tâm dak yơn hŏ tâm pă n'hanh ntêm an lor dŭt âk gay pă an, ndơ̆ rgâl công nghệ ƀư njêng vaccine njrăng n'gang Covid-19 bah Cuba an Việt Nam. Aơ lah du ndơ an saơ an nău kơl ngăch ma Cuba way ntêm an Việt Nam kơt nău lah bah kruanh Fidel Castro “Yor ma Việt Nam, Cuba mbra n'hơr lĕ ma nting mham bah he"./.

Nuĭh rblang: Điểu Thân