VOV4.M'nông: Tât rnoh rdâk njêng ƀon lan mhe ntơm bah năm 2018, yơn ta xã Cư Ni, nkuâl Ea Kar (Dak Lak), rnôk dja hôm geh 200 rnăk ân dŏng trong rse điện ƀơch rgơm, ƀư rdâk njêng ntơm bah 15 năm bah năp nơh đŏng. Tă bah trong rse- n'gâng ơm, mô nâp uĕh, jêng điện mô đăp mpăn tŏng dăng. Trong rse ơm ƀư roh huach điện âk hôm ƀư ăp rnăk ân trok prăk điện khlay rlău 2- 3 tơ̆ rđĭl đah rnoh khlay ngăn.

Trong rse điện manh têk bah n'gâng tơm xã Cư Ni sĭt tât 4 thôn Quảng Cư 2 jong nklăp 2km, geh âk ntil rse têh jê̆; âk ntil; têk tâm păch pêng wăk mpưm ta ăp n'gâng si chŭt nkêng mô dơn nê kât ta n'gâng si rêh đŏng. Wa Bế Văn Viện, nuĭh ƀon lan xóm 4 thôn Quảng Cư 2, xã Cư Ni an gĭt, rse n'hanh n'gâng điện ta aơ tă bah ăp rnăk tâm thôn rvăt, nthoi êng bah năm 2005. Tât aƀaơ, n'gâng hŏ ôm, sre hŏ rmŭ jêng tơm điện lăp tât jay mô dăng.

Tâm mông âk nuĭh dŏng, ăp rvah sial, tivi ri geh hươi tay, glah piăng điện ri jŏ lĕ ma mông gâm mô dơi sĭn ơm...Bol ma nău tam dŏng điện mô âk, yơn rnăk păng n'hanh kônh wa tâm xóm way trong prăk điện khlay rlău 2- 3 tơ̆ rnoh khlay điện dôl dŏng aƀaơ.

“Rnăk hên geh 5 nuĭh, du khay điện mpoh ang n'hanh n'gon piăng dơm ma lĕ 400.000 – 500.000 rbăn prăk. Ăp rnăk nuĭh ta nklang xã geh trong rse điện me ri dơn trok rlău 2.000 rbăn prăk/1kw điện, ta aơ mpôl hên ân trok 4.000 tât 5.000 prăk/1kw điện, geh rnôk rlău 6000 rbăn prăk. Kônh wa dăn đă ăp n'gâng kan uănh khlay ntuh kơl ƀư trong rse điện an kônh wa gay dŏng đăp mpăn n'hanh huach đêt prăk dŏng điện.”

Wa Lê Văn Thưởng – Kruanh thôn Quảng Cư 2, xã Cư Ni năl ngăn, thôn Quảng Cư 2 geh 142 rnăk ri geh tât n'gul ân dŏng trong rse điện ƀơch rgơm đah rnoh điện khlay tâm âk năm rlău aơ, rgum ta ăp xóm 2 n'hanh 4. Wa Thưởng an gĭt, rlău ma nău trok prăk điện khlay ri ăp trong rse điện ƀơch rgơm lah tơm klach rvê rŭ hôch, ntêt nkri kônh wa tâm thôn.

“Ntơm bah năm 2005 – 2006 lah kônh wa ta xóm 2 n'hanh 4 têk êng ăp trong rse điện lĕ rngôch 4 mbah gay an 15 – 16 rnăk/mbah kiău ma dŏng điện. Trong rse têk nthoi êng bah ntŭk njŭr ta xã sĭt jong 1,7 – 1,8 km dŭt rdjuh rya n'hanh jŭr khuch hô jêng dŭt klach rvê. Tâm khay mih ăp kon se hăn nti, kônh wa hăn luh mir dŭt klach rvê đŏng yor mbra geh điện giật mô gĭt năl lor, điện dŏng ri mô đăp mpăn."

Lam xã Cư Ni nkuâl Ea Kar aƀaơ geh 4.300 rnăk, rgum ta 23 thôn ƀon. Wa Nhữ Minh Tuyến – Kruanh UBND xã an gĭt, aƀaơ xã hôm 193 rnăk ƀon lan ta ăp rkŭm ƀon lan gŭ mpeh thôn 4, 8, Ea Sing 1 n'hanh Quảng Cư 2 ân dŏng điện rnoh khlay rlău nău way bah n'gâng kan điện lực. Nkô̆ lah ăp rnăk hôm dŏng trong rse điện ƀơch rgơm geh njŭr têk têh đŏng. Gay ƀư bah nău dja ri n'gâng kan ta ntŭk ân tâm pă tơm prăk ngân sách.  

“Mpeh 4 rkŭm ƀon lan ân dŏng điện rnoh khlay têk bah tơm me sĭt ri mpôl hên mô geh tơm prăk gay ntuh kơl yor tơm prăk têh âk n'hanh ngân sách ta ntŭk ri mô tŏng. Ta năp măt, mpôl hên nkoch trêng gay kônh wa dŏng điện mpêt nkrem, đăp mpăn, mbrơi mbrơi rgâl n'gâng tơm si jêng n'gâng bê tông. Mpeh jŏ jong, mpôl hên hŏ dăn đă gưl bah lơ n'hanh dôl kâp ntuh kơl bah n'gâng kan điện ri mơ nkra dơi têk trong rse điện nâp uĕh  jŏ jong tŏng đah nău ŭch geh dŏng điện droh rklaih jêr jŏt an kônh wa"./.

Nuĭh rblang: Điểu Thân