VOV4.M'nông: Ta n'gor Dak Lak aƀaơ geh bơi 4000 bu ur kan dak si, điều dưỡng n'hanh y, bác sỹ. Tâm rơh rdâng lơh nuh srê Covid-19, tâm rdâng đah nău klach rvê, ntơm bah ăp nuĭh sơch uănh năl tâm lam ƀon lan, mô lah tâm ăp jrô kan uănh năl mham, mô lah mât chăm na nê̆ an nuĭh  ji Covid-19…, khân păng way an lĕ n'hâm suan, bôk rngok, nkêh an êng du ding gay nâp jâng gŭ kan ta bôk trong rlong sial.

Plơ̆ sĭt lôch 1 khay râng êng hăn tâm nkual ƀon têh Hồ Chí Minh rdâng lơh nuh srê Covid-19, bác sĩ Trần Thị Lệ, Khoa ung Bướu, Nhih dak si nkual Tây Nguyên mô hŏ bah ji kop kir tâm nuih n'hâm ơm. Ntŭk yuh pah kan lah nkual săm an nuĭh ji Covid-19 ta Khoa Bệnh nhiệt đới, Nhih dak si Chợ Rẫy. Nău đôl đal bah ăp y bác sĩ gay nsrôih tâm pit mplơ̆ nău rêh lhơ ƀơr an nuĭh ji, ăp n'hâm nteh n'hôr lhăt jâk bah nuĭh ji nkre đah rhêp nteh bah ăp máy Ecmo … kơt ăp n'glôn phim quay mbrơi yuh nkoch tay:

“Nău krit mƀroch uănh saơ ăp nar dŭt âk, ăp nuĭh ji khĭt tâm rnôk mpôl hên hŏ dŭt nsrôih săm ri lôch ăp tơ̆ geh kơt nê ri mpôl hên geh ndrel du nău rngot yơn mpôl hên nsrôih, aƀaơ nuĭh ji kơt nê̆ ma he an nuih n'hâm hŭch hêng ri nău dơi săm mô tam jêng mpôl hên nsrôih rlău gay săm nuĭh ji. Rlău ma săm nuĭh ji mpôl hên hôm râng nkô̆ nău mât chăm an nuĭh ji đŏng jêng mâp pah đah nuĭh ji dăch mbro, rnôk nê mô hôm geh tâm ƀah đah Covid mô lah ndơ êng. Geh rnôk saơ nuĭh rnăk nơm kuăl ăp rơh điện thoại n'hanh djăt ăp bác sĩ nê mbơh nê lah nuĭh ji khĭt lah ji jru dơm, bác sĩ ndjôt điện thoại ta ti ma ol nuih n'hâm mô nteh ngơi, yơn pha lah đah nău ngăn geh dơm".

Đah yuh Trần Thị Thu Thủy, nuĭh kan uănh năl mham mpeh Trung tâm y tế nkual ƀon têh Buôn Ma Thuột ri kơp ntơm bah khay 5-2021 tât aƀaơ lah rêng ăp nar dŭt nkah tâm n'gâng kan. Nău rêh rnăk wâl, tâm ban kơt mông nar bah nău kan jêng rlơ̆ rlơt tĭng jâng rvah bah Covid -19. Nkual ƀon têh năl geh mbro ăp rkŭm nău ntưp tâm lam ƀon lan, n'hanh tĭng ƀư uănh năl mham lam ƀon lan, ăp yuh ân way rngeh du măng rsol gay sŏk mham, ƀoi tĭng:

“Mpôl hên pah kan ta rnoh dŭt âk, mô geh mông nar rlu. Rnôk ma kruanh rđău kan kuăl moh rnôk ri mpôl hên mbra hăn dĭl, hôm nău kan rnăk wâl ri mpôl hên dăp rgum êng".

Mhe droh ndrôm săk n'hanh bok put mbung lôch 7 mông mbro gŭ tâm labo ƀư uănh năl SARS –CoV -2, yuh Trần Thị Nguyên Hằng nuĭh kan Khoa uănh năl nchroh rup gui nsro uănh năl ngăch dăng n'hâm suan, Ntŭk rgum mât kân kop ji n'gor Dak Lak hôm nsoh ndăn ndrôm săk dak si yor dơn ntil mham ân ƀư ndăn ngăch.

“Ƀư tâm n'gâng kan he gĭt đŏng rnôk rngeh măng jŏ jong kơt nê̆ n'hanh pah kan mbro kơt nê̆ nklăp mbra khuch tât n'hâm suan, yơn he uănh saơ ăp rnăk bă ntreo oh kon bah ngai sĭt ŏ r'ah dŭt n'hâm, trong ngai mih nar phŭt sial hăn ta trong ma ăp ndeh sat kơt nê̆ ri ăp nău ring tam bah he lah nău dŭt jê̆ dơm, mô jêng nkoch tât. He mĭn lah nău an roh n'hâm suan bah he nsĭt tay nău đăp mpăn an ăp nuĭh lah he nsrôih he rlău dơi dơm."

Wa Nay Phi La, Giám đốc Sở y tế n'gor Dak Lak an gĭt, aƀaơ mpôl kan dak si bah n'gor rlău 6.000 nuĭh, tâm nê geh rlău 60% lah bu ur. Tâm rơh rdâng lơh nuh srê Covid -19, ăp bu ur kan dak si, mô dơn blău nău kan, đăp mpăn, ân ndê na nê̆ tâm nău kan, ma hôm mât uĕh nău mĭn jôn rbăn rnôk pah kan. Nơm geh khân păng, ăp nuĭh dơi sŏk mham uănh năl, ăp nuĭh ji dơi mât chăm, săm ji saơ đăp mpăn, dăch dêh âk lơn. Ăp nar khay pah kan rdâng lơh nuh srê Covid -19 đah bu klô hŏ ŏ r'ah hôm, đah bu ur nău ŏ r'ah nê lơn ma rlău âk tơ̆:

“Rnôk ma oh yuh bu ur râng tâm rdâng lơh nuh srê dja âk đê̆ khuch tât năp dăp grep, gŭ rêh đŏng. Kơt lah manh nkêh an tay du ding ăp nău kan mât chăm oh kon rnăk wâl gay rhŏ dŏng an pah kan rdâng lơh nuh srê, aơ lah nău dŭt di ma nchih nkah bah n'gâng kan dak si đah oh yuh. Tâm let năp tay, n'gâng kan dak si geh si ƀŭt kuăl jă ăp mpôl, ăp nuĭh geh tơm ndơ rgŏ jă an ăp oh yuh tâm let năp tay. Yor aơ lah ăp oh yuh ân roh dŭt âk tâm Covid rơh dja.”

Tâm rơh rdâng lơh nuh srê Covid -19 hôm krit nji jŏ jong đŏng, ăp bu ur nai dak si hôm dôl nar măng nsrôih, nâp dăng ntŭk bôk trong rlong sial ndrel ăp mpôl kan dơi kan ntrôl rŭch nuh srê gay mplơ̆ tay nău rêh kơt ơm mhe an nuĭh ƀon lan./.

Nuĭh rblang: Điểu Thân