VOV4.M'nông: Gay ntop kơl an nuĭh ƀon lan jêr jŏt tă bah nuh srê Covid-19, ăp nar rlău aơ, âk mpôl kan nsum mpôl ta n'gor Dak Lak hŏ an ƀư ăp bôk nău kan ndrơng "mô roh prăk". Ta rnôk nuh srê, ăp nklâm ndơ phăt an dơm hŏ du gâl kơl kônh wa geh tay ndơ ngêt, sa an ăp tơ̆ sông ăp nar.

Lôch hăn rvăch du tơ̆ wăr ndrơng ndơ “Siêu thị mini 0 đồng”, wa Đoàn Thị Xuân Đào ta tổ dân phố 2, phường Tân Lợi, nkual ƀon têh Buôn Ma Thuột, n'gor Dak Lak sơch ăp ntil ndơ he ŭch geh kơt phe, boh, bột ngot, đường, dak măm, dak ngi, ndơ tâl nkhlŏng lon n'hanh ăp ntil biăp play. Wa Đào an gĭt, rnăk păng mpeh săk ach o, sai păng mhe roh tă bah nău ji jŏ năm, du hê păng mât 2 hê kon mbiach dôl năm hăn nti. Gay joi geh wăng sa, wa Đào way tăch rgâl jê̆ ta chợ yơn bơi 1 khay aơ păng ân gŭ rlu ta jay gay njrăng n'gang nuh srê. Rnôk phường phăt phiếu rvăt dơm ndơ ta siêu thị 0 đồng păng saơ dŭt rhơn:

            Dŭt lah uĕh bôk nău kan hŏ kơl gâp tâm khay nuh srê dja yor mô dơi hăn kan, mô joi geh prăk jêng rnôk geh bôk nău kan dja  ntop kơl hŏ kơl he bah du gâl jêr jŏt tâm nău rêh đŏng.

          "Siêu thị mini 0 đồng" lah bôk nău kan tă bah Tỉnh Đoàn Dak Lak, Hội Liên hiệp Bu ur n'gor kan nsum đah Công ty Cổ phần Vàng bạc đá quý Phú Nhuận (PNJ) gŭ kan ta Tây Nguyên - Nam Trung bộ n'hanh ăp đơn vị an ƀư, gay ntop kơl nuĭh ƀon lan geh nău rêh jêr jŏt, rnăk ach o n'hanh dăch kêng ach o. Tâm siêu thị geh bơi 40 ntil ndơ dŏng sa khlay, puăch ka n'hanh bum biăp.

          Ma săk nchih dăn đă bah ăp phường, xã ta nkual ƀon têh Buôn Ma Thuột, ban tổ chức hŏ phăt 500 “Lha vé tâm rŏng" an ăp rnăk jêr jŏt, ăp vé geh rnoh  khlay tâm ban 300 rbăn prăk. Ntơm bah 14- 17/8, ntơm bah 7h n'gul tât 5h kêng măng ăp nar, nuĭh ƀon lan dŏng phiếu dja gay "rvăt" ăp ndơ he ŭch. nô Võ Chí Nhân, Kruanh rmôt kan Marketing, Công ty Cổ phần Vàng bạc đá quý Phú Nhuận (PNJ) gŭ kan Tây Nguyên - Nam Trung bộ an gĭt, ban tổ chức hŏ dŏng rlău 180 rkeh prăk gay rvăt ndơ bah ăp siêu thị têh đah rnoh khlay rvăt klŭp, n'hanh lĭr nkrêp tĭng rnoh khlay dja đah ăp ndơ tăch ta siêu thị mini 0 đồng. Nuĭh ƀon lan dơi sơch ăp ntil ndơ đah rnoh khlay mô rlău 300 rbăn prăk gay đăp mpăn tŏng rnoh âk ndơ rđĭl đah rnoh âk phiếu hŏ phăt luh. Nkre, khân păng hŏ dah ma rŏng sơch ăp ntil bum biăp, play do, uănh tĭng nău ŭch.

           Ăp ndơ tâm siêu thị tŏng ăp lĕ, nuĭh ŭch geh ndơ dŏng sa khlay ri sơch ndơ nê lor, he mbra mô tâm râp têl tĭng trong nklâm lơi tŏng 300 rbăn prăk ma khân păng nơm sơch êng kơt ta du siêu thị dĭl, khân păng lăp kơt siêu thị nê̆. Đah he phiếu 300 rbăn ri saơ đêt yơn ngăn ma lah hăn tât siêu thị dja ri khân păng mbra geh ndơ âk  lơn rđĭl đah rnoh prăk 300 rbăn prăk, yor ma nău mât dŏng kan bah Metro n'hanh Co.op, khân păng tăch klŭp an he, jêng lah rnoh khlay set up lah rnoh khlay tăch chrai đŏng.

          Tĭng nô Trần Doãn Tới, Groi Bí thư Tỉnh Đoàn Dak Lak, ndrel đah siêu thị mini 0 đồng, tâm bah ri aơ nơh, mom ndăm Dak Lak hŏ an ƀư âk bôk nău kan tĭng trong ntĭt leo "mô roh prăk" kơt Siêu thị di động, bôk ndeh mô roh prăk, por mô roh prăk, ndrơng ndơ mô roh prăk,...gay ntop kơl an ăp nuĭh jêr jŏt n'hanh ăp nuĭh châp ngăn tâm nău rêh tât khuch bah nuh srê Covid-19. Bol ma ntơ êng êng yơn ăp bôk nău kan rƀŏng tât nău ntop kơl ăp ndơ dŏng sa khlay gay rgâl săk geh mbâr sa ăp nar an nuĭh ƀon lan. Ndrel đah nău ntop kơl nuĭh ƀon lan ta rnôk ƀư ndrơng ndơ tăch, ăp mpôl kan đoàn tâm dâng hôm njêng ăp rmôt shipper gay hăn kơl tât ntŭk ta ăp nkual an gŭ rgum êng, mpă wêl.

          Lôch siêu thị 0 đồng rơh dja ƀư ta Buôn Ma Thuột ri mpôl hên mbra ƀư âk siêu thị 0 đồng êng ƀa ƀă ta ăp ntŭk jêr jŏt tâm lam n'gor đŏng. N'hanh êng đah ăp nuĭh jêr jŏt, geh tât khuch bah nuh srê Covid-19 ma mô geh ndơ hăn tât ntŭk sŏk ri geh rmôt shipper bah mpôl kan đoàn mbra hăn njŭn na nê̆ tât ăp rnăk nê gay kônh wa geh nău rgŏ jă năn ngăch n'hanh nsĭt tay nău dơi tam.

          Ndrel rƀŏng tât nuĭh kan dah rŏng êng bah dih n'hanh ăp nuĭh jêr jŏt, ndrô ranh, mô geh tơm wăng sa đăp mpăn, ntơm bah nar 8/8 mhe aơ, UBND phường Thống Nhất (nkual bon têh Buôn Ma Thuột) ƀư bôk nău kan “Siêu thị 0 đồng” n'gân ta nhih nti tiểu học Lê Hồng Phong. Rlău ma ndơ dŏng sa khlay n'hanh bum biăp, ta aơ hôm geh puăch n'hanh ka rêh đŏng. Tât aƀaơ, bôk nău kan hŏ ƀư geh 3 tơ̆ rơh tăch ndơ, đah rlău 900 nklâm ndơ an dơm mô roh prăk an nuĭh ƀon lan ta 9 xã, phường ta nkual ƀon têh Buôn Ma Thuột.

          Wa Trịnh Như Ngọc, Kruanh UBND phường Thống Nhất, nkual ƀon têh Buôn Ma Thuột, n'gor Dak Lak an gĭt, ăp nklâm ndơ lah ăp combo geh rnoh khlay tâm ban da dê gay nuĭh ƀon lan sơch ăp ndơ he ŭch geh. Rlău ma nê, kônh wa dơi sơch tay du đêt ndơ dŏng sa khlay êng ƀa ƀă ta siêu thị. Ntơm bah rnôk lăp dŏng kan, siêu thị 0 đồng hŏ dơn geh âk nău uănh khlay, ŭch tĭng kơl bah âk mpôl kan, ăp nuĭh lŏng nuih n'hâm đah nklăp 200 rkeh prăk măt n'hanh bơi 5 tấn bum biăp. Bah tơm prăk kơl dja, siêu thị mbra mât dŏng tât lĕ nar an gŭ srang ngai êng tĭng nău ntrŭnh 15 bah Thủ tướng Chính phủ.

          Hŏ geh dŭt âk nuĭh way hăn kơl ndơ hŏ geh nău mât uănh khlay n'hanh tât ntŭk gay kơl, tâm pă ăp nău jêr jŏt bah kônh wa, yor kơt nê̆ mpôl hên dơi geh nău nsing nơm bah lĕ rngôch bah ăp nuĭh lŏng nuih n'hâm way hăn kơl đah âk ndơ dŏng sa khlay, puăch ka, prăk kaih gay mpôl hên rdâk njêng bôk nău kan du trong dŭt uĕh, ndjôt tât ăp nklâm ndơ săk kah uĕh an ăp nuĭh ƀon lan dôl ŭch geh. Mpôl hên ŭch rŏng tâm pă du gâl jêr jŏt tâm rơh aƀaơ an khân păng.

          Đah nkô̆ hôr “du mbâr rnôk ji ngot tâm ban ma du nklâm rnôk hơm", ăp nklâm ndơ bah ăp bôk nău kan "mô roh prăk" hŏ kơl kônh wa du gâl bah ir jêr jŏt. Ăp nklâm ndơ lơn ma jêng geh nkô̆ khlay yor păng tŏng na nê̆ n'hanh năn ngăch ăp ndơ dŏng sa khlay ma kônh wa dôl ŭch geh an rnăk wâl bah khân păng tâm khay nuh srê./.

Nuĭh rblang: Điểu Thân