VOV4.M'nông: Tĭng ntŭk rgum mât uănh kop ji n'gor Dak Lak, kơp tât nar 18/11, lam n'gor hŏ chuh rlău 1 rkeh 300 rbăn dĭng vaccine Covid -19 ta lĕ rngôch rnoh 1 rkeh 335 rbăn nuĭh rlău 18 năm deh. Tĭng nê, tât nar 18/11, n'gor Dak Lak hŏ dơi Bộ Y tế tâm pă 12 rơh vaccine njrăng n'gang Covid-19, đah 1.262.048 dĭng gay chuh n'gang an nuĭh ƀon lan ntơm bah 18 năm deh let lơ. Dak Lak hŏ geh 88,82% rnoh nuĭh ntơm bah 18 năm deh dơi chuh vaccine Covid-19 n'glai 1, rnoh âk chuh n'glai 2 geh 10%.

Tĭng wa Nay Phi La, Giám đốc Sở Y tế n'gor Dak Lak, gay đăp mpăn tŏng chuh 2 n'glai vaccine njrăng n'gang Covid-19 an lĕ rngôch rnoh nuĭh ntơm bah 18 năm deh, n'hanh hăn tât chuh nkrum lam 80% nuĭh ƀon lan ntơm bah 12 năm deh let lơ, rŏ năp tay, n'gor ân geh nklăp 1 rkeh 8 rhiăng rbăn dĭng vaccine. Aƀaơ lam n'gor geh 236 ntŭk chuh n'gang, nkhêp geh nău khlay mbra dơi ƀư tât 500 rmôt chuh an nklăp 200.000 nuĭh/nar. N'gâng kan dak si Dak Lak hŏ geh trong nchrăp na nê̆ an tĭng nuĭh gay rnôk vaccine tât mbra an chuh năn ngăch./.

Nuĭh rblang: Điểu Thân