VOV4.M’nông: Rơh êp aơ, ta Dak Lak mro geh ntoh ăp ntŭk srê Covid-19 mhe tâm ƀon lan. Rdâng đah ăp nau tât jêr, Dak Lak mra ƀư rjăp nau ntrŭnh luật, n’hao nau nkoch trêng bonh đă ƀon lan n’hao nau njrăng rdâng srê. Nkre n’hao nau rgum săk uănh nŭih ji-săm nŭih ntưp srê Covid-19 tâm Ngih dak si đa khoa nkuăl Krông Búk hao rlau 2 tŏ, nchrăp tay 2 ntŭk nkhah rgum nsum têh tâm Buôn Ma Thuột, tŏng ntŭk ân nklăp 1.300 nŭih.

Jêh bơi tât 2 pơh leo nau ntrŭnh nkhah srang nŭih mrô 16 ƀư tĭng nau ntrŭnh mrô 15 bah Thủ tướng Chính phủ, nkuăl ƀon têh Buôn Ma Thuột, n’gor Dak Lak ƀư rjăp nau kan nkhah srang nŭih gay njrăng srê. Knŭng tâm 13 nar, geh 4 ntŭk srê ntưp tâm ƀon lan, đah bơi tât 50 nŭih ntưp mhe, mô êng nau ƀư nkuăl ƀon têh Buôn Ma Thuột plŏ ma nau ntrŭnh mrô 16 ma nkre ƀư nau xét nghiệm ngăch lam nkuăl, đah bơi tât 102 rbăn rnăk. Wa Vũ Văn Hưng, Kruanh UBND nkuăl ƀon têh Buôn Ma Thuột mbơh, geh 70 ntŭk xét nghiệm hŏ geh ndâk, ndrel xét nghiệm mro ntơm lơ 27/8. Êp nê, rơh nkhah srang aơ rjăp ngăn ma nkuăl ƀon têh ƀư, mra đăp mpăn nau xét nghiệm ngăch, đăp mpăn, ngluh lơi nŭih F0 dôl ma geh luh bah ƀon lan:

‘Ƀư nau rđau mrô 16 lah nau mô ân geh nŭih hôm geh luh bah dih trong, knŭng nŭih dôl ƀư nau kan. Ndrel ngăn lah, lơ 1/9 mô geh nau lăp nti mhe, nsrŭng nau hăn nti, nsrŭng ăp nau ntĭm nti êng. Hăn chợ ri mra geh ăp rmôt kan, bu ur, druh ndăm mra hăn chợ ân ăp rnăk ƀon lan tât ăp tổ dân phố, thôn ƀon. Lam nkuăl ƀon têh mra xét nghiệm tĭng ăp rnăk, ntơm 5-7 nar mra jêh”.

Lôch 2 pơh rlau aơ, Covid-19 ta Dak Lak mra geh nau tât rvê. Mô êng knŭng nkuăl têh Buôn Ma Thuột âk ƀon lan ma ăp xã mô geh âk nŭih, kơt xã Cư Bao, nkuăl têh Buôn Hồ, xã Cư Né nkuăl Krông Búk ndrel xã Ea Nam, nkuăl Ea H’leo kŏ geh nŭih ntưp tâm ƀon lan, đah rlau 150 nŭih.

Nau tâm kơt bah ăp nŭih ntưp aơ lah geh tât nau kan tăch rgâl geh pah kan đah ăp n’gor, nkuăl ƀon têh dôl ma geh srê Covid-19 ntoh dăng hô. Bah nau mêt uănh ân saơ, dôl ma geh mô đê̆ nau ê tŏng dơi tâm nau mêt uănh nŭih ƀĭt ndeh, ndeh klư, nthoi nau đah ăp n’gor ndrel ăp rmôt kan geh tât. Kơt tâm nkuăl têh Buôn Hồ, jêh bơi tât du pơh ntoh luh srê geh 57 nŭih ntưp, nau joi nŭih hôm nsrŭng tâm du ntŭk, ndri ma mô geh nau mbơh mpeh nŭih ƀĭt ndeh dôl ma sŏk ndơ tâm du ntŭk nsrŭng njưh bah du ntŭk kan tâm bôk khay 8. Thiếu tá Trần Ngọc Tú-Kruanh rmôt kan cảnh sát gung trong mrô 1, Trậm mât njrăng ntung 110, mât nkân nŭih, ndeh klư tă bah mpeh ba lơ lăp tâm n’gor mbơh, rnôk aơ nau kan mêt uănh joi nŭih hŏ geh rklaih rnơm nau kan joi nŭih dŏng QR bah điện thoại nơm.

“Rnôk nê ri ê geh ndơ dŏng kơt nê ôh. Rnôk aơ ri hŏ dŏng QR lôch hôm. Ndeh tât ri kŏ đă ƀư dŏng QR, nkre đah mpeh dak si, nkre đah mpeh N’gâng kan công an. Rnôk ma uănh ri geh tŏng ăp nau ngăn”.

Bah năp nau tât bah srê, rƀŭn nchră Rnâng kan rđau nau njrăng rdâng srê Covid-19 bah Dak Lak, wa Phạm Ngọc Nghị, Kruanh UBND n’gor ân lah, hôm ơm nau ƀư thơ tha mô njrăng bah ƀon lan ndrel bah n’gâng kan. Ndrel đah nau đă ƀư rjăp nau ntrŭnh, n’hao nau nkoch trêng bonh đă ƀon lan n’hao nau blau nau kan njrăng, rdâng, ăp nkuăl tâm n’gor ân geh mra ƀư đah ăp nau tât jêr lơn, ăp nkuăl tâm n’gor ân geh ƀư ăp nau kan ngăn, năn. Bah năp măt, Dak Lak mra n’hao nau uănh năl, săm srê Covid-19 tâm ngih đak si đa khoa nkuăl Krông Búk ntơm 100 nsưng hao 200 nsưng, nchrăp tay 2 ntŭk nkhah rgum têh tâm nkuăl ƀon têh Buôn Ma Thuột, tŏng ân nklăp 1.300 nŭih. Ndrel tĭng wa Phạm Ngọc Nghị, nau dơi săm Covid-19 tâm nkuăl kŏ ân geh dơi n’hao lơn:

‘Đă Ngih dak si Đa khoa nkuăl ân nchrăp tay 500 nsưng săm, yor nơm ân geh nsing kơl an ân ăp n’gor êng đŏng. Ân geh nchrăp ndoh ndơ lor. Mpeh ba kơi, jêh rnôk geh nŭih ji ri ân geh lŏ n’hao nau blau kan. Tâm rơh săm ri ân geh nsôih tât dăp tal 2 lah luh hôm. Hôm ân tât dăp tal 3 ri lah jêr ngăn hôm”.

Tĭng ntŭk kan nkân njrăng srê ji tâm n’gor Dak Lak, tâm n’gor geh du nkuăl tâm nkuăl dôl ma geh nau nâp-đăp mpăn. 8 nkuăl tâm rnoh geh mra tât ntưp, 3 nkuăl, di nkuăl têh ndrel nkuăl ƀon têh Buôn Ma Thuột, lah nkuăl mra geh nau ntưp âk, ndrel nkuăl krông Búk lah nkuăl mra geh ntưp hô ngăn. Tâm rnoh mhe geh mbơh bah njrăng srê Covid-19, Buôn Ma Thuột ndrel Krông Búk hŏ geh nau ƀư nkhah srang ntơm kêng măng 26/8. Nau ƀư xét nghiệm rgum ntơm geh ntrŭnh ƀư. Tâm nê, Buôn Ma thuột ntơm geh nau uănh năl lam nkuăl ƀon têh ndrel nkuăl Ea Kar ntơm nau uănh tâm ăp ƀon nŭih rnoi mpôl đê̆. Nŭih ƀon lan Dak Lak ŭch ăp nau nsôih mhe mra kơl an ngăch ăp nŭih F0 geh tâm nkuăl ƀon lan, nsrŭng ân bah ăp nŭih ntưp srê mhe têh, rgop nau njrăng rdâng ân geh săk tam đah srê Covid-19./.

Nŭih rblang: H’Thi