VOV4.M’nông:  Lơ 8/10, Công an nkuăl ƀon têh Buôn Ma Thuột, n’gor Dak Lak hŏ leo mhal tih nŭih, mô ân hăn luh bah ntŭk gŭ đah Đỗ Thanh Hải, 36 năm, gŭ tâm Phường Tân Lợi, nkuăl ƀon têh Buôn Ma Thuột, n’gor Dak Lak. Hải geh mhal mpeh nau tih “Ƀư ntưp rêng srê ntưp ji khuch ân nŭih” tĭng Khoản 1, điều 240 Bộ luật hình sự. Tĭng nau geh kơp uănh bah Công an, Đỗ Thanh Hải lah nŭih mât nau kan tâm ntŭk kan Ngih ndeh Tiến Oanh, ta mrô 134 Hai Bà Trưng, Phường Thắng Lợi, nkuăl ƀon têh Buôn Ma Thuột. Măng 10/7, Hải ndrel 2 nŭih êng ncho klơ ndeh 50H-052.70 tă bah nkuăl ƀon têh Hồ Chí Minh sĭt nkuăl ƀon têh Buôn Ma Thuột. Rnôk aơ, nkuăl ƀon têh Hồ Chí Minh lah nkuăl dôl geh srê. Rnôk sĭt tât ntŭk ngih ndeh, Hải mô tât ntŭk kan dak si gay ma mbơh nau kan dak si tĭng nau ntrŭnh, ma hôm tât âk ntŭk tâm nkuăl ƀon têh Buôn Ma Thuột ndrel mâp ma âk nŭih. Jêh rnôk geh năl lah ntưp srê, Hải mô mbơh kloh ngăn nau hăn ro tâm nau gay ma joi nŭih ntưp ndrel uănh nkô̆ ntưp, ƀư rmôt kan mâp nau jêr. Bah nau mêt uănh, công an năl Đỗ Thanh Hải hŏ ƀư 10 nŭih tâm nkuăl ƀon têh Buôn Ma Thuột geh ntưp ma srê Covid-19. N’gâng kan dôl ma ƀư jêh nau kan, mhal tih tĭng nau ntrŭnh bah pháp luật./.

Nŭih rblang: H’Thi