VOV4.M’nông: Tĭng Rnâng kan rđau nau njrăng, rdâng srê Covid-19 n’gor Dak Lak, tâm lơ 12/8, lam n’gor kơp dơn geh tay 12 nŭih ntưp ma srê Covid-19. N’hao rnoh nŭih ntưp ji tâm n’gor hao 476 nŭih. Tâm rnoh 12 nŭih ntưp mhe geh kơp dơn geh 3 nŭih geh nau ntưp tă bah nkuăl ƀon têh Hồ Chí Minh ndrel n’gor Đồng Nai. 9 nŭih hôm e geh tât nŭih ji geh kơp dơn bah năp nê. Nkah ngăn lah geh 3 nŭih geh tât nau ji đah nŭih ji tâm xã Vụ Bổn, nkuăl Krông Pách.

2 nŭih ji geh kơp dơn tâm nkuăl nkhah rgum tâm Hoàng Anh Gia Lai, Phường Tự An, nkuăl ƀon têh Buôn Ma Thuột geh tât nŭih ji tâm thôn 20, xã Cư Bông, nkuăl Ea Kar. Geh tât 2 nŭih aơ, ntŭk kan dak si Dak Lak joi geh 15 F1, tâm nê geh 2 F1 test ngăch ân geh nau saơ ntưp đah SARS-Cov2.

Tâm măng 11/8, rmôt kan ntơm nchueng rdâng ndrle sŏk mham uănh năl ngăch ân nŭih ji tâm nkuăl Block C bah chung cư Hoàng Anh Gia Lai. Tâm lơ 12/8, ntŭk kan dak si Dak Lak kŏ geh pă n’ha săm ƀŭt ân luh ngih dak si ân 20 nŭih ji Covid-19. Kơt ri, tât rnôk aơ, Dak Lak geh 74 nŭih geh săm bah srê Covid-19 ndrel geh luh ngih dak si./.

Nŭih rblang: H’Thi