VOV4.M'nông: Kêng măng 18/10, wa Lê Quang Bất - Kruanh UBND xã Ea Tul, nkuâl Cư M’gar (Dak Lak) năl, ta xã mhe geh khĭt rmok dak yô̆ nđach ƀư bar hê kon se nti khĭt. Ăp nuĭh khĭt dơi năl lah mon Y Tiêm M'lô, 11 năm deh n'hanh Y Zeam Niê, 8 năm deh, ndrel gŭ ta Buôn Tu, xã Ea Tul, nkuâl Cư M’gar, n'gor Dak Lak. Lĕ bar hê dôl nti ta nhih nti Tiểu học Phan Chu Trinh, xã Ea Tul, nkuâl Cư M’gar, n'gor Dak Lak.

Wa Lê Quang Bất nkoch, Y Tiêm n'hanh Y Zeam tâm jă hăn tât n'glău Ea Tria, xã Ea Tul pâl tât măng mô saơ sĭt. Saơ kon mô sĭt, rnăk mon tâm jă joi ăp ntŭk. Tât ôi 18/10, ăp nuĭh saơ kho ao Y Tiêm n'hanh Y Zeam an kalơ kơh n'glău Ea Tria jêng jă nuĭh jŭr n'glău nhâp joi. Nklăp 1 mông, ăp nuĭh hŏ wơt săk ăp nuĭh khĭt kalơ kơh. Lôch geh nău tât, n'gâng kan nsum mpôl hŏ tât chop khâl, pă nklâm ndơ ntop kơl an rnăk wâl njor tâp an ăp nuĭh khĭt. Ăp rơh khĭt rmok dak yô̆ nđach hôm geh ta kon se jê̆ ta ăp n'gor Tây Nguyên, lah nău mbơh njrăng lor tât ăp rnăk, wâl n'hanh lam rêh jêng kon nuĭh tâm nău n'hao dơn kan mât njrăng đăp mpăn an kon se bah khĭt rmok dak đŏng./.

Nuĭh rblang: Điểu Thân