VOV4.M’nông: Jêh rnôk nkuăl ƀon têh Hồ Chí Minh ndrel ăp n’gor mpeh ba dâng ƀư lhoi nau kan nkhah srang, ntơm lơ 2 tât 4/10, n’gor Dak Lak hŏ ndơn bơi tât 7000 nŭih sĭt tă bah ăp n’gor mpeh ba dâng. Nau kan ntrŭnh ƀư nau xét nghiệm test ngăch ân rnoh nŭih ba lơ nê geh kơp dơn 14 nŭih ntưp srê. Tâm rnoh bơi tât 7000 nŭih tâm mpeh ba dâng hăn sĭt êng tâm Dak Lak, tât ôi lơ 4/10, n’gâng kan dak si Dak Lak hŏ ntrŭnh rmôt kan sŏk mẫu xét nghiệm test ngăch ân rlau 6000 nŭih.

Bah nê hŏ kơp dơn geh 14 nŭih ntưp, geh 0,2%. Ăp mẫu aơ hŏ geh njoăl tât CDC n’gor ndrel Viện vệ sinh dịch tễ Tây Nguyên gay ma uănh năl Realtime RT-PCR. Bah nau nkah pă nŭih, tâm rnoh rlau 7000 nŭih sĭt n’gor geh bơi tât 60% nŭih hŏ geh chuh vắc xin njrăng srê Covid-19 du nglai, rnoh nŭih chuh tŏng 2 nglai geh bơi tât rlau 9%, ndrel 746 nŭih F0 hŏ geh săm bah srê Covid-19 luh ngih dak si, geh rnoh rlau 11%./.

Nŭih rblang: H’Thi