VOV4.M’nông: Trung thu năm aơ lah du rnôk êng ngăn đah ăp kon se dôl geh săm tâm ntŭk bu nkhah rgum nŭih ndrel ntŭk bu săm nŭih ntưp srê gay ma njrăng rdâng srê Covid-19 tâm Dak Lak. Mô geh nau khuh n’gôr kơt lah geh goh gâr mô lah yuh Hằng, kônh Cuội, ăp oh hôm saơ duh răm ơm rnôk ndơn nklâm ndơ trung thu ndrel nau kơl an tă bah rmôt kan ndrel nŭih dôl pah kan ta aơ.

            Ndơn nklâm ndơ tă bah ăp rmôt bu tât pă ân, oh H Sa Muel Adrơng, ta ƀon Pưk Prong, xã Ea Ning, nkuăl Cư Kuin nkoch, aơ lah trung thu mha êng ngăn bah oh ntơm sa ơm tât rnôk aơ. Rnôk aơ tâm ăp năm bah năp, oh ndrel ăp oh bu ur păng gŭ kâp ngăn gay ma pâl đèn trung thu hăn ngih rgum bah ƀon ndrel geh ăp nô yuh druh ndăm ƀư njroh mprơ, uănh kônh Cuội, yuh Hằng. Năm aơ, yor srê Covid-19 tât, ƀon Pưk Prong hŏ nchueng lĕ gay ma geh njrăng srê ri ma tâm ăp ntŭk rngot nkăt ngăn. Bol ma kơt nê, oh hôm rhơn ơm yor ndơn nklâm ndơ trung thu di rnôk gay 2 oh nur geh sa ƀănh tâm ngih:

            ‘Oh rhơn ngăn rnôk ndơn nklâm ndơ tă bah ăp nô, ăp yuh, oh mra ƀư ân oh nur gâp nơm geh du măng tết trung thu ueh đŏng. Lah ueh ăp nô, yuh Hội đồng đội n’gor ndrel Ngih văn hoá thanh thiếu nhi Dak Lak hŏ pă ân nklâm ndơ”.

            Ta ntŭk săm srê tâm ngih dak si săm mrô 1 n’gor Dak Lak tâm ăp nar aơ, nau khuh n’gôr ueh lơn. Ndrel ma nau kan mât chăm ndrel săm ân ăp nŭih ji, ăp cán bộ, nŭih pah kan ta aơ hôm ntoh măt ân ăp nŭih geh ntuh kơl tât ăp jrâu gay ma pă nklâm ndơ trung thu ân ăp oh kon se dôl săm srê Covid-19. Nai dak si chuyên khoa 2 Phạm Thị Tuyết Nhung, Groi Giám đốc Ngih dak si săm ji mrô 1 mbơh, ta aơ dôl geh rgum ndrel ndơn săm ân bơi tât 500 nŭih, tâm nê geh 117 kon se, mom jê̆ ngăn mhe knŭng du khay. Rnôk aơ, n’hâm soan bah ăp nŭih ji aơ đăp mpăn, nau geh ndâk n’hâm ueh.

Ăp nar rlau aơ, ngih dak si ndơn geh nau kơl an bah ăp rmôt, ăp ntŭk kan, bah cán bộ nŭih pah kan bah ngih dak si gay ma pă nklâm ndơ ân ăp mon. Nai dak si Phạm Thị Tuyết Nhung ân lah, aơ lah nau ƀư ueh, kơl bonh đă nuih n’hâm ăp mon, tă bah nê kơl an ăp mom đăp mpăn nau mĭn, ueh tâm nau rêh, rgop nau rhuăt gleh nar săm ndrel n’hao nau dăng châl ma nau ji, gay ma ơm bah ji:

‘Ăp oh tâm aơ mô êng geh săm, mât chăm ma hôm geh ntĭm mbơh, mhâm ƀư gay ma ăp oh nsôih rlet rlau đah nơm, rlet rlau nau ji kuet gay ma sĭt ma rnăk vâl. Trung thu năm aơ ngih dak si kŏ geh ăp nŭih geh nuih n’hâm lŏng tât pă nklâm ndơ kơt aơ ri kŏ rhơn ngăn ndrel kŏ rgum tâm nau kan ngăch rklaih dơi ăp nau jêr, rlet rlau nau ji gay ma sĭt ơm đah rnăk vâl, đah ƀon lan”.

            Bah năp nau tât bah srê Covid-19 geh tât, âk nkuăl bah n’gor Dak lak dôl ma ƀư nau nkhah, nchueng rdâng lơi gay ma njrăng srê ji. Đah nau ŭch leo tât ân ăp oh kon se du yan trung thu geh duh răm ndrel geh nau ueh m’ak, ăp gưl kan cán bộ Đoàn, Hội, Đội tâm n’gor hŏ tâm rgop nsum đah ntŭk kan, rmôt kan ndrel nŭih geh nuih n’hâm lŏng ƀư.

  Bôk nau kan Trung thu đah nkô̆ “Lồng đèn mpoh ang nau ŭch-tâm pă nsum đah oh kon se, nsum ty rlet bah srê nuh”. Nô Trần Doãn Tới, Groi Bí thư N’gor Đoàn Dak Lak ân gĭt, bôk nau kan mra njoăl tât ăp oh ăp nklâm ndơ, bánh trung thu, prăk, lồng đeng, dak toh ndrôk ndrel ndơ dŏng nti. Nsing ngăn tâm nau geh ngăn bah ăp nkuăl, ƀư ăp rmôt kan tât mra pă nau kan ân tâm di, geh nau khlay ngăn gay ma năn kơl an ndrel bonh đă ăp oh tâm rnôk trung thu năm aơ. Êng đah gưl n’gor, Hội đồng đội n’gor tâm rgop nsum đah ăp nŭih ntuh kơl mra pă 500 nklâm ndơ tât ăp oh kon se geh nau rêh jêr jŏt ndrel ăp oh dôl săm mô lah ƀư nkhah rgum, ntŭk bu nchueng rdâng gay ma njrăng srê Covid-19:

            ‘Đah ăp rmôt kan bah ăp nkuăl ndrih, êr, kam ri săch ăp nau ƀư kan ân tâm di, gay mhâm ƀư ân ăp mom geh dôl geh nau jêr ngăn, ăp mon dôl ma gŭ tâm ntŭk bu nkhah rgum, ăp kon se rêh kon đơi, ăp kon se rven rvo geh dơi nau ueh lăng tâm măng trung thu geh duh răm bol ma tâm rnôk mô dơi geh rgum âk nŭih. Đah gưl n’gor ri Rnâng kan Đoàn n’gor, Hội đồng đội n’gor mra ƀư nau kan tâm ngih dak si ndâk săm ndrel ăp ngih dak si tâm nkuăl gay ma mât chăm ndrel leo nau ueh m’ak bah trung thu tât đah ăp mon”.

Du yan trung thu tât êng ngăn rđil đah âk năm bah năp, yor geh nau khuch bah srê Covid-19, âk kon se tâm Dak Lak ndrel lam dak mô geh nau dơi gay ma vơt pâl đah đèn trung thu, sa ƀănh ndrel ma njroh lân. Yơn lah, đah nau kơl an bah n’gâng kan ndrel ăp rnâng kan đoàn rmôt, ri ăp ăp oh mra geh vơt du yan trung thu duh răm ndrel geh nau khlay đah ăp nklâm ndơ bonh đă năn ndrel tâm di ngăn./.

                                    Nŭih rblang: H’Thi