VOV4.M'nông: Nar ntri (19/8), Dak Lak geh rnoh nuĭh ntưp Covid-19 dŭt âk kơp ntơm bah rnôk ntoh nuh srê ta n'gor. Tâm rnoh 56 nuĭh dơi năl, geh tât 47 nuĭh tâm rkŭm ntưp rêng tâm ƀon lan. Tĭng Sở Y tế Dak Lak, rkŭm ntưp rêng tâm  ƀon lan dŭt mhe bah n'gor, ntoh ta buôn Kwang A, xã Cư Bao, thị xã Buôn Hồ. Kơp tât kêng măng ntri, rnoh nuĭh ntưp Covid-19 tâm rkŭm ntưp rêng dja hŏ geh 46 F0.

Wa Nay Phi La, Giám đốc Sở Y tế Dak Lak an lah, tơm nuh srê ta rkŭm ntưp rêng dja lah mô hŏ gĭt kloh rvah. Gay gĭt năl na nê̆, ân geh tay nău lư mpeh ăp nuĭh ƀĭt ndeh hŏ tât nông trường Cư Bao. Kơp ntơm bah bôk khay 7 tât aƀaơ, hŏ geh 6 nkuâl, thị xã, nkual ƀon têh ta n'gor ntoh rkŭm ntưp rêng bah 10 nuĭh let lơ. Tâm nê, nkual ƀon têh Buôn Ma Thuột geh 2 rkŭm ntưp rêng, lĕ rngôch 30 nuĭh ntưp. Thị xã Buôn Hồ n'hanh ăp nkuâl: Cư Kuin, Krông Bông, Krông Pak, M’Đrak, ăp nkuâl geh 1 rkŭm ntưp rêng, lĕ rngôch 155 nuĭh. Nơm geh ngăch nchih gĭt ntŭk, ƀoi tĭng, uănh năl mham, lơn âk ăp rkŭm ntưp rêng ta Dak Lak hŏ rdêl bah lôch 14 nar mpă wêl./.  

Nuĭh rblang: Điểu Thân