VOV4.M’nông: Tĭng n’gâng kan ntĭm nti n’gor Dak Lak, ăp ntŭk tâm n’gor dôl ndăn jêh trong kan nchrăp an năm nti mhe 2021-2022. Nar bah năp, ăp ntŭk lĕ uănh nđôi, ntop tay ndoh ndơ ntĭm nti, ndơ dŏng, ndơ pâl; ndâk ƀư, nkra, ntop tay ndoh ndơ ngih sam ƀŭt, jrô nti. Lơn lah, tâm nău chôt srê Covid-19 dôl geh jêr jŏt ri trong kan njrăng n’gang srê n’hanh đăp mpăn an kon hŏk, cán bộ, nai dơi kơl lor.

          Gay wơt rhơn rlău 400 kon hŏk bah 10 jrô mầm non năm nti 2021-2022, Ngih sam ƀŭt mầm non Hoa Ban, xă nkuăl jru Cư Kbang, nkuăl n’har bri Ea Súp lĕ nkra ăp jrô nti, ƀư mhe rgâl âk nsưng mpan, nkra ăp nkual pâl rlưn bah dih, răk rao lĕ rngôch ăp jâng gung tung rêng ngih sam ƀŭt. Nai Nguyễn Thị Hóa-Hiệu trưởng ngih sam ƀŭt nkoch.

          “Tâm rnôk UBND xă manh dŏng ngih sam ƀŭt ƀư nkual nkhah êng rgum njrăng n’gang srê, ri ngih sam ƀŭt ndăn mông nar ƀư trong kan săch. Tât nar 20/8 mhe rlău, rnôk UBND xă mplơ̆ tay ri ngih sam ƀŭt ƀư nkra, puh rao kaman lĕ rngôch jâng gung tung rêng ngih sam ƀŭt. Mpeh năp ndơ ndơ dŏng ntĭm n’hanh nti, ngih sam bŭt lĕ dơi gưl bah lơ uănh mĭn ntuh kơl rwăt âk ndơ pâl bah dih, 49 nsưng mhe n’hanh âk ndơ êng”.

Ăp Ngih sam ƀŭt mầm non ta nkuăl n’har bri Ea Súp lĕ nchrăp gay wơt rhơn kon hŏk.

          Ta xă n’har bri Ea Bung, nai Nguyễn Thành Đông-Hiệu trưởng Ngih sam ƀŭt THCS Ea Bung, an gĭt, năm nti 2021-2022 ngih sam ƀŭt geh 220 kon hŏk. Dŭt khay 7 mhe rlău, xă Ea Bung kơp dơn 7 nuĭh ntưp Covid-19, ntŭk kơt dŏng Ntĭm đă 16 bah Chính phủ gay njrăng n’gang srê. Yor nê, ăp trong kan nchrăp an năm nti mhe geh mbrơi. Jêh nar gŭ srang tâm ƀah, đah nău ntop kơl bah ăp gưl nău kan, trong kan nchrăp an năm mhe dôl jêh đŏng.

          “Mhe rlău ngih sam ƀŭt dơi UBND nkuăl ntop kơl prăk nkra 8 jrô nti, tâm nĕ geh 6 jrô nti ta nkual 2 dăp n’hanh 2 jrô ta rot jay cấp 4 n’hanh aƀaơ lĕ jêh; hôm tât aơ tay mbra nkra jay hiệu bộ. Êng ngih sam ƀŭt ri lĕ rwăt tŏng ăp ndoh ndơ, sam ƀŭt sam tra dŏng pă an nai n’hanh kon hŏk rhŏ uĕh trong kan ntĭm n’hanh nti. Mpôl hên lĕ mbơh tât me bơ̆ kon hŏk tă zalo, feacebook trong nchrăp plơ̆ ngih sam ƀŭt bah n’gâng kan ntĭm nti tâm nar 1/9”.

          Nkuăl Ea Súp aƀaơ geh 48 ngih sam ƀŭt ăp gưl bah mầm non tât THCS n’hanh giáo dục thường xuyên. Năm nti 2021-2022, ăp ngih sam ƀŭt geh 19.350 kon hŏk. Tĭng wa Nguyễn Văn Khóa-Kruanh jrô kan ntĭm nti nkuăl Ea Súp, nchrăp an năm nti mhe, ngih dak ntuh kơl rlău 12 rmen prăk nkra, ƀư mhe, ntop tay ndoh ndơ an ăp ngih sam ƀŭt. Tât rnôk aơ, ăp ngih sam ƀŭt nchrăp tŏng ăp ngih wâl, nai dâk jrô ntĭm mô lah trong nchrăp ntĭm, nchrăp tâm nar ƀư năm nti mhe.

          “Jrô ntĭm nti nkuăl lĕ ndâk ƀư ăp trong nchrăp tĭng tâm ăp sam ƀŭt ntĭm rđău bah gưl ka lơ gay ƀư tât lĕ rngôch hiệu trưởng ăp ngih sam ƀŭt trong kan ntĭm n’hanh nti kơt njrăng n’gang srê. Ăp nău lĕ ndâk njêng ăp trong ƀư, nău nchrăp, ndâk njêng ăp rmôt njrăng n’gang srê gay ntơm tâm năm nti mhe đăp mpăn an nsum mpôl nai, nuĭh kan n’hanh kon hŏk”.

Nkuăl Ea Súp rlak rlău 12 rmen prăk tơm prăk gay nkra ăp jrô nti.

          Wa Phạm Đăng Khoa, Kruanh n’gâng kan ntĭm nti n’gor Dak Lak an gĭt, gay nchrăp an năm nti mhe 2021-2022, ăp ntŭk kan ngih sam ƀŭt lĕ kơp uănh, ntop tay năp ndoh ndơ ntĭm nti, ndơ dŏng; ndâk ƀư, nkra tay ngih jrô nti, kơl lor ăp ndơ dŏng kơt jrô nti, thư viện, ngih ăch chrach, dak kloh uĕh; đăp mpăn ngih jrô, năp ndơ ntĭm nti rhŏ an ƀư bôk nău ntĭm nti phổ thông mhe đah jrô 1, 2, 6; kơp uănh, dăp rmôt nai tŏng ăp đah rnoh nuĭh, tâm ban mpeh dăp an n’hanh tâm di đah nău gĭt ntĭm nti.

          Gay đăp mpăn nău ntơm năm nti mhe 2021-2022 tĭng di nar năm nti dơi UBND n’gor an, UBND n’gor Dak Lak đă UBND ăp nkuăl, nkual têh, nkual ƀon têh ƀư tĭng kơp uănh tay rnoh nuĭh ƀon lan dôl ƀư tâm nkhah kon nuĭh ta ntŭk n’hanh rnoh ăp ntŭk ntĭm nti dơi rgum dŏng ƀư ntŭk nkhah rgum tă bah ƀon lan mât uănh gay dăp tay ăp nkual nkhah êng, mplơ̆ tay ngih sam ƀŭt an kon hŏk hăn nti. Wa Phạm Đăng Khoa, Kruanh N’gâng kan ntĭm nti n’gor Dak Lak an gĭt tâm rnôk srê Covid-19 tal 4, Dak Lak geh 113 ntŭk ntĭm nti dơi dŏng ƀư ntŭk nkhah êng, ntop kơl nău ƀư uănh năl, chuh vaccine. Năm nti mhe lĕ êp tât, nău ŭch jăch ndăn aƀaơ tŏng ăp ndơ đăp mpăn ngăn an kon hŏk n’hanh nai rnôk srê Covid-19 dôl dŭt jêr jŏt. Ngăn lah ta ăp ntŭk ntĭm nti tă dơi mpla dŏng gay ƀư nău kan njrăng n’gang srê:

“UBND n’gor lĕ geh sam ƀŭt đă ăp ntŭk rlu nău dŏng ăp ntŭk ta ngih sam ƀŭt rhŏ an trong kan njrăng n’gang srê gay ăp ngih sam ƀŭt geh nar răk rao nkra tay ngih jrô an năm nti mhe. Mpôl hên nchrăp kơp uănh tay, uănh lah ăp ndoh ndơ gay nkra, rwăt năp an năm nti mhe”.

Ndrel đah nĕ n’gâng kan ntĭm nti tâm rgop đah N’gâng kan dak si ƀư uĕh trong kan răk rao, puh kaman tĭng nău ntrŭnh n’hanh mplơ̆ di nâm ơm gay ăp ntŭk ntĭm nti nchrăp an trong kan ntơm ƀư năm nti mhe, tŏng ăp đăp mpăn an kon hŏk, nai rnôk tât ngih sam ƀŭt./.

          Nuĭh rblang: Y Sưng Phê Ja