VOV4.M’nông: Ăp nău khuch bah srê Covid-19 lĕ khuch mô jêt tât wăng sa-rêh jêng n’gor Dak Lak. Yơn đah nău nsrôih bah Đảng bộ, n’gâng kan, ƀon lan, Dak lak lĕ dơi geh ăp săk rnglăy uĕh tâm trong kan njrăng n’gang srê. Ăp ntŭk tâm n’gor mbrơi mbrơi rgâl an nu nău tâm di gay đăp mpăn, rdâk hao wăng sa, đăp mpăn nău rêh jêng kon nuĭh tâm nău mhe.

Lah ngoăy tâm âk ntŭk geh 22 nuĭh ntưp Covid-19 ta thôn 6 n’hanh thôn 7 xă Vụ Bổn, Krông Pắk tâm rơh srê tal 4, yơn đah nuih n’hâm ƀư tĭng ntĭm rđău bah Thủ tướng Chính phủ: “Du xă, phường lah du hê hăn lor, du rmôt, lơn lah rmôt njrăng n’gang Covid-19 ntŭk gŭ rêh lah ntŭk hăn lor”, Đảng bộ, n’gâng kan n’hanh nuĭh ƀon lan xă Vụ Bổn lĕ ngăch dơi uănh nđôi nu nău, nking n’gang srê, nta an wăng sa-rêh jêng ƀon lan hun hao tay. Wa Lê Viết Nhượng, Bí thư Đảng ủy, Kruanh Ƀan ntĭm rđău njrăng, n’gang srê Covid-19 xă Vụ Bổn, nkuăl Krông Pắc, n’gor Dak Lak an gĭt:

          “Xă lĕ sŏk nău njrăng, n’gang srê lah nău lor bôk năp. Nău mĭn êng mpeh ntĭm rđău đah nău rƀŏng nsum lah nkre njrăng n’gang srê yơn nkre ntop kơl an nkra njêng hun hao. Tâm rnôk mhe rlău, ƀư tĭng ntĭm rđău bah Thủ tướng ri xă lĕ uănh tay Ƀan ntĭm rđău n’hanh ndâk njêng mhe Ntŭk ntĭm rđău njrăng n’gang srê n’hanh lĕ ntop trong ƀư njrăng, n’gang srê tâm nu nău mhe. Tâm nĕ geh nău ƀư tĭng nău rƀŏng nsum, nta an nuĭh ƀon lan nkra njêng”.

Nuĭh ƀon lan Dak lak nsrôih pah kan nkra njêng n’hanh tĭng rjăp ăp nău ntrŭnh njrăng n’gang srê.

          Ta nkuăl Ea Hleo, n’gor Dak Lak lĕ kơp dơn âk nuĭh ntưp đah Covid-19, tâm nĕ geh âk nuĭh ntưp tâm ntŭk gŭ rêh ƀư khuch tât nău ƀư nkra njêng, tăch rgâl, ntuh kơl n’hanh nău rêh bah nuĭh ƀon lan. Bah nău nău rvê,m duh jêr bôk năp, tât aƀaơ đah nău lăp dŭt n’hâm bah trong chính trị ndrel đah nău nsrôih bah ăp rơh kơn nuĭh ƀon lan, nkuăl Ea Hleo lĕ mĭn uănh nđôi nu nău chôt srê, nkre ƀư tĭng geh săk rnglăy âk rnoh an ƀư hun hao wăng sa-rêh jêng 9 khay bah năm 2021. Tât aƀaơ hin, nkuăl lĕ kuăl jă, wăch rgum geh 21 nău nchrăp ƀư ntuh kơl tâm nkuăl đah dĭng lĕ rnoh prăk nchrăp geh bơi 2.500 rmen prăk. Yor nê, ndrel đah nău đăp mpăn srê, ri nău kan mât đăp mpăn chính trị hun hao wăng sa dôl dơi lĕ trong chính trị, nuĭh ƀon lan n’hanh doanh nghiệp dŭt uănh tât. Wa Vũ Đình Tân, Kruanh Công ty Cổ phần Điện sial Trung Nam-Dak Lak 1, doanh nghiệp geh nău nchrăp ƀư dôl dơi ƀư ta nkuăl Ea Hleo an gĭt:

          “Aƀaơ hin, nău nchrăp bư dôl tâm rnôk hô ngăn bah trong kan rdêng n’hanh nglăp. Đah trong kan ndâk njêng ri mpeh công ty lĕ nchrăp ƀư, lơn lah ăp ntŭk mô nâp lĕ an ƀư bê tông lĕ rngôch. Yor nê, đah nău trôk nar ri mô khuch tât trong kan ndâk ƀư n’hanh nglăp. Knŭng geh nău aƀaơ, bah năp nu nău chôt srê kơt nê mpeh công ty lĕ nchrăp ôp đah ăp nuĭh way kan dak bah dih ƀư ăp sam ƀŭt sam tra sĭt Việt Nam ơm n’hanh ƀư nkhah êng, đăp mpăn ăp nău ntrŭnh bah Chính phủ n’gluh an. Tâm ban đah nĕ ri đah cán bộ, phung pah kan bah công ty ta ntŭk ƀư lĕ rngôch lĕ dơi uănh rjăp hăn luh lăp ntŭk kan đah ntŭk gŭ bah nơm dơi ƀư mbơh săk soan...

          Tĭng wa Phạm Minh Tấn, Groi bí thư rnâng kan N’gor ủy Dak Lak: Chôt srê Covid-19 têh lĕ ƀư khuch dŭt âk tât nău rêh bah nuĭh ƀon lan kơt nău hun hao nsum bah kon nuĭh, tât aƀaơ nu nău chôt srê ta n’gor lĕ, dôl dơi uănh nđôi n’hanh ntrôl rŭch. Ăp rnoh an đah wăng sa-rêh jêng 9 khay mhe rlău hôm e hao nkôp đah rơh aơ năm 2020. Hao jêng wăng sa bah n’gor 9 khay geh 5,28%. Dĭng lĕ sŏk an tơm prăk ngih dak ta n’gor geh 5.500 rmen prăk, tâm ban 74,5% nchrăp an HĐND n’gor jao, hao 3% nkôp đah rơh aơ. Yơn lah, gay ƀư dơi ăp nău kan năm 2021 tĭng Nghị quyết bah n’gor ủy lĕ n’gluh an, khay tât, ăp gưl ủy, n’gâng kan ƀon lan, nsum mpôl; ăp ngih pah kan, ntŭk kan, ƀon lan tâm n’gor hôm e tĭng nu nău ngăn, n’gluh an ăp trong mkra, ndâk ƀư tĭng ngăch, săk rnglăy đah nuih n’hâm n’hao prêh, hăn ndrel trong kan njrăng n’gang srê đah hun hao wăng sa-rêh jêng, đăp mpăn rnă njrăng bri dak. Wa Phạm Minh Tấn, Groi bí thư rnâng kan n’gor ủy Dak Lak lah rjăp:

          “Chôt srê Covid-19 khuch bơi 2 năm aơ lĕ khuch dŭt âk tât hun hao wăng sa-rêh jêng, yơn he n’gluh an bôk năp nău geh, nău geh tâm di bah nuĭh ƀon lan n’hanh ƀư tĭng mro di nău ntĭm rđău bah Trung ương, bah Chính phủ ƀư tĭng nău kan “Nsum”, nkre rgum hun hao wăng sa-rêh jêng, nkre đăp mpăn njrăng n’gang srê Covid-19 n’hanh ăp ntil tăch rgâl êng. Mô thơ tha, mô ƀư lhoi, mô roh nău njrăng gay m’hâm ƀư nta an ăp nău dơi uĕh ngăn gay he rgum ăp nuĭh gay đăp mpăn chính trị, hun hao wăng sa-rêh jêng, đăp mpăn rnă njrăng bri dak, ndâk njêng trong chính trị tâm lam n’gor”.

          Đah nsrôih ƀư dơi “Nău rƀŏng nsum” mpeh njrăng n’gang srê Covid-19 săk rnglăy n’hanh lôch jêh ăp nău rƀŏng mpeh hun hao wăng sa-rêh jêng tâm năm 2021, Đảng bộ, n’gâng kan ƀon lan ăp rnoi mpôl đêt n’gor Dak Lak dôl mĭn rgâl nu nău tĭng nuih n’hâm Nghị quyết an manh ntrŭnh lor “Tâm di đăp mpăn, ngăch, uănh nđôi tam Covid-19”./.

          Nuĭh rblang: Y Sưng Phê Ja