VOV4.M’nông:  Rnôk dăch aơ geh âk rbăn nuĭh bah ăp n’gor mpeh bah Dâng sĭt Dak Lak. Ăp rmôt kan Covid-19 nsum mpôl lĕ mât uĕh săk rnglăy, nkoch trêng n’hanh groi nđôi nuĭh ƀon lan ƀư uĕh nău nchăng n’gang srê bah ăp rnăk.

Ƀon Hluk, xă Ea Tiêu, nkuăl Chư Kuin, n’gor Dak Lak mhe geh bơi 20 nuĭh ƀon lan bah ăp n’gor mpeh bah Dâng sĭt, an nkhah êng ta jay. Wa Y Nguă Byă, kruanh rmôt kan Covid-19 ntŭk gŭ rêh ƀon Hluk an gĭt: rmôt kan mô knŭng uănh nđôi groi nđôi nuĭh nkhah êng ta jay mô lah tâm mir, ma ƀa ƀơ nkah ntĭnh ăp nuĭh tâm ƀon n’hŭch hăn nsong, mâp, ƀư tĭng rjăp nkô̆ nău 5K. Wa Y Nguă geh kon bu ur n’hanh klăy mhe sĭt bah nkual srê ƀư tĭng rjăp kơt nĕ.

“Kon bu ur đah klăy hăn kan ta Bình Dương sĭt lah geh nău ntrŭnh bah UBND xă an nkhah êng 14 nar ta jay, jêng lah mô dơi luh bah dih, mô dơi mâp đah kônh wa. 2 hê ur sai an gŭ jay êng, nkhah êng knŭng geh 2 hê ur sai dơm. Hôm phe, dak ngêt, ndơ sa ŭch ri kuăl điện thoại, jêh nĕ gâp djôt tât an kon, mô dơi mâp dăch”.

Ƀon Hluk geh nklăp 150 rnăk yơn geh tât 5 rmôt kan Covid-19 ntŭk gŭ rêh. Ăp nău mbơh srê na nao uănh, đah nău nkoch trêng ƀa ƀơ bah ăp rmôt, kônh wa tâm ƀon lĕ wât tĭng nău ntrŭnh 5K njrăng n’gang srê. Ntoh lư kơt nău khĭt ôm, kônh wa ƀư dơh ngăch, đêt nuĭh tât. Wa Y Sách Bkrông, Kruanh ƀon Hluk an gĭt:

Rmôt kan Covid-19 ntŭk gŭ rêh ƀon Hluk.

“Khĭt nar aơ ri ôi taơ khân pơng tâp dâl. Kônh wa hăn râng jêh nĕ sĭt, mô dơi gŭ jŏ tay. Rgâl dŭt âk, ngăch ngăn, mô geh roh prăk, âk nar, âk mông tay. Yor njrăng n’gang srê đah lŏ jêr jŏt ri ntlơi lĕ. Aƀaơ lah jŏ nar 3-4 nar, lơ âk nar ri prăk lơ âk. 2 tay khân pơng gĭt wât, nău aơ rnăk geh âk ƀư âk, oh nô khân pơng dăch ngăn mư gŭ tay dơm, mô hôm rgum âk nuĭh tay”.

Nkuăl Cư Kuin lah ntŭk bôk năp ta Dak Lak ntoh ntŭk srê Covid-19 tâm ăp ƀon lan nuĭh rnoi mpôl đêt. Nkuăl lĕ lôch jêh tâm nău nking n’gang chôt srê, rdâk hao tay “nâm ơm mhe” bah dŭt khay 8. Gay nuĭh ƀon lan wât tĭng rjăp trong kan njrăng n’gang srê, ăp rmôt kan Covid-19 ntŭk gŭ rêh lah ăp nuĭh groi nđôi, ăp nar nkoch trêng, nkhah ntĭnh. Du rmôt kan kơt nĕ bah 4-5 nuĭh, geh nuĭh dơi nsing nơm tâm ntŭk gŭ rêh, đảng viên, cán bộ ăp rmôt kan nsum mpôl, n’gâng kan xă: Wa Y Min Ê Nuôl, Bí thư đảng ủy xă Ea Tiêu, nkuăl Cư Kuin lah:

“Tâm pă du hê du nău kan du ntŭk, du thôn ƀon. Jêh rmôt kan ntŭk gŭ rêh an mbơh đah UBND xă, rnâng kan đảng ủy, rmôt, thôn, ƀon mô tĭng rjăp lah an mbơh ngăch geh trong rmal, tâm nchră. Rmôt kan ntŭk gŭ rêh oh nô hăn kan mô klach mih, duh, măng nar, jêng mhe aơ rmôt kan Covid-19 ntŭk gŭ rêh ƀư dŭt uĕh”.

Ndâk ƀư trong njrăng n’gang srê ntơm bah tâm ăp ƀon lan dâl.

          Wa Lê Thái Dũng, Bí thư nkuăl ủy Cư Kuin an gĭt: Knŭng tâm 1 pơh, ƀon lan geh rlău 1.000 nuĭh sĭt bah ăp n’gor mpeh bah Dâng. Tâm rnôk srê jêr jŏt, an groi nđôi jru lơn, nkuăl lĕ ƀư tât 547 rmôt Covid-19 ntŭk gŭ rêh. Aƀaơ ăp rmôt kan Covid-19 ntŭk gŭ rêh dôl mât săk rnglăy gay groi nđôi, nkhah êng nuĭh ƀon lan sĭt n’gor.

          “Ndâk njêng 547 rmôt kan Covid-19 ntŭk gŭ rêh lam nkuăl gay tâm pă jêt, du rmôt kan Covid-19 knŭng mât uănh 20-30 rnăk dơm ri nău uănh nđôi, groi uănh, ngăn lah nuĭh pah kan bah ăp n’gor mpeh bah dâng, ta nkaul srê hăn sĭt ri an mât uĕh rmôt kan aơ, lơn lah ta ăp ƀon. Cư Kuin mĭn kơp “Lơh srê đah lơh krap mpôn”, jêh lah an tâm pă jêt, bah thôn, ƀon jêh nĕ mư tât xă, jêh nĕ jêr ir mư hăn tât nkuăl”.

          Nău ndâk njêng trong njrăng n’gang srê ntơm bah ăp ƀon lan dâl, ndrel đah ăp trong mkra dŭt n’hâm, lĕ rgop kơl nkuăl Cư Kuin du khay n’gul lĕ rlău mô geh nuĭh Covid-19 ntưp tâm ntŭk gŭ rêh./.

          Nuĭh rblang: Y Sưng Phê Ja