VOV4.M’nông: Ndrel đah âk ntŭk ta lam dak, n’gor Dak Lak dôl nsrôih ntrôl ngăch trong kan chuh vaccine njrăng n’gang Covid-19 tâm rnôk nu nău srê ta ntŭk dŭt jêr jŏt. Lơn lah, nău chuh vaccine dôl dơi n’hao an ăp ƀon lan rnoi mpôl đêt, ntŭk kan njrăng n’gang srê hôm e âk nău hŭch n’hanh ntoh âk ntŭk srê ntŭk gŭ rêh.

 Mhe dơi chuh nglai tal 2 vaccine Covid-19, nô Y Dhuen Buôn Krông, rnoi Êđê, ta ƀon Ea M’dhar, xă Ea Nuôl, nkuăl Buôn Đôn, n’gor Dak Lak rhơn an gĭt, aơ lĕ rơh chuh vaccine tal 4 ƀư an ƀon lan. Tât aƀaơ, lĕ rngôch nuĭh têh tâm ƀon lĕ dơi chuh vaccine, bah aƀaơ nău rvê Covid-19 mbra dơi oi, ăp nuĭh mbra đăp mpăn pah kan, jan sa.

“Jêh rnôk chuh vaccine, bah nar nđaơ tât nar aơ, gâp saơ tâm săk ngăch dăng, mô geh ji, gâp saơ dŭt đăp mpăn, mô klach rvê du ntil. Gâp dăn lah uĕh Đảng, ngih dak lĕ uănh mĭn, nta an lĕ rngôch kônh wa dơi hăn chuh vaccine, gâp ŭch njuăl tât kônh wa hăn chuh vaccine, chuh gay mât njrăng săk he nơm, mô geh ndơ khuch”.

Wa H Plôly Ê Ban, Groi kruanh ƀon Ko Đung B, xă Ea Nuôl, nkuăl Buôn Đôn, an gĭt, jêh 4 rơh n’gâng kan ƀon lan n’hanh nău kan dak si ƀư chuh vaccine njrăng Covid-19 ta ntŭk lĕ kơl bơi lĕ rngôch 700 nuĭh rlău 18 năm deh tâm ƀon lĕ dơi chuh vaccine. Tĭng wa Plôly, bôk năp nuĭh ƀon lan hôm e klach, tâm nău chuh vaccine n’hanh n’gâng kan ƀon lan, nău kan dak si lĕ nsrôih rgŏ jă, nkoch trêng, kơl kônh wa lĕ wât nău uĕh bah nău chuh vaccine. Tă bah nĕ, ăp rơh chuh vaccine bah kơi ri kônh wa wa lơ nsrôih rƀŏng tĭng:

“Kônh wa ta ăp ƀon lan dŭt rhơn rnôk geh nar dơi hăn chuh vaccine, kônh wa rhơn ngăn, geh nar kônh wa hăn chuh lĕ, lơn lah kônh wa bah năm bah 18 let lơ. Aƀaơ tâm ƀon aơ lĕ dơi chuh njrăng n’gang bơi lĕ, hôm tâm 15% mô hŏ dơi chuh yor kônh wa dôl dŏng dak si n’hanh geh kop ji ơm”.

Ƀĭt joet du nar chuh vaccine njrăng Covid-19 ta ƀon lan, wa Phùng Thị Tý, Groi kruanh ngih dak si xă Ea Nuôl, nkuăl Buôn Đôn an gĭt, bah năp đaơ ngih dak si lĕ tâm rgop rjăp đah n’gâng kan ƀon lan xă n’hanh 3 ntŭk mât uănh êng ta ƀon nchih săk nuĭh dơi chuh, jêh nĕ mbơh lam hvi gay kônh wa gĭt nar. Rnôk aơ dôl yan pah kan bah kônh wa jêng trong kan chuh vaccine an ƀư ngăch gay đăp mpăn nău kan bah kônh wa mô geh khuch, way ăp ƀon nsrôih ƀư ngăch jêh tâm du nar.

“Ngăn lah tâm yan aơ, ƀon lan ndăn, ŭch chuh jêh gay sĭt hăn pah kan. Trong ƀư ri mpôl hên nsrôih pă nuĭh m’hâm ƀư nar chuh bah dih mông âk lơn. Ntĭt nsa kơt mông ôi ơm mpôl hên dơi chuh tât 12h, kêng măng dơi chuh tât 6h”.

Wa Trịnh Quang Tấn, Kruanh UBND xă Ea Nuôl, nkuăl Buôn Đôn an gĭt, xă geh rlău 13.000 nuĭh ƀon lan, đah nklăp 3.900 nuĭh rlău 18 năm deh, rnoh nuĭh ƀon lan rnoi đêt ta ntŭk geh nklăp 50%. N’gâng kan ƀon lan xă dŭt rhơn rnôk nar dăch aơ rnoh vaccine njrăng Covid-19 dơi pă sĭt âk, kơl an lam hvi vaccine hao ngăch. Aƀaơ dôl rơh tal 4 n’hanh bah kơi aơ, bơi 100% nuĭh rlău 18 năm deh ta xă lĕ dơi chuh vaccine. Tĭng wa Tấn, gay ăp nar chuh ta ƀon lan dơi đăp mpăn, săk rnglăy n’hanh tŏng ăp nău ŭch njrăng n’gang srê, xă rgŏ jă lĕ trong chính trị lăp nkoch trêng, rgŏ jă nkre nkah ntĭnh kônh wa hăn chuh di mông, mât tâm ƀah, đăp mpăn tĭng nău way 5K:

“Mpôl ntĭm rđău xă, Mpôl ntĭm rđău bah nkuăl dŭt uănh tât, ntĭm rđău rjăp, jêh nĕ rmôt mbơh uănh ngăch bah ƀon lan, nkre nkoch trêng đah nău ngơi yuăn, nkre nkoch trêng đah nău ngơi Êđê, tĭng rnăk ri mpôl hên pă sam ƀŭt gay ăp rnăk đăp mpăn trong kan njrăng n’gang srê”.

                    Nuĭh rblang: Y Sưng Phê Ja