VOV4.M’nông - Rƀŏng tĭng nău kuăl jă lam ƀon lan rgum soan njrăng n’gang srê Covid-19, ndrel đah lam dak, nuĭh ƀon lan ta Dak Lak dôl nsrôih rgop prăk, kơl prăk nkrem rwăt vaccine n’hanh ăp nău ƀư njrăng n’gang srê. Âk rmôt kan, doanh nghiệp n’hanh nuĭh ƀon lan, bôl hôm e dôl rdâng đah âk jêr jŏt tâm nkra njêng, tăch rgâl n’hanh nău rêh yơn hôm e nchrăp râng rgop soan nuĭh, drăp ndơ yor nsum mpôl.

         Săk ranh n’hanh mô blău dŏng điện thoại mhe, wa Y Tuaih Niê, rnoi Êđê, ta phường Ea Tam, nkual ƀon têh Buôn Ma Thuột, n’gor Dak lak lĕ đă kon bu ur gay ndơ̆ prăk kơl prăk nkrem rwăt vaccine njrăng n’gang srê Covid-19. Wa Tuaih nkoch, uănh nđôi nu nău báo chí, wa lĕ saơ nău klach bah srê n’hanh nău ŏk r’ah bah ăp nai dak si ta ntŭk njrăng n’gang srê. Wa ŭch rgop jêt gay ndrel lam dak njrăng n’gang srê Covid-19.

         “Rgop prăk nkrem rwăt vaccine njrăng n’gang srê Covid-19 ri gâp rnê rhơn n’hanh kơl. Yor tâm nĕ khlay đŏng gay njrăng n’gang săk soan n’hanh njrăng n’gang Covid-19”.

Âk nuĭh, rmôt kan n’hanh doanh nghiệp râng kơl prăk nkrem rwăt vaccine n’hanh ndơ njrăng n’gang srê n’gor Dak Lak

         Mô knŭng nchih njuăl kơl tă bah điện thoại, wa Phan Quang Vũ, Groi kruanh Công ty cổ phần thủy điện Buôn Đôn, an gĭt, rƀŏng tĭng nău kuăl jă bah Ủy ban mặt trận tổ quốc Việt Nam n’gor Dak Lak, công ty lĕ rgŏ jă ăp cán bộ nuĭh kan rgop, rgŏ jă geh 50 rkeh prăk kgay kơl njrăng n’gang srê.

         “Rƀŏng tĭng nuih n’hâm kuăl jă lam dak ndrel ty, ndrel soan njrăng n’agng srê Covid-19 ri công ty lĕ rgŏ jă ăp cán bộ phung pah kan đêt ngăn du nar prăk khay, n’hanh êng công ty geh rlak bah prăk nkrem n’hanh prăk êng bah công ty. Nuih n’hâm cán bộ phung pah kan dŭt kơl nău rgop aơ, geh âk nuĭh ŭch êng rgop tay ma nău ntrŭnh bah công ty. Mpŏng nuh srê ơm rlău, du hê geh nău wât gay ơm rlău bah srê aơ”.

                   Hôm tĭng wa Vũ Đình Tân, Kruanh Công ty cổ phần điện sial Trung Nam Dak Lak, mô knŭng rgop tâm prăk nkrem rwăt vaccine, mpôl kruanh Tập đoàn lĕ ntĭm ăp ntŭk kan nsrôih kơl tâm trong kan njrăng n’gang srê ta ăp ntŭk bôl ƀư nău nchrăp nkra njêng. Êng ta Dak Lak, Tập đoàn lĕ rgop du rmen prăk gay kơl prăk rwăt vaccine n’hanh năp ndơ njrăng n’gang srê.

         “Đah Chính phủ ri mhe rlău Tập đoàn Trung Nam lĕ ntop kơl an Chính phủ 1 rkeh đôlar mpeh vaccine njrăng n’gang srê Covid-19,. Hôm đah n’gor aƀaơ tập đoàn lĕ ntĭm rđău an ăp công ty nuĭh pah kan an geh nău kan, rlău ma nău kơl vaccine ri công ty mbra ntop kơl tay”.

Mô knŭng rgop prăk rwăt vaccine, âk ntŭk kan hôm râng rgop tâm nău ƀư njrăng n’gang srê ta ntŭk

         Tĭng wa Lê Xuâng Sương, Groi kruanh rnâng kan Ủy ban MTTQ Việt Nam n’gor Dak Lak, knŭng jêh 1 pơh njuăl nău kuăl jă rơh njrăng n’gang srê Covid-19, ntŭk kan lĕ sŏk dơn rlău 5,1 rmen prăk bah ăp rmôt kan, êng nuĭh n’hanh doanh nghiệp rgop, kơl. Bah nău rgop aơ, n’gor mbra geh trong nchrăp rwăt vaccine, ndơ năp ntop kơl ntŭk bôk năp njrăng n’gang srê.

         “Rnôk rgŏ jă ăp rơh lah nsum geh tât râng dŭt âk. Bôl tâm nu nău srê tăch rgâl jêr jŏt yơn đah nuih n’hâm nsum, ăp nuĭh doanh nghiệp, ngân hàng, ăp nuĭh lŏng bôk tôr n’hanh ăp rnăk tăch rgâl rgop sĭt prăk kơt đah ndoh ndơ. Rlău ma ăp rơh kơn nuĭh ƀon lan, âk nuĭh khân pơng dŭt âk jêr jŏt yơn khân pơng hôm e rlak du đêt tâm rnăk wâl gay njuăl tât nkual srê, đê̆ đŏng geh prăk ri khân pơng njuăl tât ăp ndơ”.

         Tâm rơh srê aơ, n’gor Dak Lak lĕ kơp dơn 4 nuĭh Covdi-19. Bôl dôl an rdâng đah âk jêr jŏt khuch bah srê, yơn nuĭh ƀon lan, nsum mpôl n’hanh doanh nghiệp ta ntŭk aơ dôl ndrel soan rgop ơm ntrôl rŭch srê.

Nuĭh rblang: Y Sưng Phê Ja