VOV4.M’nông: Rnôk aƀaơ, Dak Lak geh rlău 600 nuĭh ntưp Covid-19 tâm nĕ rlău 100 nuĭh lĕ dơi săm bah ji. Dak Lak geh âk nuĭh pah kan ta nkual ƀon têh HCM n’hanh n’gor Bình Dương, Đồng Nai plơ̆ sĭt, geh ntŭk srê n’hanh lĕ jêng F0. Knơm ƀư tĭng rjăp nău nkhah êng, nchoeng n’gang ăp ntŭk ntoh srê, jêng ăp ntŭk bah Dak Lak lĕ nsrôih nking n’gang lôch uĕh nău ntưp srê ta ntŭk gŭ rêh.

          Knŭng êng xă Quảng Hiệp, nkuăl Cư M’gar lĕ geh bơi 1.000 nuĭh bah nkual ƀon têh HCM n’hanh Bình Dương plơ̆ sĭt dêr srê. Tâm nĕ geh tât 100 nuĭh hăn đah ndeh măy. Knơm ƀư tĭng uĕh nău mbơh săk soan, nkhah êng rgum, jêng ta xă Quảng Hiệp lĕ geh 6 nuĭh ntưp đah Covid-19 yơn mô ntưp ta ntŭk gŭ rêh. Wa Ngô Minh Đức, Kruanh UBND xă Quảng Hiệp an gĭt: Xă geh dŭt âk oh kon bah kônh wa rnoi mpôl đêt hăn pah kan ta ăp n’gor mpeh bah dâng. Khân pơng tâm rnăk ach o jêng rnôk sĭt dêr srê mô tŏng ăp ntil. N’gâng kan ƀon lan, nsum mpôl lĕ rgŏ jă ăp rnăk geh ndơ kơl, tâm pă đăp mpăn nuĭh nkhah êng tŏng ndơ sa, dak ngêt n’hanh ăp ndơ dŏng khlay. Wa Đức an lah: Yor nău ƀư tĭng rjăp ƀư nkhah êng dak si đah nuĭh n’hanh nuĭh, rnăk wâl đah rnăk wâl ma srê mư mô dơi ntưp luh ntŭk gŭ rêh.

          “Tâm rnôk nkhah êng ri xă ƀư ndâk njêng du thôn du rmôt groi nđôi gay uănh nuĭh nkhah êng ta jay. Tă bah uănh nđôi, saơ ăp nuĭh mâp jêr jŏt ri xă ngăch rgŏ jă ăp nuĭh ƀon lan, ăp nuĭh lŏng bôk tôr nsrôih râng đah n’gâng kan ƀon lan, ntop kơl phe, ntop kơl mì tôm n’hanh ăp ndơ khlay êng tŏng ăp gŭ âm ăp nar. Lah ăp nuĭh aƀaơ dôl khan ta ăp nkual srê ma ŭch sĭt ri mbra tĭng ntĭm rđău bah UBND n’gor mbra ndơ̆ sĭt, lah geh ŭch. Đah ƀon lan rnôk ăp nuĭh ƀon lan sĭt nchrăp wơt n’hanh mbra geh nkual nkhah êng dak si, n’hanh ơm ntop kơl gay kônh wa đăp mpăn gŭ tâm nkual nkhah êng”.

Buôn Khóa, xă Cư Pui, nkuăl Krông Bông nar bôk năp dơi rơih jăng nchoeng n’gang

          Mpôl hên tât ƀon Khóa, xă Cư Pui, nkuăl Krông Bông tâm nar bôk năp dơi rơih jăng nchoeng n’gang. Kônh wa nuĭh Êđê ta aơ lĕ plơ̆ tay đah ăp nău gŭ âm ăp nar kơt hăn tâm lŏ pơk dak, mât chăm mir cà phê, siăt pih an ndrôk rpu... Yơn lah ăp nuĭh wăn bok put mbung n’hanh mât tâm ƀah đăp mpăn. Khân pơng dŭt đit rnôk tâm mâp đah nuĭh mha yor mhe rlău ăp nar gŭ mpôn klach rvê. Nar 23/7, geh 2 hê oh kon bah ƀon Khóa plơ̆ sĭt bah Bình Dương lĕ ntưp Covid-19. Bah 2 nuĭh aơ, 26 nuĭh ta ƀon Khóa lĕ ntưp Covid-19. Nĕ lah mô hŏ kơp tât âk F1.

Nkoch bri đah nô Y Nghị Mlô rnoi Êđê ta ƀon Khóa. Nô Nghị an gĭt: Aơ lah rơh bôk năp jêh 21 nar nkhah êng, nô hăn mât chiăp ndrôk. Ur n’hanh kon lĕ geh ntưp Covid-19, lĕ dơi njŭn săm. Y Nghị lah F1, jêng 3 pơh mro gŭ tâm jay, đah 8 rơh dơi cán bộ dak si tât sŏk uănh năl mham yơn lap mô ntưp da dê.

          “Tâm rnôk nkhah êng, gâp dŭt lah uĕh đah ngih pah kan dơi kan lĕ nta an, ntop kơl an gâp ndơ ngêt sa gay gâp đăp mpăn nkhah êng ta jay, mô hăn luh bah dih gay dêr ntưp rêng. Gâp dŭt đăp mpăn”.

          Wa Nguyễn Văn Tâm, Bí thư Đảng ủy xă Cư Pui an gĭt, tâm rnôk bah năp lĕ rngôch trong chính trị bah xă lĕ ƀư 4 ta ntŭk đah dŭt n’hâm nking n’gang, mô an ntŭk srê ntoh. N’hanh tât nar 17/8 mhe rlău, lĕ rngôch ăp nkual nchoeng n’gang lĕ plơ̆ tay gŭ âm nâm ơm.

Wa Nguyễn Văn Toàn, kruanh UBMT xă Cư Pui an lah: Nkô̆ nău ntrŭnh lôch uĕh tâm nău nking n’gang ntưp luh ntŭk gŭ rêh nĕ lah: Tĭng rjăp 5 K. Tâm nĕ nău “Nuĭh ntŭk gŭ ri gŭ ta nĕ” lah nău khlay, an ƀư tĭng du trong rjăp. An 178 rnăk bah ƀon Khóa ƀư tĭng rjăp nău nchoeng n’gang, nkhah êng, n’gâng kan ƀon lan lĕ treh ndrăng tĭng rnăk bah lam ƀon đah nău ngăn rnoh nuĭh F0, F1. Xă ndâk njêng rmôt rchăng n’gang srê đah rmôt dak si, công an, kâp njrăng êng ta ntŭk măng nar. Khân pơng gĭt kloh ntŭk, gĭt nău rêh tĭng rnăk tâm nkual nchoeng n’gang gay ntĭm, mkra nu nău bah tu tơm. Lơn lah, rmôt aơ lĕ rdêng, pă ăp ndoh ndơ sông sa an ăp rnăk tâm nkual nchoeng n’gang. Wa Nguyễn Văn Toàn mĭn lah:

          “Ta năp nău uănh mĭn ntĭm rđău bah gưl ka lơ kơt bah gưl ủy n’gâng kan ƀon lan lĕ n’hêl na nê̆, groi nđôi, lơn lah groi đah nuĭh ƀon lan. Mpôl hên geh ƀư hăn lor ta ntŭk ntoh srê, ƀa ƀơ gĭt nu nău ŭch, lơn lah nkah ntĭnh kônh wa nuĭh gŭ ta jay nuĭh nĕ, mô hăn bah dih. Mô tŏng đah ndơ ngêt sa, mô lah ăp ndơ ri geh ăp rmôt hăn lor rhŏ kơl. Bah piăng sa, dak ngêt, ndơ dŏng ăp nar rmôt cán bộ bah xă tât thôn ƀon dŭt n’hâm, lĕ đah nău kan”.

          Chah chrai ta Krông Bông hôm e geh ăp nuĭh F0, yơn aơ lah ăp nuĭh tâm nkual nkhah êng. Bah bôk khay 8 tât aƀaơ Krông Bông ntoh nuĭh ntưp Covid-19 tâm ntŭk gŭ rêh. Wa Lê Văn Long, Kruanh UBND nkuăl Krông Bông mĭn lah: Rnôk lĕ trong chính trị lăp du trong rjăp, dŭt n’hâm nkre nta nơih, gĭt wât tĭng rjăp bah nuĭh ƀon lan ri nkual hô srê mbra dơi nking n’gang:

“Krông Bông lah nkuăl bôk năp ntơm ƀư 37 nkual nkhah êng rgum n’hanh bơi 1 rbăn nuĭh dơi nkhah êng rgum bah nar 24/7 tât aƀaơ. Ăp nuĭh ntưp dŭt âk ăp nuĭh geh ntŭk srê sĭt n’hanh dôl nkhah rgum ta nkual nkhah bah nkuăl ri geh ntoh nuĭh ji dơi njŭn hăn săm ta n’gor. Hôm ƀa ƀă mô geh ntoh ntưp rêng tâm ntŭk gŭ rêh. Yor nê srê mô ntưp rêng. Aƀaơ ta nkuăl lĕ jêng ăp nkual bah oi, nta an ăp nău dơh an nuĭh ƀon lan ăp rnoi mpôl đêt ta ntŭk rgum hun hao wăng sa, hăn ndrel njrăng n’gang srê tâm nar tât geh uĕh lơn”.

Nău kan dak si n’gor Dak Lak sŏk ntil ndơ kaman nuĭh ƀon lan ta xă Cư Pui, nkuăl Krông Bông gay uănh nđôi Covid-19 rnôk ntŭk kơp dơn nuĭh ntưp Covid-19

Ntŭk srê mhe ngăn dơi saơ ta buôn Kwang A, xă Cư Bao, nkual têh Buôn Hồ. Aơ lah rkum ntưp ntŭk gŭ rêh têh tal 2 ta Dak Lak kơp bah rơh srê tal 4 ntoh. Rnôk geh năl mpeh rkum ntưp 29 nuĭh F0 ta buôn Kwang A, bah n’gul măng nar 19/8/2021, UBND nkual ƀon têh Buôn Hồ lĕ kơt dŏng Ntĭm đă 16, ƀư tĭng ăp trong jăch njrăng n’gang srê Covid-19 ta lam xă Cư Bao. Wa Phạm Ngọc Tiên, Bí thư Đảng ủy, Kruanh UBND xă Cư Bao an gĭt, Ƀan  ntĭm rđău njrăng n’gang srê Covid-19 xă Cư Bao lĕ đă rmôt rnă njrăng, mât uănh nău rêh an ăp rnăk tâm nkual nchoeng n’gang.

“Tâm rnôk nchoeng n’gang ri mpôl hên nkoch trêng rgŏ jă ăp nuĭh lŏng bôk tôr hăn ndrel đah Ƀan ntĭm rđău bah xă gay kơl, nta nơih ntop kơl an nuĭh ƀon lan tâm nkual he nchoeng n’gang geh nău rêh đăp mpăn mô an rnăk ji ngot, rnăk mô tŏng sa”.

Tĭng nai dak si Trần Kim Long, mât uănh khoa Njrăng n’gang kop ji tâm ntưp rêng, Ntŭk uănh nđôi kop ji n’gor Dak Lak, kơp tât dŭt pơh bah năp, rmôt dak si lĕ ntơm joi, sŏk ntil kaman test ngăch an bơi 1 rbăn nuĭh geh tât rkum ji. Êng Nông trường Cư Bao, tâm Công ty Cổ phần Cao su Dak Lak (Dakruko), rnôk dơn nău mbơh tâm Nông trường geh du đêt phung pah kan ntưp đah Covid-19, kruanh nông trường lĕ tâm rgop đah CDC n’gor Dak Lak ƀư test ngăch an lĕ rngôch cán bộ, phung pah kan ta Nông trường. Gay nchrăp njrăng n’gang srê Covid-19 tam, nông trương lĕ kơt tĭng trong mkra 3 ta ntŭk, lĕ rngôch phung pah kan nkre nkra njêng, nkre gŭ âm, nkhah êng ta nông trường.

Bah bôk khay 7 tât aƀaơ, Dak Lak ntoh âk rkum nuĭh ntưp tâm ntŭk gŭ rêh yơn dơi n’gor nsrôih njrăng n’gang srê. Êng rkum ntưp bôk năp geh tât nuĭh kan bah jay ndeh Tiến Oanh, ăp rkum nuĭh êng lôch uĕh nkhĭt rdêl srê jêh 14 nar nchoeng n’gang.

          Nuĭh rblang: Y Sưng Phê Ja