VOV4.M'nông: Năm nti 2021-2022, tă khuch bah nuh srê Covid-19 âk nkuâl ta n'gor Dak Lak ƀư ntĭm nti pơk sŏng dăng, nti ma trong ƀoh rup n'hanh jao bài tât tĭng jay. An ƀư ntĭm nti ma trong mhe, ăp nkuâl tâm n'gor mâp du đêt nău jêr jŏt da dê, lơn lah ta ăp nkual jru, nkual ngai, nkual rnoi mpôl đê̆. Gay nkra bah, ăp nhih nti hŏ geh nău rgâl an tâm di lơn đah nô nău ngăn ngăn. Lĕ ma rmôt nai ntĭm, kon se nti n'hanh me bơ̆ dôl nsrôih gay ƀư lôch jêh bôk nău kan ntĭm n'hanh nti.  

Lah ngoăy tâm ăp nai ntĭm nti ta ntŭk ngai đah nklang xã n'hanh mô ăp tŏng ăp ntil ndơ dŏng nti, nai Lê Thị Hải Đường, nai ntĭm jrô 1, nhih nti Tiểu học Mạc Thị Bưởi, xã Ea Kiết, nkuâl Cư M’gar, n'gor Dak Lak an gĭt: Ntơm bah bôk năm nti mhe, nai ntĭm hŏ "goh mpông" tĭng jay kon se nti gay ôp uănh nău geh ndơ pơk nti bah ngai, ntĭm nti trong dŏng nti ta điện thoại ndjôt ti. Kêng dŭt an saơ, lĕ ma jrô nti 33 nuĭh ri dơn geh 14 kon se nti geh ndơ dŏng nti pơk sŏng dăng dơm. Hôm đŏng, rnăk ăp kon se nti mpeh nkual jru ngai sóng điện thoại n'hanh trong ƀoh internet mô dăng. Nău dja ƀư nai ntĭm Lê Thị Hải Đường ân rgâl trong ntĭm nti an tâm di:

       “Jrô 1 dŭt wih wah ngăn, gâp hŏ hăn goh tĭng mpông jay rgŏ jă ăp kon se buăt nthoi internet n'hanh hŏ nthoi dơi 14 kon se, hôm du n'gul rnoh kon se nti hôm nti ma trong hăn jao bài, mpôl hên hŏ nsrôih dŭt lĕ n'hâm ntĭm nti ăp kon se rƀah gĭt ăp nău lư nê sĭt jay ăp kon se kơt tĭng, lôch nê mpôl hên geh tay du trong ntĭm nti êng đŏng lah ôp uănh tay n'hanh jao tay bài mhe tâm pơh bah kơi tay"

        Hôm ta nhih nti Tiểu học Ama Trang Lơng, xã Cư Mgar, nkuâl Cư M'gar, 80% kon se nti lah rnoi mpôl đê̆, nău rêh rnăk wâl hôm mâp âk jêr jŏt. Lôch hăn ôp uănh, dơn hôm 30% rnoh kon se nti tŏng geh ndơ ma nti pơk sŏng dăng dơm. Gay ntĭm nti geh nău tam, nhih nti hŏ rgŏ jă nău mât uănh, tâm pă đah me bơ̆. Nai ntĭm Lê Thị Tuyến, ntĭm jrô 2A, nhih nti Tiểu học Ama Trang Lơng, xã Cư Mgar, nkuâl Cư M'gar an gĭt:

      “Gŭ nti ta jay kơt aơ me bơ̆ lah nuĭh ƀư dŭt khlay. Geh rnôk hôm khlay rlău lĕ ma nai ntĭm đŏng jêng nău tâm dâl đah nai ntĭm n'hanh me bơ̆ kon se nti geh nău dŭt khlay tâm nău kơt nti bah ăp kon se, jêng nai ntĭm way kuăl điện ôp gĭt, tâm pă nkoch lah geh ntil me bơ̆ mô gĭt wât ri kuăl điện tâm pă nkoch đah nai ntĭm".

        Đah âk me bơ̆, nău ntĭm n'hanh nti pơk sŏng dăng dôl jêng nkô̆ nău jêr nkra rnôk mô geh ăp tŏng ndơ dŏng khlay. Yuh H Brắc Ayun, xã Cư M’gar, nkuâl Cư M’gar an gĭt: Rnăk yuh mpeh săk jêr jŏt, mô gĭt pơk đah internet. Gay an 2 hê kon ban tĭng trong ntĭm nti, yuh nô hŏ njuăl mon nti jrô 7 gŭ jay băl ndrel du jrô nti gay "nde kơt nti", hôm mon nti jrô 2 nti tĭng trong jao bài ta jay. Me bơ̆ nsrôih groi nđôi oh kon nti ren, lơn lah đah mon nti jrô 2.

       “Ăp oh kon mô dơi hăn nti gâp rvê đŏng, klach ăp oh kon mô rƀah gĭt nău kơt nti ma trong nti online ri mô dơi kơt nti. Măng sĭt lah gâp tĭng groi nđôi mon. Gâp nsrôih nti an ăp mon răk, nchih, ƀư dơi bài toán mhâm ƀư an năn đah năm aơ gay an oh kon gĭt ăp tŏng lơn”.          

          Tĭng ôp uănh bah Sở Giáo dục – Đào tạo Dak Lak, rnoh âk kon se nti geh ndơ ma pơk nti bah ngai ta  gưl Trung học phổ thông geh: 92%; Trung học cơ sở lah: 62%; gưl tiểu học dơn geh rlău 31%. Jêng, bah meng trong kơt nti pơk sŏng dăng âk nhih nti ta Dak Lak hŏ sơch tay âk trong ntop kơl ntĭm nti mhe mbra nkrum lam lĕ rngôch n'hanh tŏng dơi đah bôk nău kan ntĭm nti tâm nô nău geh aƀaơ. Ăp nai ntĭm ta Dak Lak, lơn lah nai ntĭm pah kan ta nkual jru, nkual ngai, nkual rnoi mpôl đê̆, dôl lor nchrăp, ngăch rƀah n'hanh nsrôih rlău âk tơ̆ gay mât dơi nău đăp mpăn ntĭm n'hanh nti, đăp mpăn lôch jêh ăp rnoh tât kan ndơ̆ luh tâm năm nti mhe./.

          Nuĭh rblang: Điểu Thân