VOV4.Mông: Srê Covid-19 ntoh tât jêr, kan ntĭm nti nkre mât đăp mpăn bah srê ji nkre gay ƀư ân jêh nau kan dôl ma ndơ̆ luh ân ăp ngih săm ƀŭt tâm Dak Lak âk nau jêr, ntul rlong. Nchrăp, ƀư ân ueh nau ntrơn rgâl gay tâm di đah nau dôl geh dôl geh ăp ntŭk kan ntĭm nti Dak Lak ƀư gay jêh nkô̆ nau bar ntil kan.

            Jêh bơi tât 3 pơh ƀư nau kan ntĭm nti tă bah ngih, nai nti ndrel kon se tâm ngih săm ƀŭt nkuăl têh Phước An, nkuăl Krông Pách, n’gor Dak Lak dôl ma kâp rnôk nau mbơh ntơm lơ 4/10 kon se “nkuăl ndrih” mra dơi plơ̆ nti tay. Yơn lah, knŭng jêh du nar hăn nti, UBND nkuăl ntrŭnh nau ân ăp ngih săm ƀŭt nsrŭng ntĭm nti tâm ngih săm ƀŭt ma ntĭm nti êng tâm ngih yor nau tât bah srê hôm jêr. Nai nti Trần Thị Nga, hiệu trưởng ngih săm ƀŭt mẫu giáo Phước An, mbơh, mô saơ geh nau ma ndrât ơm tâm nau kơt aơ:

            ‘Ngih săm ƀŭt mầm non nkuăl têh mro tâm nau ƀư vơt kon se hăn nti. Ngih săm ƀŭt hŏ rep kloh ngih jrâu nti, ƀư pă ăp nau ƀư nau kan lir nchrăp tĭng nkô̆ nau ntĭm nti. Ngih săm ƀŭt nkoch mbơh tât ăp nai nti kon se, cán bộ nŭih pah kan mpeh nau njrăng rdâng srê tĭng nau ntrŭnh rđau bah gưl kan ba lơ. Ƀư ăp nai quay video ntĭm ân ăp kon se mpeh nau blau tâm nau rêh, mpeh nau njrăng rdâng srê ndrel ăp nau ntĭm nti ueh êng tâm jrâu nti kon se 5 năm njoăl tât me mbơ̆ kon se uănh ndrel nti kon nơm tâm ngih”.

            Đah ăp kon se nti jrâu têh lơn kơt ntơm jrâu 6 tât jrâu 12, ntĭm nti ƀa ƀơ, êp nau ƀư ân tâm di nau đă njrăng, rdâng srê, ăp ngih săm ƀŭt hŏ nchrăp săch nau kan ntĭm nti, rgâl nau ntĭm nti tĭng ăp rnôk, ăp nkuăl ân tâm di, săk tam. Nai nti Đặng Như Sang, Groi hiệu trưởng ngih săm ƀŭt THCS Phước An, nkuăl têh Krông Pách, n’gor Dak Lak, ân gĭt:

            ‘Rđau kan ngih săm ƀŭt hŏ ƀư mbơh ân rjăp nau mĭn ‘njrăng rdâng srê kơt rdâng phung rlăng” mra tâm nau mĭn ƀư nau kan kơt nar aơ dôl ntĭm nti trực tuyến kơt lah geh nau nsôih phung hên mra ntrơn jêng ntĭm nti trực tuyến geh dơi ro. Tâm rnôk ntĭm nti ri phung hên mra ntrŭnh mbơh tât ăp nai nti ndăn mông nar gay ma ntĭm nti rgum ri nai nti mra mbơh ăp nau nti ueh, tơm ngăn ân kon se, hôm e nar ri nơm ntĭm nti trực tuyến ri mra dŏng ăp nau ntĭm nti nê gay ma ntĭm ân ueh, pơk hvi, ƀư nâp nau gĭt blau ân kon se”.

            Hôm tâm nkuăl jru Krông Bông, Hội đồng Đội nkuăl Krông Bông hŏ ƀư ntĭm nti ‘bok chăng”, yor druh ndăm, sinh viên ntĭm nti ân ăp rmôt kon se tâm ntŭk gŭ. Rlau du khay ma aơ, êng nau ntĭm nti Online, du đê̆ sinh viên bah Ngih săm ƀŭt Đại học Đà Nẵng, ăp nar leo ăp kon se nti ntơm jrâu 1-5 sĭt ngih nơm gay ma ntĭm nti. Aơ lah ăp oh mô geh máy tính, điện thoại gay ma ntĭm nti trực tuyến. Sinh viên Nguyễn Bích Phương mbơh, yor srê ji Covid-19 ri ma kon se mô dơi hăn nti ta Đà Nẵng, nơm ntĭm nti Online. Êng mông nti ri hôm kơl an ân kon se jê̆ nti tâm jrâu “Bok chăng”:

            ‘Dơi gĭt tâm nkuăl geh rgŏ jă jrâu nti Bok chăng gay ma kơl an kon se geh nau rêh jêr jŏt mô lah mô tŏng nau dơi nti Online. Gâp hŏ đăng ký râng rgop du đê̆ n’hâm gay ma kơl an kon se rlet rlau nau nti Online tâm yan srê aơ. Rnôk saơ ăp oh geh hăn ntĭm tâm ăp nar ri gâp saơ rhơn ngăn ân ăp oh yor hŏ geh kơt tĭng nti ăp tŏng nau ntĭm”.

            Krông Bông lah du nkuăl jru ngai ngăn bah n’gor Dak Lak. Nkuăl aơ, rnôk geh srê Covid-19 hŏ dơi geh nkân, kon se nti THPT hŏ geh hăn nti tâm ngih săm ƀŭt. Êng kon se nti ntơm jrâu 1-5 hôm nti Online. Nô Bùi Tấn Lợi, Kruanh Hội đồng đội nkuăl Krông Bông mbơh: Nau ƀư ntĭm nti ăp jrâu “Bok chăng” tâm ăp thôn, ƀon gay ma kơl an kon geh geh ntĭm nti tâm yan srê. Tĭng nê, ăp nŭih kơl an hôm tât ăp ngih kon se nti mô lah rgum 2-3 kon se tât ngih nơm gay ma ntĭm nti ƀư nkra bài ndrel ngăn tĭng ăp nau ntrŭnh mpeh nau njrăng rdâng srê Covid-19:

‘Aơ lah jrâu nti năn ngăn gay ma kơl an ăp oh. Ăp nŭih kơl an lah ăp băl mom, đoàn viên, dinh viên, ăp nau nti Tổng phụ trách đội leo máy tính, điện thoại tât ngih ăp oh. Rnôk aơ, phung hên mât geh 10 jrâu nti kon se. Aơ lah nau kan mhe ndrel geh nau ueh ngăn tâm rnôk aơ ndrel ma tâm rơh tât”.

            Bah năp nau tât bah srê ji jêr rdâng, UBND n’gor Dak Lak jao nau dơi ân ăp nkuăl ƀư nau ntrŭnh ntĭm nti ân tâm di. Wa Lê Thị Kim Oanh, Groi giám đốc N’gâng kan ntĭm nti n’gor Dak Lak mbơh, n’gâng kan ntĭm nti Dak Lak hŏ gĭt tŏng kloh nau jêr ndrel nau ntil rlong tâm rnôk geh srê ji hôm tât jêr ndrel têk jong. N’gâng kan hŏ đă đah UBND n’gor kơl an ăp nau kan gay ma ntrơn jêng nau kan nơm ân geh tâm kơt đah nau dôl geh ndrel n’huch ăp nau khuch ngăn tât nau kan ntĭm nti, tâm nê mô dơi rgâl nkô̆ nau mât đăp mpăn nau kan:

            ‘Êp ăp nau kan ăp ngih săm ƀŭt nchrăp ân nau njrăng rdâng srê kơt ndri hôm, hôm geh nau nchrăp ndâk âk nau kan gay ma ntĭm nti êng êng gay ma moh nau tât ri nơm kŏ ntrơn jêng ăp nau ntĭm nti ân tâm di đah nau dôl geh. Tă bah nê gay nau ntrŭnh ƀư nkô̆ nau bar ntil kan nkre njrăng rdâng srê nkre đăp mpăn ăp nau kan ntĭm nti bah ngih săm ƀŭt tĭng di nau ntrŭnh đă”.

            Đah nau nchrăp, nau blau gay ma rdâng đah srê Covid-19, n’gâng kan ntĭm nti bah n’gor Dak Lak dôl ma nsôih mât đăp mpăn nkô̆ nau mât ân kloh ndrel nâp nâl tâm năm nti mhe du trong ueh nâp ngăn./.

            Nŭih rblang: H’Thi