VOV4.M’nông: Nar bah năp n’gor Dak Lak lĕ geh rlău 17 rbăn nuĭh bah ăp n’gor mpeh bah dâng sĭt, an nkhah êng tĭng nău ntrŭnh njrăng n’gang chôt srê Covid-19. Ndrel đah nĕ lah hang rmưn nuĭh sĭt miền Trung, hăn Bắc jru ngai, hăn rlău n’gor Dak Lak. Ăp nău kan, nsum mpôl ndrel nuĭh ƀon lan lĕ rgop ndơ ngêt sa, pă nklâm piăng sa an dơm an nuĭh hăn trong n’hanh nuĭh nkhah êng đăp mpăn njrăng n’gang srê. Nău ƀư aơ lĕ rgop “ntop soan” an rơh plơ̆ sĭt hôm e mâp âk jêr jŏt, ŏk r’ah.

          Tâm rnôk hăn bah nkual ƀon têh Hồ Chí Minh sĭt ƀon Quảng Nam, yuh Đỗ Thị Thanh Châu lĕ dơi geh “ntop soan” ŏk r’ah n’ăp nuih n’hâm. Rnôk rlu jâng ta ntŭk ntop kơl piăng n’hanh dak ngêt bah năp ngih sam ƀŭt THCS Trần Phú, xă Hòa Phú nkual ƀon têh Buôn Ma Thuột, n’gor Dak Lak, yuh dŭt rngot:

          “Geh piăng sa, dak ngêt, dak toh tay tŏng ăp. Ôi geh âk yơ an prăk oh kon se. Gâp saơ rhơn răm. Rnôk bôk năp hăn ri rnot ngăn yơn hăn hôm mư saơ nău yô̆ rŏng âk ngăn jêng kơl an nuih n’hâm bah he dŭt rhơn n’hanh nkah gĭt nău yô̆ rŏng bah lĕ rngôch oh nô yuh yơ ntop kơl”.

Ăp nuĭh kan ntop kơl n’gôn piăng sa ta ăp jay sa lŏng bôk tôr

          Nar bah năp, Hội chữ thập đỏ n’gor Dak Lak tâm rgop đah ăp rmôt lŏng bôk tôr lĕ n’gôn hang rbăn nklâm dơi sa ăp nar ntop kơl mpôl nuĭh bah ăp n’gor mpeh bah dâng plơ̆ sĭt. Ăp nklâm piăng, dŭng por mô lah ƀanh mì lĕ jŭt jăng nău ŏk r’ah bah ăp nuĭh ƀon lan tâm rnôk sĭt ƀon. Wa Trần Thị Phương Thu, Groi kruanh Hội chữ thập đỏ n’gor Dak Lak an gĭt: ăp nar geh bah 5.000-6.00 nklâm ndơ sa dơi ăp rmôt lŏng bôk tôr, jay sa lŏng bôk tôr ntop kơl soan ta ăp ntŭk ntop kơl ta Quốc lộ 14 (ta xă Hòa Phú, nkual ƀon têh Buôn Ma Thuột). Rmôt kan lĕ ƀư tâm rgop, tâm pă mông nar n’hanh ntŭk wơt dơn gay n’hŭch nău nuĭh ƀon lan rgum âk ta du ntŭk.

          “Aƀaơ, ta ăp ntŭk kâp uănh nđôi srê bôk trong nkual ƀon têh Buôn Ma Thuột, n’gor lĕ ntĭm rđău mbơh săk soan n’hanh tâm pă trong an ăp nkuăl wơt nuĭh ƀon lan sĭt ăp nkuăl, ƀư test ngăch n’hanh săch uănh nkhah êng. Ta năp nu nău nĕ, Hội chữ thập đỏ n’gor lĕ ntĭm rđău ăp nkuăl, nkual têh, rmôt kan nkual ƀon têh ntop soan tay an nuĭh ƀon lan đah ndơ sa n’hanh dak ngêt. Nkre ƀư trong rgŏ jă, pơk ƀư ăp jay sa gay ntop kơl trong kan njrăng n’gang srê ta ntŭk”.

Ăp nklân piăng dơi klâm uĕh njuăl tât ăp ntŭk ntop kơl

          Mô knŭng ta nkual ƀon Buôn Ma Thuột, ăp nar bah năp ta ntŭk ăp nkuăl bah n’gor Dak Lak njok quốc lộ 14, âk ntŭk kan lŏng bôk tôr, nuĭh kơl kan n’hanh ăp hội đoàn ta ntŭk tâm rgop ƀư âk ntŭk ntop kơl gay ntop soan an mpôl nuĭh sĭt ƀon hăn rlău.

Ndrel đah nău ƀư ntop kơl nuĭh hăn trong, nar bah năp, ăp rmôt kan nsum mpôl n’hanh nuĭh ƀon lan ta Dak Lak lĕ ƀư ăp jay sa an dơm gay ntop kơl ăp nuĭh an nkhah rgum. Wa Hoàng Thị Thu Hương, Kruanh Hội liên hiệp Bu ur xă Xuân Phú, nkuăl Ea Kar mât uănh “Jay sa mô sŏk prăk” ta aơ, an gĭt, aƀaơ jay sa geh rlău 100 nuĭh râng, du nar geh bah 5 tât 10 oh yuh tâm rdơn n’gôn. Tât aƀaơ ăp yuh lĕ rhŏ an rlău 10.000 nklâm piăng an dơm ntop kơl nuĭh ƀon lan sĭt nkhah êng.

          “Bah n’hêl na nê̆ nuĭh ƀon lan lĕ rngôch hăn ƀư sa ngai plơ̆ sĭt ƀon lan dŭt jêr jŏt n’hanh rnăk wâl gŭ ngai mô geh prăk gay njŭn piăng n’hanh dak ngêt. Ri mpôl hên ƀư jay sa mô sŏk prăk n’hanh ăp nsum mpôl hăn rgŏ jă nuĭh ƀon lan mât bah rnôk geh srê tât aƀaơ. Nuih n’hâm bah oh yuh dŭt n’hâm gơih nđor, đê̆ đŏng âk oh yuh mpôl hên mô kâp rgŏ jă, nuĭh ru ri hăn kơl uănh kơt nău kan bah rnăk wâl nơm. Bôk năp mpôl hên rgŏ jă ăp rnăk geh oh kon, geh nuĭh jay nkhah êng ta ntŭk hăn râng n’gôn sa, gay gĭt mpôl hên n’gôn geh đăp mpăn, kah, kloh uĕh đŏng lah mô”.

Pă an nklâm piăng sa an dơm kơl nuĭh plơ̆ sĭt đăp mpăn nkhah êng

          Tĭng wa Đào Đức Hoàn, Kruanh UBND xă Xuân Phú, nar bah năp geh rlău 100 nuĭh sĭt bah ăp n’gor mpeh bah dâng sĭt ta ntŭk, dôl ƀư nkhah rgum ta ăp ngih rƀŭn ăp thôn. Gay kônh wa đăp mpăn nkhah êng, n’gâng kan ƀon lan n’hanh ăp nsum mpôl lĕ rgŏ jă doanh nghiệp, ăp nuĭh lŏng bôk tôr rgop an “jay sa mô sŏk prăk”, rhŏ an ăp nkual nkhah rgum.

          “Nuĭh ƀon lan rnôk sĭt bôk năp mâp dŭt âk jêr jŏt. Yơn knŭng jêh du nar 2 nar khân pơng sa nău rhŏ an bah ăp jay sa nsum kơt nuih n’hâm bah ƀon lan mpeh trong kan njrăng n’gang srê ri khân pơng dŭt đăp mpăn, tĭng rjăp ăp nău ntrŭnh mpeh njrăng n’gang srê Covid-19. Tât rnôk aơ xă Xuân Phú lĕ wơt geh rlău 1.000 nuĭh tâm ăp rơh sĭt nkhah êng ta ntŭk. Lĕ rngôch mô geh ndơ rgop tâm ăp nar sa ta nkual nkhah êng. Aƀaơ trong kan njrăng n’gang srê bah ntŭk mpôl hên mâp dŭt âk nău nơih yor nuĭh ƀon lan ndrel ty gay kơl an ăp nuĭh ƀon lan hăn ƀư sa ngai sĭt”.

          Ăp nklâm piăng, rlŭ por mô lah ƀănh mì, gri dak dơi an tât ty nuĭh hăn trong n’hanh ăp nuĭh an nkhah êng mpơl nău yô̆ rŏng ngăn ngên bah nuĭh ƀon lan Dak Lak đah ăp nău rêh jêr jŏt. Nău ƀư geh nkô̆ aơ bah nuĭh ƀon lan Dak Lak lĕ rgop “ntop soan” an rơh sĭt hôm e âk jêr jŏt.

          Nuĭh rblang: Y Sưng Phê Ja