VOV4.M’nông: Bah năp nau tât bah srê Covid-19 ntơm lơ 15/9 tât rnôk aơ, nkuăl têh Buôn Hồ, n’gor Dak Lak mro geh kơp dơn nŭih ntưp srê Covid-19 tâm ƀon lan ma ê hŏ gĭt tu tơm ntưp. Kêng măng 17/9, N’gâng kan dak si Dak Lak hŏ tâm grop nsum đah Ntŭk kan dak si nkuăl têh Buôn Hồ ntrŭnh nau sŏk mẫu xét nghiệm tĭng nau test ngăch ndrel RT-PCR đah ƀon lan tâm 4 phường dôl lah ntŭk geh ntưp hô ngăn tâm nkuăl têh Buôn Hồ. Tĭng nê, ntơm nar aơ lơ 18/9, n’gâng kan dak si mra xét nghiệm tâm 4 phường tâm nkuăl têh Buôn Hồ, geh: Phường An Lạc, An Bình, Thiện An ndrel Đạt Hiếu.

Nar sŏk mẫu xét nghiệm mra geh tâm nar (ntơm 18/9 ân tât 24/9). Nchrăp geh nklăp 33.077 nŭih tâm rnoh 8.917 rnăk geh sŏk mẫy xét nghiệm tâm rơh aơ. Kơp tât kêng măng 17/9, nkuăl têh Buôn Hồ kơp dơn geh 180 nŭih ntưp ma srê SARS-Cov2, du hê nŭih khĭt. Ngăn lah, ntơm lơ 15/9/2021 tât 5h kêng măng 17/9/2021 nkuăl têh Buôn Hồ kơp dơn geh 47 nŭih ntưp srê Covid-19 đah ăp nŭih geh tât ntŭk tăch rvăt ăp ntil play sa bah nkuăl./.

Nŭih rblang: H’Thi