VOV4.M’nông: Tât rnôk aơ, 4/5 nŭih ji srê Covid-19 tâm rnôk ntoh luh tal 4 ta Dak Lak hŏ luh bah ngih dak si. Nau ngăn lah, tâm rnoh 4nŭih aơ, geh nŭih ji ntưp srê Covid-19 mrô 3836 geh nau khuch jâk, geh sŏ n’hâm ma máy ndrel ân n’hâm tâm trong mơr. Nau ndâk bah ueh bah nŭih ji aơ dôl ma leo tât nau bonh đă têh ngăn ân ăp nai dak si tâm nau njrăng rdâng srê Covid-19.

Ndjôt n’ha săm ƀŭt ân luh sĭt bah ngih dak si jêh 41 nar săm srê Covid-19, nô V.Đ.D, deh năm 1971, ta Phường Đạt Hiếu, nkuăl têh Buôn Hồ, n’gor Dak Lak mô dơi mpôn nau rhơn ndrel mro nkoch nau lah ueh tât ăp nai dak si hŏ săm, mât chăm ân nô tâm rơh rlau aơ. Nô D mbơh: rnôk gĭt nơm ntưp srê Covid-19 nô rvê ngăn, rvê lơn tay rnôk geh nau ji lơn jâk. Du pơh geh mât chăm đah ăp ntil dak si, máy móc lăp tâm nŭih, geh rnôk ji tâm lam săk, sŏ n’hâm jêr ri nô lơn ma klach. Yơn lah, geh nau bonh đă năn bah ăp rmôt nai dak si, nô hŏ rlet rlau “trong khĭt” gay ma sĭt đah rnăk vâl ndrel ƀon lan:

  ‘Rnôk sŏ n’hâm ma máy jâk ri nuih n’hâm klach rvê ngăn dŏng. Rnôk sŏ n’hâm ri jêr ngăn, mô ueh săk jăn, yơn lah mro geh nai dak si bonh đă nsôih ân rlet rlau rnôk khuch jêr nê. Êng nau kan săm ân nơm ri ăp nar nai dak si hôm chăm ân nau ngêt sa, dak toh ngêt ueh ngăn. Dăn lah ueh rmôt nai dak si hŏ săm, mât chăm ân gâp tâm rơh rlau aơ”.

Nô D jêng nŭih ji Covid-19 tal 2838 tâm lơ 15/5/2021. Nô F1 bah nŭih ji mrô 3052 tâm Thuận Thành, Bắc Ninh. Yor ntưp srê Covid-19 bah Ấn Độ ri n’ghâm soan bah nô geh nau jâk khuch. Nai dak si Châu Đương, Giám đốc ngih dak si Hiăn ndrel klơm soh Dak Lak mbơh: Gay săm ân nŭih ji mrô 3836 Ngih dak si hŏ đă nau kơl an bah nai dak si tă bah nkuăl ƀon têh Hồ Chí Minh ndrel Ngih dak si nkuăl Tây Nguyên ndrel âk ntil ndơ dŏng êng êng. Ndrel ma nê, ăp nar ngih dak si kŏ mbơh ăp rnoh, ăp mrô bah nŭih ji ân Rnâng kan săm srê Covid-19 bah neh dak uănh năl.

Nau nsôih bah rmôt nai dak si leo tât nau săk tam ngăn, tât lơ 17/6, nŭih ji mrô 3836 hŏ mô hôm ntưp đah srê SARS-Cov2 bôk năp. Tât lơ 25/6 jêh 3 tŏ xét nghiệm mô hôm ntưp, nŭih aơ hŏ geh luh sĭt bah ngih dak si. Nkoch tât nau săm ân nŭih ji 3836, nai dak si Châu Đương, nkoch:

  ‘Nŭih ji aơ lah ngoai tâm ăp nŭih ji êng ngăn, nŭugh aơ lăp tâm ngih dak si lơ 14/5, geh 3 nar ri nau ji tât ndal ngăn, păng jêng ji jâk jru ndrel khuch n’hâm, ri Ngih dak si hŏ geh nŭih kơl săm ji bah Ngih dak si nkuăl tât ân máy sŏ n’hâm ndrel trih mham mro. Tât lơ 24/6 nŭih nai dak si tă bah ngih dak si Chợ Rẫy lŏ tât kơl. Jêh 7 nar săm ri geh nau mbơm oi, păng geh nsrŭng trih mham, mô kâp sŏ n’hâm ma máy ndrel jêh ri rhuăt dơi máy sŏ n’hâm. Păng aơ rnôk ji ri jâk jru hô ngăn, ma rnôk bah ri bah kŏ ngăch đŏng”.

Wa Nguyễn Văn Hùng, Groi Giám đốc N’gâng kan dak si n’gor Dak Lak mbơh, ntơm rnok geh srê Covid-19 ntoh tât rnôk aơ, Dak Lak hŏ rlet rlau 2 tŏ săm ân nŭih ji Covid-19 đah 8 nŭih. Yơn lah nau tât jâk lơn kơt nŭih ji mrô 3836 lah nŭih bôk năp ma n’gâng kan dak si Dak Lak mâp. Tâm rnôk ndơ dŏng, máy móc ê tŏng, rmôt nai dak si ê geh nau blau, kan săm bah ân nŭih ji  3836 lah nau rhơn bah ăp nŭih nai dak si săm ji tâm Ngih dak si Hiăn ndrel klơm soh ndrel kŏ lah nau ueh gay ăp nŭih nai dak si bah n’gor kơt tĭng nau tă blau kan ân ma nơm:

 ‘Đah nau săm bah nŭih ji aơ ri păng ƀư ân oh nô nŭih pah kan tâm ngih dak si hên geh âk nau blau ngăn. Ngăn nê lah mpeh nau blau ân khoa hồi sức tích cực ri nti 3 năm, yơn ma mô mâp nŭih ji kơt aơ, mô blau ƀư ri mhâm dơi blau. Ăp nô, ăp oh pah kan bah ntŭk bôk tơm bah khoa hồi sức aơ ri bu geh nau tă blau bah nau ntĭm nti. Kơt lah rnôk du đê̆ mrô geh nau rgâl tâm máy uănh n’ôi nŭih ji ri bu gĭt lah ân geh n’hao tay nau chuh, n’huch tay nau chuh ân tâm ban. Aơ lah nau blau ueh ngăn”.

Kơp tât rnôk aơ, Dak Lak hŏ săm bah 7/8 nŭih ji ntưp srê Covid-19 bah 2 tŏ. Ăp ntruh dak rhal bah mrôt nai dak si hŏ rŭng jur tât nrôk aơ kŏ geh nau trok ndơn tâm ban, đah nau leo tât nau rêh ân nŭih ji./.

Nŭih rblang: H’Thi