VOV4.M’nông: Rơh rƀŭn tal 2 Hội đồng nhân dân n’gor Dak Lak gưl X, năm kan 2021-2026 hŏ geh tâm 2 nar lơ 12 ndrel 13/8. Geh tâm rnôk srê Covid-19 dôl ma tât tâm n’gor, rơh rƀŭn rơh aơ ƀư tĭng trong trực tuyến đah 8 ntŭk ƀoh gay ma đăp mpăn nau đă njrăng rdâng srê. Ta rơh rƀŭn aơ, HĐND n’gor Dak Lak hŏ nchră tât nau tă geh dơi ƀư nau nchrăp hun hao văng sa, rêh jêng, đăp mpăn neh dak, rnă njrăng 6 khay bôk năm, ăp nau kan, ntrong kan tơm tâm 6 khay dŭt năm 2021.

6 khay rlau aơ, bol ma geh srê Covid-19, yơn đah nau rgum rđau, đă ƀư “nkô̆ nau bar ntil kan”, nkre njrăng rdâng srê nkre hun hao văng sa, rêh jêng, rnoh geh ntil ndơ bah lam n’gor (GRDP- rnoh tâm ntit đah năm 2010) hôm geh rlau 22.200 rmen, hao 9,11%. Rnoh geh tơm prăk geh 3.595 rmen, hao 11,5% rđil rơh aơ, ăp nau kan văn hoá-rêh jêng mât đăp mpăn. Ta nar rƀŭn.

Ăp ntoh măt mra rgop mpeh ăp nau kan ƀư nau kan tâm ăp khay dŭt năm bah năm 2021, nchrăp nau kan geh tât nau hun hao văng sa rêh jêng n’gor Dak Lak 5 năm tât. Tâm 8 ntŭk rƀŭn, lor ma râng nar rƀŭn tal 2, HĐND n’gor Dak Lak gưl X, ăp ntoh măt geh uănh test ngăch năl kman SARS-Cov2 ndrel geh pă gŭ tâm nkhah srang, put bok put mbung gay ma ƀư rjăp nau njrăng rdâng srê./.

Nŭih rblang: H’Thi