VOV4.Mnông- Kruanh UBND n’gor, kruanh rnâng kan ntĭm leo njrăng, rdâng nuh srê ta nuĭh n’gor Dak Nông lĕ ký ntrŭnh an gŭ srang nkhah lĕ rngôch nkuăl Dak Mil, dŏng răng dăng ăp nău ntrŭnh mbrô 16 lôch geh saơ nuĭh ntưp Covid-19 tâm ntŭk rêh jêng. Mông nar geh ƀư nkhah êng ntơm bâh 10 mông măng nar 14/9 an tât rnôk geh nău mbơh tay gay ma njrăng, rdâng nuh srê.

Tĭng nău mbơh bâh rnâng kan ntĭm leo nkuăl Dak Mil, nar 13/9, ntŭk kan dak si nkuăl geh dơn nău mbơh geh 1 rnăk ta tổ dân phố 2, nkuăl têh Dak Mil geh duh săk, rgănh. Hăn uănh xét nghiệm RT-PCR, 4 nŭih tâm rnăk vâl lĕ geh ntưp đah kaman SARS_COV2. Tĭng nău uănh ôp, rnăk vâl aơ tăch play, klâp ma 10 nar ba năp geh tâm mâp đah nuĭh ƀĭt ndeh rdeng play sĭt bâh nkuăl ƀon têh Hồ Chí Minh. Lôch geh ntoh ăp nuĭh ntưp srê tâm ntŭk rêh jêng, nkuăl Dak Mil lĕ nchueng rvêl 4 nkual geh nuĭh ntưp srê, nkre lah ndơ̆ ăp nuĭh ntưp srê Covid-19 lăp săm ta ngih dak si nkuăl n’hanh ndơ̆ 164 F1 hăn gŭ nkhah êng rgum.

Nuĭh rblang: Thị Đoắt