VOV4.M’nông: Tâm ăp năm rlau aơ, êp nau ntuh kơl ndâk nkra ngih vâl gung trong, hun hao tuch tăm, n’hao nau rêh ƀon lan, bôk nau kan ndâk njêng ƀon lan tâm n’gor Dak Nông hôm uănh khlay tât nau kan nchâp đă đah ăp xã lor rnôk geh kơp dơn xã tŏng dơi ƀon lan mhe.

Tâm nau geh kơp dơn ƀon lan mhe, nau mrô 13 mpeh nau kan ê nkra geh nau dơi khlay, ntrŭt dăng nau hun hao ƀon lan tâm nkuăl. Gay dơi ƀư dơi nkô̆ nau rmô 13, ăp rmôt tâm boh kan nsum ân geh nchrăp ƀư ueh nau kan, nar lơn ma ƀư ân rjăp nau kan dơi tâm nau ndâk njêng ƀon lan mhe tâm nkuăl.

Tĭng nau ntrŭnh, xã geh kơp dơn geh tŏng dơi ƀon lan mhe ân geh đê̆ ngăn ntơm du nau kan ƀư kan tuch tăm geh nau dơi ân tâm boh kan. Đah 7 xã rnôk aơ dôl geh n’gor uănh gay ma kơp dơn geh tŏng nau dơi ƀon lan mhe geh dĭng lĕ 11 ntŭk pah kan nsum geh săk tam, rgop nau ntrŭt dăng hun hao văng sa, ê nka, tăch rgâl, n’hao nau dơi tâm nau rêh bah ƀon lan.

Xã Cư K’nia, nkuăl Cư Jút, n’gor Dak Nông geh ntŭk kan tâm boh nau kan tăch rgâl pă tăch ndơ tuch tăm ân ƀon lan ndrel ntŭk tâm boh nau kan tuch tăm Tiến Thành. Tĭng wa Bùi Xuân Nghĩa, Giám đốc ntŭk kan tâm boh nau kan Tiến Thành, rmot kan dôl ma ê nkra tiêu ndrel cà phê tĭng nau dơi kơp dơn Organic ndrel dôl rlong nau kan ê nkra cà phê môi. Ntŭk tâm boh nau kan hôm tâm rgop kan nsum đah du ntŭk kan êng gay ma ê nkra, tăch dŏng ba ST 24 ân ƀon lan. Tâm rnôk ê nkra, ntŭk kan aơ ƀư nau ntĭm nti, mbơh ntrong kơt tĭng ăp nau kan ueh mhe ân ƀon lan gay n’hao săk geh, nau nâp kah bah ntil ndơ.

Ntŭk tâm boh nau kan tuch tăm-tăch rgâl hữu cơ Hoàng Nguyên ndrel ntŭk tâm boh nau kan tuch tăm Thuận Phát

  Xã Thuận Hà, nkuăl Dak Song, n’gor Dak Nông geh ntŭk tâm boh nau kan tuch tăm-tăch rgâl hữu cơ Hoàng Nguyên ndrel ntŭk tâm boh nau kan tuch tăm Thuận Phát.Wa Trần Thị Thu, Giám đốc ntŭk tâm boh nau kan Hoàng Nguyên mbơh, rơh rlau aơ, rmôt kan hŏ rƀŏng ndrel rgum nau kan nkra tiêu tĭng trong hữu cơ, đah rnoh hvi rlau 100 ha. Rnơm ma nê, ăp nŭih kan bah rmôt tâm boh nau kan geh âk prăk, bol ma nroh tiêu n’huch hô. Năm 2020, ntŭk tâm boh nau kan tăch luh 400 tấn tiêu hữu cơ đah rnoh khlay rlau 2 tŏ rđil ntŭk tăch, yor ri ma ƀon lan dŭt rhơn. Kan nkra tăch tiêu hưuc cơ tâm nkuăl lơn ma ueh, tâm ban ndrel nâp nâl.

Tâm âk nkuăl êng bah n’gor Dak Nông ăp rmôt tâm boh nau kan hŏ ndrel ma dôl ƀư ueh nau kan tuch tăm. N’hao nau geh ân ƀon lan. Xã dak Sôr nkuăl Krông Nô geh ntŭk tâm boh nau kan tuch tăm-tăch rgâl tiêu kloh Dak Sôr đah 30 nŭih kan nsum ndrel ntŭk tâm boh nau kan tuch tăm ndrih Thành Phát đah 12 nŭih kan. Ăp rmôt tâm boh kan aơ hŏ jao nau kan mhe ân ƀon lan gay n’hao nau săk tam bah nau kan tuch tăm, tăch rgâl, nkre tâm rgop nsum đah ăp ntŭk kan tăch ndơh ndơ.

Đah ntŭk tâm boh kan nsum tăch rgâl ndrel ƀư kan Bình Minh tâm xã Ea Pô, nkuăl Cư Jút hŏ tâm grop nsum đah ƀon lan gay ma tăm cà phê ndrel tiêu tĭng nau kơp dơn 4C, VietGap. Rmôt kan kŏ tâm rgop nsum đah ăp công ty gay ma tăh ndơ tuch tăm ân ƀon lan…

Tâm ban ma nê, đah âk nau kan kơl an, rmôt tâm boh tuch tămn, tăch rgâl, ƀư nau kan, ân manh Đại Đồng Tiến ndrel ntŭk tâm boh nsum Tân Thịnh, xã Quảng Khê, nkuăl Dak Glong hŏ rgum geh 47 nŭih râng nau tâm rgop kan tăm cà phê tĭng nau dơi UTZ. Tâm nau tâm rgop kan, rmôt kan mêt uănh nau ê nkra bah ƀon lan ndrel pă tăch ân phân, tơm prăk, nau kan…gay dơi geh ân ueh, nâp ntil ndơ tuch tăm tĭng nau dơi UTZ.

Wa Bùi Hoa Thám, Groi Kruanh rmôt tâm boh nau kan tuch tăm n’gor Dak Nông, rơh rlau aơ, n’gâng kan ăp gưl mro pơk trong nơih gay ntŭk tâm boh nau kan hun hao ê nkra, tăch rgâl. Ăp nkuăl geh âk ntŭk tâm boh kan nsum nar lơn ma pah kan jăp geh, nâp tam. Ngăn lah, ăp ntŭk kan aơ hôm ƀư ueh nau dơi bah nơm tâm nau ndâk njêng ƀon lan mhe tâm nkuăl, kơl an ƀon lan ƀư nau kan tuch tăm ueh lơn. Tâm nê, ăp rmôt tâm boh nau kan geh nau dơi ueh tâm nau kơl an ƀon lan ntrơn rgâl tơm tăm, mpa rong ndrel kơt tĭng nau kan mhe tâm tuch tăm gay ma n’hao nau dơi, ntil ndơ nâp ueh.

Ăp rmôt tâm boh nau kan tuch tăm uănh rjăp nau kan tâm rgop tuch tăm, tăch ndơ ndrel rgop nau tuch tăm tĭng ntrong. Tă bah nê, tuch tăm nar lơn geh rnoh khlay mpeh văng sa, rgop nau n’hao âk lơn tay nau săk geh ân ƀon lan./.

                        Nŭih rblang: H’Thi