VOV4.M’nông – N’gor Dak Nông lĕ mkra rgâl pơk lhoi gŭ srang kon nuĭh ta âk ntŭk ƀư tĭng ntĭm đă 19, pơk tay lĕ rngôch ăp nău ƀư tăch rgâl, ndoh ndơ rhŏ an ta ntŭk. Tĭng sam ƀŭt dơi UBND n’gor Dak Nông an nar 23/9, nkual ƀon têh Gia Nghĩa n’hanh 5 nkuăl geh: Tuy Đức, Dak Glong, Krông Nô, Cư Jut, rgâl bah ƀư tĭng Ntĭm đă 15 an Ntĭm đă 19. Êng nkuăl Dak Rlâp hôm e ƀư tĭng Ntĭm đă 15 n’hanh nkuăl Dak Mil ƀư tĭng tay Ntĭm đă 16. Ta ăp ntŭk rgâl an ƀư tĭng ntĭm đă 19, UBND n’gor Dak Nông an pơk tay ăp ngih sông sa, khách sạn, ntŭk sa; ăp nău ƀư tăch rgâl, tăch chrai n’hanh nthoi tay nău rdêng năch hăn ăp n’gor. Nău n’gluh an đah ăp ntŭk tăch rgâl lah rnôk nău ƀư plơ̆ tay, an tĭng rjăp ăp trong njrăng n’gang srê Covid-19 tĭng nău ntrŭnh bah N’gâng kan dak si. Na nê̆, mô rgum rlău 30 nuĭh ta ntŭk gŭ rêh, rlău ma ngih pah kan, ngih dak si, ngih sam ƀŭt. Kơp tât nar 23/9, n’gor Dak Nông geh 797 nuĭh ntưp Covid-19, tâm nĕ geh 253 nuĭh dơi săm bah lĕ sĭt.

Nŭih rblang: Y Sưng Phê Ja