VOV4.M’nông: Kêng măng 14/7, n’gor Dak Nông kơp dơn geh tay du hê nŭih ntưp ma srê SARS-Cov2 tal 4. Nŭih aơ lah bu ur N.T.L, deh năm 1972, lah nŭih F1 bah nŭih ji mrô 28.474, dôl geh nkhah tâm ntŭk nkhah rgum bah Ntŭk kan ngih dak si nkuăl Krông Nô ntơm lơ 11/7. Jêh rnôk ndơn geh nŭih ntưp, n’gâng kan dak si ndrel rmôt kan hŏ nkhah ndrel ntrơn leo nŭih ji nê đah ndeh tă bah ntŭk nkhah rgum bah Ntŭk kan dak si nkuăl Krông Nô hăn ntŭk nkhah săm srê Covid-19 bah n’gor Dak Nông.

Nkre ntơm mpuh nkhĭt kman tâm dĭng lĕ ăp nkuăl geh tât nŭih aơ bah năp nê. Ăp mrôt kan hŏ ntơm geh kơp uănh, joi ăp nŭih geh tâm mâp ndrel bôk năp hŏ kơp dơn geh 3 nŭih geh tâm mâp dăch lah: sai gŭ nsum tâm ntŭk nkhah rgum, cán bộ veh duh n’ik săk jăn ndrel sŏk mham uănh năl. Aƀaơ n’gâng kan dak si dôl ma lŏ uănh ăp nŭih êng geh tât nrôk nkhah./.

Nŭih rblang: H’Thi