VOV4.M'nông: Ôi 3/8, n'gor Dak Nông năl geh tay 7 nuĭh ntưp đah kaman SARS-CoV-2. Tâm nê geh 6 nuĭh lah nuĭh tă sĭt bah nkual nuh srê ăp n'gor mpeh bah dâng, 1 hê lah F1 bah nuĭh ji bu ur H.L.T, deh năm 2004, gŭ ta nkuâl Dak Glong tă sĭt bah nkual ƀon têh Hồ Chí Minh. Lĕ rngôch ăp nuĭh ntưp dja hŏ dơi an gŭ rgum êng lôch sĭt bah nkual geh nuh srê.

Lôch geh năl ntưp đah kaman SARS-CoV-2, n'gâng kan dak si ndrel mpôl kan dơi kan hŏ rdeng ăp nuĭh hăn tât nkual an gŭ rgum êng bah n'gor. N'gor  hŏ ngăch ƀoi tĭng têl 25 nuĭh F1 mâp dăch n'hanh dôl ndăn ôp uănh njăr trong hăn, tơm luh nuh srê n'hanh ăp ntŭk nuĭh ji bah lơ nê tă hăn tât/gŭ/rlu tâm 14 nar bah năp nơh. Tât rnôk dja, n'gor Dak Nông hŏ năl geh 14 nuĭh ntưp Covid-19 ta lĕ rngôch ăp nkuâl, nkual ƀon têh tâm n'gor. Tâm nê geh 3 nuĭh ji hŏ dơi săm bah, sĭt bah nhih dak si./.

Nuĭh rblang: Điểu Thân