VOV4.M’nông – Jêh rnôk saơ rkum nuĭh ntưp kaman Sars-CoV-2 tâm ntŭk gŭ rêh ta xă Quảng Tín, nkuăl Dak Rlâp, Groi Kruanh UBND n’gor Dak Nông Tôn Thị Ngọc Hạnh lĕ ký an kơt dŏng du đêt trong ndal njrăng n’gang srê Covid-19 ta lam nkuăl. Tĭng nĕ, n’gor Dak Nông ntrŭnh an nchăng n’gang lam nkuăl Dak Rlâp bah 12 mông nar 7/9 n’hanh kơt tĭng rjăp ăp trong mkra tĭng Ntĭm đă 16. Đă nuĭh ƀon lan gŭ ta jay, knŭng hăn bah dih tâm nău dŭt khlay. Wah rlu lĕ rngôch ăp nău ƀư ntŭk gŭ rêh. N’hŭch dŭt n’hâm nău ƀư bah ăp ndeh rklư êng nơm, đăp mpăn hăn soih nău rdêng ndoh ndơ, ndơ nkra njêng. Tĭng nău mbơh bah Ban Ntĭm rđău njrăng n’gang srê ta nuĭh bah nkuăl Dak Rlâp, bah nar 5/9 jêh rnôk saơ nuĭh ji bôk năp ta xă Quảng Tín, tât ôi 7/9, lam nkuăl lĕ kơp dơn 52 nuĭh ntưp đah Covid-19 tâm nĕ rgum ta 2 ƀon Bu Dzách, Bu Bir ta xă Quảng Tín. Aƀaơ nău kan dak si dôl ƀư uănh nđôi, joi, sŏk ndơ uănh năl an rlău 6.200 nuĭh geh tât, mâp êp gay joi nkhah êng ăp nuĭh ji luh bah dih ntŭk gŭ rêh.

Nŭih rblang: Y Sưng Phê Ja