VOV4.M’nông: Di tâm rnôk lăp năm nti mhe 5/9 mhe rlau. N’gâng kan n’gor Dak Nông saơ du hê kon se geh ntưp ma srê Covid-19. N’gâng kan ntĭm nti tâm nkuăl hŏ ân nsrŭng nau ntĭm nti tâm ăp ngih săm ƀŭt. Êng đah ăp ngih săm ƀŭt Dân tộc nội trú ƀư ân kon se gŭ tay tâm ngih ndrel mât ân rjăp an kon se. Tâm nkuăl Dak Rlâp, rơh rlau aơ, n’gâng kan ndrel ƀon lan hŏ geh âk nau kan kơl an, bonh đă kon se ndrel nai nti tâm nkuăl srê.

Jêh rnôk saơ du hê kon se geh ntưp đah srê SARS-Cov2 tâm lơ 5/9, rlau 220 kon se ndrel nai nti tâm ngih săm ƀŭt Dân tộc nội trú nkuăl Dak Rlâp, n’gor Dak Nông hŏ geh nkhah tâm ngih săm ƀŭt gay ma njrăng, rdâng srê Covid-19. Wa Nguyễn Văn Nam, Hiệu trưởng Ngih săm ƀŭt Dân tộc nội trú THCS ndrel THPT nkuăl Dak Rlâp, n’gor Dak Nông mbơh, ăp nar ngih săm ƀŭt tâm rgop nsum đah rmôt nai dak si veh duh n’ik săk jăn ndrel mbơh ngăch n’hâm soan bah kon se ndrel nai nti:

‘Mpeh cán bộ, nŭih pah kan, ntŭk sông sa, ntŭk gŭ bah ngih săm ƀŭt geh pă du jrâu pah kan ndrel ngih gŭ âm ân nai nti. Đah kon se ri ntŭk gŭ geh ueh đăp mpăn, geh tât 27 jrâu geh điện, dak, răk kloh, ntŭk ŭm nti êng. Hôm nau ngêt sa bah ăp kon se nti ri tĭng nau vay geh pă prăk sa ri kŏ geh nâm ơm, rnôk mô geh srê nuh. Bah nau ntĭm nti ri ngih săm ƀŭt kŏ nkoch mbơh gay ma me mbŏ ndrel kon se gĭt ndrel đăp mpăn. Tâm aơ ri ngih săm ƀŭt kŏ rvê kơl an nau ngêt sa, răk kloh, mpuh nkhĭt kman, mêt uănh n’hâm soan, lah ăp kon se geh nau tât ri ngih săm ƀŭt mra tâm rgop nsum ma ngih dak si gay ma mât chăm n’hâm soan ân kon se”.

Jêh rnôk saơ kon se ntưp srê Covid-19, n’gor Dak Nông hŏ nsrŭng nau ƀư ntĭm nti tâm ăp ngih săm ƀŭt. N’gâng kan ntĭm nti n’gor Dak Nông đă ăp gưl kan nti ntơm jrâu 1 tât jrâu 12, ntĭm nti ƀa ƀơ ndrel ăp ngih ntĭm nti ndơ êng tâm lam n’gor ân nsrŭng nau kan ntĭm nti trực sŏng tâm ngih săm ƀŭt ntơm lơ 7/9 ân tât rnôk geh nau mbơh mhe. Đah ăp ngih săm ƀŭt Dân tộc nội trú ăp nkuăl ndrel ngih săm ƀŭt THPT Dân tộc nội trú N’Trang Lơng, ƀư ân ăp oh gŭ tâm ngih săm ƀŭt ndrel ân geh mât ân nâp ân kon se. Đah ngih săm ƀŭt THPT Chuyên Nguyễn Chí Thanh ân kon se gŭ nội trú sĭt nkuăl nơm ndrel đă ăp oh ƀư ân rjăp nau kan njrăng, rdâng srê tĭng nau ntrŭnh.

N’gâng kan ntĭm nti Dak Nông đă ăp ntŭk kan ntĭm nti ƀư kơt tĭng ăp nau kan njrăng, rdâng srê.  Ăp ngih săm ƀŭt nsing tâm nau geh ngăn, mra ntrŭnh ăp nau kan ntĭm nti Online, jao phiếu bài tập, jao bài tập bah ăp nhóm tâm mạng xã hội gay ma kơl an kon se ntĭm nti ndrel du đê̆ nkô̆ nau tâm di. Ntŭk kan ntĭm nti năn tâm rgop nsum ma ntŭk kan dak si ntĭm mbơh ân kon se nti, cán bộ nai nti ƀư ueh nau kan njrăng, rdâng srê, đăp mpăn n’hâm soan ân ăp nai nti ndrel kon se nti tâm rnôk aơ. Ngăn lah, đah kon se geh ntưp F0, geh kơl an âk lơn, bonh đă ăp oh đăp mpăn nuih n’hâm ƀư ueh nau kan njrăng, rdâng srê. Wa Nguyễn Văn Toàn, Giám đốc ntŭk kan ntĭm nti n’gor Dak Nông ŭch nai ntĭm ndrel kon se nti mât ân ueh n’hâm soan, ƀư ueh ăp nau kan njrăng rdâng srê tĭng nau ntrŭnh ơm plŏ tay ntĭm ndrel ma nti:

“Rnôk aơ n’gâng kan ntĭm nti hŏ kuăl điện thoại ôp khâl, bonh đă ăp nai ntĭm nti đăp mpăn tâm ngih săm ƀŭt yor săk nơm ndrel ăp kon se nti. Ăp nai ntĭm nti kon se nơm ri ân geh uănh ân rjăp n’hâm soan bah ăp oh kon se gay ma mbơh ân rnăk vâl gĭt n’hâm soan bah ăp oh tâm ngih săm ƀŭt, nkre bonh đă rnăk vâl ân ăp oh gŭ nkre ta aơ. N’gâng kan kŏ rđau ân đă ân rđau kan ngih săm ƀŭt ân geh nkân uănh ăp oh, der nau geh tâm ntưp rkăng tâm ngih săm ƀŭt”.

Jêh rnôk aơ âk nŭih ntưp srê SARS-Cov2 tâm ƀon lan tâm xã Quảng Tín, nkuăl Dak Rlâp, Groi Kruanh UBND n’gor Dak Nông Tôn Thị Ngọc Hạnh hŏ ký nau ntrŭnh kơt tĭng ăp nau kan ndal tâm nau njrăng, rdâng srê Covid-19 tâm nkuăl. Tĭng nê, n’gor Dak Nông ntrŭnh nau nchueng lĕ nkuăl Dak Rlâp ntơm 12h lơ 7/9 ndrel ƀư tĭng ân rjăp ăp nau ntrŭnh tĭng mrô 16. Wa Võ Thị Kiều Linh, Groi Kruanh UBND nkuăl Dak Rlâp nkoch, jêh rnôk n’gor ƀư kơt tĭng nau rđau rmô 16, nkuăl geh nau kan pă ndơ sa ân kônh wa bah rmôt Covid-19 tâm ƀon lan. Ăp nŭih mra pă ndơ sa ân kônh wa tât ăp rnăk, rmôt kan geh nkhah tâm ne êgh rlau 220 nai ntĭm, kon se nti gay ma ăp nŭih đăp mpăn gŭ du ntŭk.

‘Phung hên đă Rnâng kan rđau nau njrăng rdâng srê tâm xã kŏ kơt lah bah nkuăl ân geh đăp mpăn mô ân kônh wa mô tŏng sa, mô tŏng geh ndơ kah tâm rnôk srê nuh. Phung hên sŏk ndơ têm nkra luh, lah kônh wa mô tŏng ri ê lor kơl an phe ndrel mì tôm ân ăp rnăk vâl. Ndrel lŏ kơp ăp rnăk ach o, êp ach o, rnăk geh dơi kơl gay ma kơl an kônh wa bah nau ji ngot”.

Rmôt kan bu ur nkuăl Dak Rklâp hŏ ntrŭnh nau kan “shiper 0 đồng” hăn chợ kơl an ƀon lan, gay kônh wa đăp mpăn gŭ tâm ngih njrăng rdâng srê. Rmôt kan hŏ ndâk 110 rmôt hăn chợ đah nau râng bah bơi tât 700 hội viên tâm ăp thôn, ƀon, tổ dân phố. Ăp nar, ăp rmôt “shiper 0 đồng” mra ndơn ndơ đă hăn chợ kơl an ăp rnăk ƀon lan. Rnôk jao ndơ ri ăp nŭih aơ mô geh mâp ma rnăk ƀon lan ma knŭng ân tâm mpông ngih gay đăp mpăn nau njrăng srê. Nau kan aơ mra geh rmôt kan bu ur nkuăl Dak Rlâp mât tâm rnôk hôm tĭng nau nkhah srang tĭng nau ntrŭnh mrô 16./.

Nŭih rblang: H’Thi