VOV4.M'nông: Kêng măng 9/9, Kruanh UBND nkuâl Ea H’leo, n'gor Dak Lak an gĭt dôl kan nsum đah n'gâng kan dak si n'gor gay tĭng ƀư ăp quy định mpeh dak si rnôk năl bar hê nuĭh rnâng kan điện sial dak bah dih hăn tât nkuâl gay rdâk ƀư điện sial geh ntưp đah SARS-CoV-2. Tĭng wa Nguyễn Văn Hà, Kruanh UBND nkuâl Ea H’leo, nar 6/9, mpôl rnâng kan dak bah dih lĕ rngôch 6 nuĭh tă bah nkual ƀon têh Hồ Chí Minh hăn tât nkuâl gay rdâk ƀư điện sial. Lôch rnôk hăn tât nkuâl, lĕ 6 nuĭh rnâng kan dja dơi an gŭ êng ta du khách sạn, ăp nuĭh gŭ êng du jrô. Nar 8/9, Ntŭk rgum kan dak si nkuâl Ea H’leo ƀư sŏk mham  uănh năl ngăch ri 2 tâm rnoh 6 nuĭh rnâng kan dja geh ntưp đah SARS-CoV-2. Ăp nuĭh rnâng kan dja hŏ dơi chuh 2 n'glai vaccine COVID-19 n'hanh hŏ dơi an gŭ êng 14 nar tĭng di nău way ta nkual ƀon têh Hồ Chí Minh. CDC Dak Lak năl lah nklăp 2 nuĭh rnâng kan dja ntưp rêng an nuĭh êng lah đêt. Aƀaơ ăp n'gâng kan dơi kan bah n'gor Dak Lak n'hanh nkuâl Ea H’leo dôl an ƀư ăp si ƀŭt khlay gay njŭn 2 nuĭh rnâng kan dja hăn săm, nkre an ƀư gŭ êng nuĭh rnâng kan hôm ƀa ƀă tĭng di nău way./.

Nuĭh rblang: Điểu Thân