VOV4.M’nông: Mhe rlau aơ, ma rbăn nŭih ƀon lah bah ăp n’gor tâm Tây Nguyên dôl rêh ndrel pah kan ta nkuăl ƀon têh Hồ Chí Minh ndrel du đê̆ n’gor mpeh ba dâng sĭt ƀon nơm gay ma njrăng srê srê Covid-19. Gay n’huch nau ntưp rêng srê ji tă bah ăp nŭih sĭt aơ, ăp n’gor tâm nkuăl hŏ pă ndơ nŭih, ntŭk kat ma kơl an nŭih ƀon lan sĭt ngih geh đăp mpăn. Du nau kan khlay jêh rnôk sĭt ƀon, nŭih ƀon kan ân geh ƀư ăp nau ntrŭnh mpeh nau njrăng rdâng srê gay mât đăp mpăn ân n’hâm soan.

Bah năp nau tât jâk tă bah âk nŭih sĭt ƀon gay ma der srê rlet bah trong nkân njrăng  Cai Chanh, nkuăl Dak Rlâp, n’gor Dak Nông, n’gâng kan dak si hŏ pă nŭih ndrel ndơ dŏng gay ma săk, pă ân năn. Wa Hà Văn Hùng, Groi Giám đốc N’gâng kan dak si Dak Nông lah, nau kan nkân njrăng srê, pă ntŭk nkhah ân nŭih sĭt, hăn rlet trong n’gor mra kơl an nau njrăng nau ntưp rêng bah srê tă bah bôk ndrel der nau ƀư jâk lơn ân n’gâng kan dak si tâm nau njrăng, rdâng srê rnôk aơ:

‘Tâm ntŭk nê phung hên veh duh n’ik săk jăn gay ma săch nŭih duh, siăk, jêr jŏ n’hâm geh tât ăp nŭih ji, ƀư nau mbơh dak si đah nau quét mã QR-code. Phung hên hôm ƀư nau nkân njrăng nŭih hăn, sĭt, tât Dak Nông lah ân geh săm ƀŭt xét nghiệm mô ntưp srê Covid-19. Ndrel nau ngăn lah ăp nŭih sĭt tât Dak Nông ma ê ƀư xét nghiệm ri ăp nŭih nê hên mra test ngăch gay ma năn saơ”.

Bôl ma bŭn 7 khay, ur sai yuh Hoàng Thị Nhung, xã Cư Ea Vy, nkuăl Ea H’Leo, n’gor Dak Lak ƀư công nhân ta Bình Dương hŏ kuăl điện thoại mbơh ma rnăk vâl, nchrăp ăp ntil tâm ngih kon jê̆ tâm mir, gay ur sai khân păng gŭ nkhah rnôk sĭt:

‘ Sĭt tâm ƀon ri saơ ueh lơn, ma njok trong ri gâp saơ rvê ngăn, yor lah hŏ uănh ta ri hôm, ma sĭt tât ta aơ ri lŏ geh uănh năl n’hâm soan đŏng ri mơ ma bah oi nau klach rvê. Jêh ri rnôk tât ta ngih ri hên hăn ngih dak si gay ma mbơh nau jêh ri mơ 2 hê ur sai hên gŭ nkhah êng tâm ngih mir ngai ma ngih 4 km”.

Hôm yuh H’Mara Niê, ta xã Hoà Phong, nkuăl Krông Bông kŏ hăn ntơm bah Bình Dương gay ma sĭt ngih rnôk tăng me mbŏ păng lah tâm xã kŏ geh ntŭk nkhah rgum ân nŭih tă bah nkuăl geh srê. Nau jâk ngăn lah rvê nơm geh nau ji leo nsĭt srê ntưp ma rnăk vâl bah yuh hŏ bah oi rnôk geh lăp gŭ tâm ntŭk nkhah rgum bah xã. H’Mara Niê ngơi:

‘Gâp rhơn ngăn rnôk tât ta aơ. Gâp hăn nkhah tâm ngih săm ƀŭt bah xã nkre, mô janh sĭt tâm ngih ôh. Ma me bơ gâp kŏ kuăl điện hôm, sĭt ri hăn nkhah nkre ro, mô dơi sĭt tâm ngih ôh”.

Nô Bùi Ngọc Hoàng, Bí thư Đoàn nkuăl Ea H’Leo, n’gor Dak Lak mbơh: ƀư tĭng nau rđau lơ 31/7 bah Thủ tướng Chính phủ, Rnâng kan rđau nau njrăng rdâng srê Covid-19 bah nkuăl Ea H’Leo hŏ rƀŭn ntrŭnh nau kan nsĭt ƀon lan. Tĭng nê nkuăl mra ân leo lăp dĭng 3 ntŭk nkhah rgum ndrel leo 9 bôk ndeh hăn vơt ƀon lan sĭt tâm ngih săm ƀŭt Dân tộc Nội trú Nơ Trang Lơng-ntŭk vơt ăp nŭih sĭt Dak Lak rgum gay ma uănh năl nau ntưp srê ngăch lor ma sĭt. Nau kan dak si, nau kơl an nkhah kŏ geh nkuăl ƀư ngăn:

‘Ntŭk nkhah bah nkuăl ri geh tŏng ân bơi tât 400 nŭih tâm 3 ntŭk, ngoai lah Ntŭk ngih dak si nkuăl, 2 lah ntŭk nti nau kan bah nkuăl ndrel 3 lah Ngih săm ƀŭt nội trú nkuăl. Rnâng kan rđau kan bah nkuăl mĭn kơl ntơm A-Z, bah năp măt ân đăp mpăn ân kônh wa geh ntŭk nkhah rgum ndrel kơt tĭng nau ntrŭnh mpeh nau njrăng srê”.

Ntơm kêng măng 29 tât ôi 30/7/2021, bơi tât 900 nŭih pah kan ta Đồng Nai ncho ndeh Hon đa sĭt Dak Lak. Ăp nŭih ŭch đăng kí ma n’gor Đồng Nai ndrel knŭng geh sĭt rnôk geh uănh năl mô ntưp srê Covid-19 gay ma đăp mpăn mô kâp nsrŭng tâm ăp ntŭk. Jêh nê, cảnh sát mât gung trong Đồng Nai hŏ ndâk rmôt kan geh rmôt mât đăp mpăn, hình sự, nai dak si bah n’gor Đồng Nai gay ma ndâk njêng mrôt kơl hăn bơi tât 400km trong. N’gor Đồng Nai kŏ pă du rmôt ndeh rdeng ndơ sa, dak ngêt kơl an tâm lôch njăr trong.

Jêh 3 măng ntrŭnh nau ndơn nŭih ƀon lan sĭt ƀon tă bah mpeh ba dâng hŏ geh rlau 3000 nŭih sĭt n’gor Dak Lak. Gay mât đăp mpăn nau njrăng srê, n’gâng kan hŏ rngeh măng nar gay ma nchh moh săk ndrel uănh năl srê. Bah nê saơ geh nklăp 20 nŭih ntưp ma SARS-Cov2, tâm nê 7 nŭih geh năl RT-PCR ntưp, hôm e dôl ma kâp RT-PCR. Ăp nŭih ntưp geh nkhah nkre, ăp nŭih năl mô ntưp ri ân sĭt nkuăl gay ma mbơh nau kan dak su tâm nkuăl ndre ƀư nkhah tĭng nau ntrŭnh. Wa Lê Phúc, Groi Giám đốc Ntŭk nkân njrăng srê ji tâm n’gor Dak Lak mbơh: Jêh rnôk Thủ tướng Chính phủ ntrŭnh nau tâm lơ 31/7, măng 1/8, jêh ăp nŭih tât ntŭk rgum gay ma uănh năl, âk nkuăl pă ndeh gay ma vơt ƀon lan sĭt ndrel ƀư nkhah tâm di. Nau aơ kơl nkuăl nkân nau ntưp rêng ueh lơn:

‘Du đê̆ nkuăl hŏ geh nkhah rgum tâm nkuăl phung hên ân lah nau kan aơ mra ueh lơn yor nkhah rgum du đê̆ nŭih mô dơi nkhah êng tâm ngiyh. Nau nkhah rgum mra ƀư dơi ăp nau uănh năl PCR ndrel rnôk saơ ntưp tâm ntŭk geh nkhah rgum ri păng mô geh ntưp ma ƀon lan. Đah nŭih nkhah tâm ngih ân geh tiŏng nau dơi kŏ kơt lah uănh năl mpeh dak si tâm ngih gay đăp mpăn jêh nê rnôk saơ ntưp ân geh nau kan gay ma nkhah ân tâm di”.

Tât rnôk aơ, dĭng lĕ 15 nkuăl, nkuăl têh, nkuăl ƀon têh bah n’gor Dak Lak kŏ geh nŭih ntưp ma srê Covid-19. Ăp nŭih aơ kŏ geh nau ntưp tă bah nkuăl ƀon têh Hồ Chí Minh ndrel du đê̆ n’gor mpeh ba dâng. Bah năp nau tât jêr bah srê ji, nau ma âk nŭih sĭt ƀon nơm gay ma der srê hôm geh ơm. Ăp nau kan vơt ƀon lan sĭt ngih dôl geh Dak Lak ƀư hŏ kơl an nŭih ƀon lan đăp mpăn lơn ndrel n’huch oi nau ntưp tâm ƀon lan./.

Nŭih rblang: H’Thi